तगड्या सिनेमासाठी बिग बींनी आकारलं तगडं मानधन

अश्विन नाग यांच्या नव्या सिनेमात अमिताभ यांना मिळालेल्या मानधनाची चर्चा सध्या ऑनलाईन विश्वात सुरू झाली आहे. अमिताभ बच्चन यांनी अश्विन नाग यांच्या सिनेमासाठी मानधन म्हणून घेतले आहेत तब्बल 21 कोटी रुपये.

मुंबई : गेल्या काही महिन्यांपासून अनेक विविध सिनेमाची चर्चा सुरु आहे. कोणता सिनेमा महागडा ठरतोय.. कोणता सिनेमा सगळ्यात लार्जर दॅन लाईफ टरतोय याची चर्चा होते आहे. यात काही सिनेमांची आवर्जून नावं घेतली जातायत. अयान मुखर्जीचा ब्रह्मास्त्र हा त्यापैकीच एक. सध्या या सिनेमाचं बजेट 300 कोटींच्या पुढे गेलं आहे. तर दुसरीकडे एस एस राजामौली महाभारत बनवू लागले आहेत. तोही सिनेमा बराच खर्चिक असणार आहे. तर आदिपुरुष हा ओम राऊत यांचा प्रभासची मुख्य भूमिका असलेला चित्रपटही मोठा असणार आहे. तर या सगळ्यात कडी आहे ती अश्विन नाग यांच्या नव्या सिनेमाची.

अश्विन नाग यांच्या या सिनेमात दीपिका पडुकोण आणि प्रभास यांच्या मुख्य व्यक्तिरेखा आहेत. आधी प्रभासला घेतानाच त्याला नेहमीच्या मानधनापेक्षा जास्त मानधन देऊन घेतल्याच्या बातम्या आल्या. त्यानंतर दीपिका पडुकोणनेही या सिनेमाला होकार देताना बक्कळ मानधन आकारल्याचं कळलं. आजवर कोणाही अभिनेत्रीने कधी घेतलं नाही इतकं मानधन तिने घेतलं. ही रक्कम जवळपास 12 कोटींच्या घरात जाते. आजवर कोणाही अभिनेत्रीला इतकी रक्कम मिळालेली नाही. पण दीपिकाचं फेम आणि तिच्या कामाची पद्धत लक्षात घेऊन या चित्रपटात तिला साईन केलं गेलं. प्रभास आणि दीपिका ही पहिल्यांदाच चित्रपटाचा स्क्रीन शेअर करणार आहेत.

ही बाब ताजी असतानाच या सिनेमात अमिताभ बच्चन यांचीही एंट्री झाली. प्रभास आणि दीपिका या सिनेमात असताना बच्चन यात करणार काय असा प्रश्न अनेकांना पडला. त्यावर प्रभासपासून दीपिकापर्यंत सगळ्यांनी उत्तरं दिली. या सिनेमात प्रभासच्या भूमिकेच्या लांबी इतकीच अमिताभ यांच्या भूमिकेची लांबी आहे असं दीपिकाने एका माध्यमाला दिलेल्या मुलाखतीत सांगितलं. सहाजिकच दुसरा प्रश्न रसिकांच्या मनात आला तो अमिताभ बच्चन यांच्या मानधनाचा. जर प्रभास आणि दीपिकाला इतकं भरमसाठ मानधन दिलं जातं तर अमिताभ बच्चन यांना दिलं जाणारं मानधन किती असेल असा प्रश्न पडणं साहजिक आहे. तर अमिताभ यांना मिळालेल्या मानधनाची चर्चा सध्या ऑनलाईन विश्वात सुरू झाली आहे. अमिताभ बच्चन यांनी अश्विन नाग यांच्या सिनेमासाठी मानधन म्हणून घेतले आहेत तब्बल 21  कोटी रुपये. आता याला अधिकृत दुजोरा अद्याप मिळालेला नाही. पण ऑनलाईन विश्वात अशी चर्चा जोरावर आहे. अमिताभ यांनी आजवर घेतलेलं ही भरभक्कम मानधन असल्याचं कळतं. या सिनेमाचं बजेट 100 कोटी असल्याचं बोललं जातं. पण अमिताभ बच्चन, दीपिका आणि प्रभास यांच्या मानधनाची बेरीज केली तरी ती साधारण 50 कोटींच्या घरात जाते. या सिनेमात इतर कलाकारही आहेत. त्यामुळे या सिनेमाचं बजेटही तसंच वाढत जाईल असं म्हटलं जातं.