Actor Rahul Arunoday Banerjee Dies: शुटिंगसाठी पाण्यात उतरला अन् आयुष्य गमावून बसला; लोकप्रिय अभिनेत्याचा समुद्रात बुडून मृत्यू
Actor Rahul Arunoday Banerjee Dies: अभिनेता राहुल अरुणोदय बॅनर्जी ओदिशातील तलसारी बीचवर शूटिंग करत होता. शूटिंगसाठी अभिनेता समुद्रात उतरला आणि यादरम्यान त्याचा बुडून मृत्यू झाल्याची माहिती मिळतेय.
Actor Rahul Arunoday Banerjee Dies: प्रसिद्ध अभिनेत्याचा (Actor) शुटिंगदरम्यान झालेल्या अपघातात दुर्दैवी मृत्यू झाल्याची धक्कादायक माहिती मिळतेय. बंगाली अभिनेता राहुल अरुणोदय बॅनर्जी (Bengali Actor Rahul Arunoday Banerjee) याचं वयाच्या 43 व्या वर्षी निधन झालंय. एका गुणी अभिनेत्याच्या अपघाती निधनामुळे मनोरंजन विश्वावर शोककळा पसरली आहे. अभिनेता राहुल अरुणोदय बॅनर्जी (Rahul Banerjee) ओदिशातील तलसारी बीचवर शूटिंग करत होता. शूटिंगसाठी अभिनेता समुद्रात उतरला आणि यादरम्यान त्याचा बुडून मृत्यू झाल्याची माहिती मिळतेय.
मीडिया रिपोर्टनुसार, रविवार, 29 मार्च रोजी 43 वर्षीय अभिनेता राहुल हे 'भोले बाबा पार करेगा' या टीव्ही मालिकेच्या शुटिंगसाठी दिघा इथे उपस्थित असताना ही दुर्दैवी घटना घडली. 'आनंदबाजार'मध्ये प्रकाशित करण्यात आलेल्या वृत्तानुसार, दिघाजवळील तालसारी इथे मालिकेचं शुटिंग सुरू असताना राहुल बॅनर्जी पाण्यात उतरला. असं सांगितलंय जातंय की, त्यानंतर काही क्षणातच तो पाण्यात बुडू लागला, त्यावेळी घटनास्थळी उपस्थित असलेल्यांनी तात्काळ मदतीसाठी धाव घेतली आणि त्याला पाण्यातून बाहेर काढलं. पण, तोपर्यंत फार उशीर झालेला.
सहकलाकारानं सांगितनं राहुल बॅनर्जीसोबत नेमकं काय घडलं? (Bengali Actor Dies)
'भोले बाबा पार करेगा' मालिकेत राहुल बॅनर्जीच्या काकांची भूमिका साकारणारे अभिनेते भास्कर बॅनर्जी यांनी, त्या दिवशी घडलेल्या घटनांचा सविस्तर वृत्तांत दिला. त्यांनी सांगितलं की, संपूर्ण टीम शुटिंगसाठी 'तालसारी' इथे गेली होती. 'आनंदबाजार'चा संदर्भ देत ते म्हणाले, "त्याचा मृत्यू बुडाल्यामुळे झाला. ही अत्यंत दुर्दैवी घटना आहे. शुटिंग संपल्यानंतर (पॅक-अप झाल्यावर) ही घटना घडली. मात्र, नेमकं हे कसं घडलं, हे अद्याप स्पष्ट झालेलं नाही..."
भास्कर यांनी पुढे स्पष्ट केलं की, शुटिंग संपल्यानंतर संपूर्ण टीम जेवणासाठी निघाली होती; मात्र राहुलनं तिथेच काही वेळ थांबण्याचा निर्णय घेतला. उर्वरित टीमला येऊन मिळण्यापूर्वी, आपण शुटिंगचे काही राहिलेले शॉट्स पूर्ण करू, असं त्यानं सांगितलेलं. पण त्यानंतर जे घडलं, त्याची कुणीही कधीच कल्पना केली नसेल.
मनोरंजन विश्वाच्या झालेल्या मोठा हानीबाबत शोक व्यक्त करताना अभिनेते भास्कर बॅनर्जी म्हणाले की, "पण असं काही घडेल, याची आम्ही कधीच कल्पना केली नव्हती. यावर विश्वास ठेवणं कठीण आहे. एक निरोगी आणि उत्साही व्यक्ती अशा प्रकारे अचानक हे जग सोडून जावी, हे वास्तव स्वीकारणं अत्यंत कठीण आहे..."
दरम्यान, राहुल अरुणोदय बॅनर्जी यांच्या अचानक आणि हृदयद्रावक निधनामुळे त्यांचे सहकलाकार, चाहते आणि संपूर्ण मनोरंजन विश्वालाच मोठा धक्का बसला आहे. खूपच कमी वयात हे जग सोडून गेलेल्या, अशा एका अत्यंत प्रतिभावान कलाकाराला गमावल्याचं दुःख पचवणं त्यांना कठीण जातंय.
महत्त्वाच्या इतर बातम्या :
महत्त्वाच्या बातम्या
