Rio Kapadia Demise: चक दे इंडिया फेम अभिनेते रिओ कपाडिया यांचे निधन; वयाच्या 66 व्या वर्षी घेतला अखेरचा श्वास

अभिनेते रिओ कपाडिया (Rio Kapadia) यांनी वयाच्या 66 व्या वर्षी जगाचा निरोप घेतला आहे.

By : एबीपी माझा एंटरटेनमेंट डेस्क | Edited By: प्रियांका कुलकर्णी | Updated at : 14 Sep 2023 05:14 PM (IST)

Rio Kapadia

Rio Kapadia Demise: अभिनेते रिओ कपाडिया (Rio Kapadia) यांचे निधन झाले आहे. रिओ यांनी वयाच्या 66 व्या वर्षी अखेरचा श्वास घेतला आहे. रिओ यांच्या पार्थिवावर 15 सप्टेंबर 2023 रोजी गोरेगाव येथील शिव धाम शमशान भूमी येथे अंत्यसंस्कार होणार आहेत. रिओ कपाडिया यांच्या पश्चात पत्नी मारिया फराह, मुले अमन आणि वीर असा परिवार आहे.

रिओ कपाडिया यांचे चित्रपट

रिओ कपाडिया यांनी अनेक हिट चित्रपटांमध्ये काम केलं. त्यांनी दिल चाहता है, चक दे इंडिया, हॅप्पी न्यू इअर, मर्दानी यांसारख्या चित्रपटांमध्ये महत्वाची भूमिका साकारली. तसेच काही वेब सीरिजमध्ये देखील त्यांनी भूमिका साकारली. त्यांनी मेड इन हेवन आणि द बिग बुल या वेब सीरिजमध्ये काम केले. तसेच त्यांनी क्यूंकी सास भी कभी बहू थी, सपने सुहाने लडकपण के या मालिकांमध्ये देखील काम केले होते. काही दिवसांपूर्वी रिलीज झालेल्या मेड इन हेवन सीझन 2 या प्राइम व्हिडिओवरील वेब सीरिजच्या एका एपिसोडमध्ये त्यांनी काम केले होते. रियो यांनी त्यांच्या अभिनयानं प्रेक्षकांची मनं जिंकली होती.

रिओ कपाडिया यांच्या निधनानं मनोरंजनसृष्टीवर शोककळा पसरली आहे. रिओ कपाडिया हे काही महिन्यांपूर्वी स्वित्झर्लंडमध्ये हॉलिडेसाठी गेले होते. त्यावेळी त्यांनी स्वित्झर्लंडमधील यश चोप्रा यांच्या पुतळ्यासोबतचा एक फोटो सोशल मीडियावर शेअर केला. या फोटोला त्यांनी कॅप्शन दिलं, "स्वित्झर्लंड! अविश्वसनीय सौंदर्य! झुरिच, माउंट टिटलिस, इंटरलेकन, ल्यूसर्न, जंगफ्रॉजोच आणि यश चोप्राजींच्या शेजारी उभे राहण्याचा अभिमान. मी तिथे तीनदा गेलो आहे!'

View this post on Instagram

A post shared by Rio Kapadia (@riokapadia)

रिओ हे सोशल मीडियावर विविध सेलिब्रिटींसोबतचे फोटो शेअर करत होते. त्यांनी अर्जुन रामपाल, नाना पाटेकर आणि मृणाल ठाकूर यांच्यासोबतचे काही फोटो सोशल मीडियावर शेअर केले होते. सध्या अनेक जण रिओ यांना सोशल मीडियावर श्रद्धांजली वाहात आहेत.