अभिनेत्री झीनत अमान यांची व्यावसायिकाविरोधात बलात्काराची तक्रार

प्रसिद्ध सिनेअभिनेत्री झीनत अमान यांनी मुंबईतील एका व्यावयायिकाविरोधात बलात्काराची तक्रार दाखल केली आहे. जुहू पोलिस स्टेशनमध्ये आरोपीविरोधात तक्रार दाखल करण्यात आली असून त्याला गुरुवारी रात्री अटकही करण्यात आली आहे.

मुंबई : प्रसिद्ध सिनेअभिनेत्री झीनत अमान यांनी मुंबईतील एका व्यावयायिकाविरोधात बलात्काराची तक्रार दाखल केली आहे. जुहू पोलिस स्टेशनमध्ये आरोपीविरोधात तक्रार दाखल करण्यात आली असून त्याला गुरुवारी रात्री अटकही करण्यात आली आहे. झीनत अमान यांच्या तक्रारीनंतर क्राईम ब्रँचने या प्रकरणाचा तपास सुरु केला आहे. काल गुरुवारी रात्री मोहम्मद सरफराज नावाच्या व्यावसायिकाला अटक करण्यात आली आहे. त्याला आज कोर्टासमोर हजर केलं जाणार आहे. 68 वर्षीय अभिनेत्री झीनत अमान यांनी आरोपी व्यावसायिकाविरोधात महिन्याभरापूर्वीही पाठलाग करुन धमकावल्याप्रकरणी तक्रार दाखल केली होती. त्यावेळीही 30 जानेवारीला पोलिसांनी आरोपी व्यावसायिकाला अटक केली होती. आता मात्र त्यांनी बलात्काराची तक्रार दाखल केली आहे. तसंच त्याच्याविरोधात 15 कोटी रुपयांच्या फसवणुकीचीही तक्रार झीनत अमान यांनी महिन्यापूर्वी दाखल केली आहे. आरोपी बऱ्याच दिवसांपासून झीनत अमान यांचा  पाठलाग करत होता. तसंच त्यांना व्हॉट्सअपवर अश्लील मेसेजही पाठवत होता, असं पोलिसांनी म्हटलं आहे. आरोपीने झीनत अमान यांच्या घरात घुसून त्यांचा विनयभंग आणि बलात्काराचा प्रयत्न केल्याची तक्रार दाखल करण्यात आली आहे. तसंच सुरक्षारक्षकाला मारहाण केल्याचंही तक्रारीत म्हटलं आहे. कोण आहेत झीनत अमान? 19 नोव्हेंबर 1949 ला मुंबईत जन्मलेल्या झीनत अमान 80 आणि 90 च्या दशकातील प्रसिद्ध अभिनेत्री आहेत. सत्यम शिवम सुन्दरम (1978), धर्मवीर (1977), हरे रामा हरे कृष्णा (1971), यादों की बारात (1973), लावारिस (1981) या सिनेमांमधील झीनत अमान यांच्या भूमिका बऱ्याच गाजल्या आहेत. 1973 साली झीनत अमान यांना सर्वोत्तम सहाय्यक अभिनेत्रीचा फिल्मफेअर पुरस्कारही मिळाला होता.