Vinod Tawde : विनोद तावडेंसारखा नेता पैशांसोबत पकडला जातो, ही लाजिरवाणी गोष्ट, जनता धडा शिकवणार; वंचितचा हल्लाबोल
Vinod Tawde in Virar : भारतीय जनता पक्षाने पुन्हा सत्ता मिळविण्यासाठी अतिशय खालची पातळी गाठली आहे. पैसे वाटून जनतेला विकत घेण्याचा प्रयत्न केला जात आहे, असेही वंचितच्या नेत्याने म्हटले आहे.
मुंबई : विधानसभा निवडणुकीसाठी (Maharashtra Assembly Election 2024) मतदानाला अवघे काही तास शिल्लक असताना मुंबईत मोठी घडामोड झाल्याचे पाहायला मिळाले. भाजपचे राष्ट्रीय सरचिटणीस विनोद तावडे (Vinod Tawde) यांनी विरारमधील एका हॉटेलात 5 कोटी रुपये वाटल्याचा आरोप बविआकडून (BVA) करण्यात आला. यामुळे राजकीय वर्तुळात मोठी खळबळ उडाली. आता या प्रकरणावरून वंचित बहुजन आघाडीने विनोद तावडेंसह भाजपवर हल्लाबोल केलाय.
वंचित बहुजन आघाडीचे मुख्य प्रवक्ते सिद्धार्थ मोकळे म्हणाले की, भारतीय जनता पक्षाने पुन्हा सत्ता मिळविण्यासाठी अतिशय खालची पातळी गाठल्याचं या ठिकाणी दिसतंय. सर्वसामान्य कार्यकर्त्यांना निवडणूक लढवणे अशक्य केले जात आहे. पैसे वाटून जनतेला विकत घेण्याचा प्रयत्न केला जात आहे. भाजपच्या राष्ट्रीय कार्यकारिणीत असलेले विनोद तावडे यांच्यासारखे नेते पैशांसोबत हॉटेलमध्ये पकडले जातात ही लाजीरवाणी गोष्ट आहे.
20 तारखेला जनता योग्य धडा शिकवेल
एकीकडे धनदांडगे आणि जात दांडग्या पक्षांकडून पैशाचा पाऊस पाडून निवडणूक फिरवण्याचा प्रयत्न होतोय. दुसरीकडे वंचित बहुजन आघाडीचे उमेदवार घामाच्या कष्टाच्या पैशाने निवडणूक लढत आहेत. पण आमच्या उमेदवारांवर प्राणघातक हल्ले केले जात आहेत. आम्ही या धनदांडग्या पक्षांचा तीव्र निषेध व्यक्त करतो आणि आमच्या उमेदवारांवर हल्ले होत असताना हातावर हात ठेऊन बसलेल्या पोलीस प्रशासनाचाही निषेध करतो. जनता 20 तारखेला या धनदांडग्या पक्षांना योग्य धडा शिकवेल, असे त्यांनी म्हटले आहे.
विनोद तावडेंची प्रतिक्रिया
या प्रकरणावर विनोद तावडे म्हणाले की, आज नालासोपारामध्ये कार्यकर्त्यांची बैठक होती. या बैठकीत मतदानाच्या दिवशी आचारसंहितेचे नियम काय आहेत? हे सांगण्यासाठी मी इथे आलो होतो. यावेळी आमचे विरोधक हितेंद्र ठाकूर यांच्या कार्यकर्त्यांचा समज झाला की मी पैसे वाटत आहे. याबाबत निवडणूक आयोगाने नक्कीच चौकशी करावी. पोलिसांनी या प्रकरणाची चौकशी करावी, सीसीटीव्ही चेक करावे, त्यातून सत्य बाहेर येईल. मी 40 वर्षापासून भारतीय जनता पक्षात आहेत. हितेंद्र ठाकूर मला चांगले ओळखतात. सत्य सर्वांना माहिती आहे. परंतु निवडणूक आयोगाने निष्पक्षपणे या प्रकरणाची चौकशी करावी, अशी मागणी त्यांनी केली आहे.
इतर महत्त्वाच्या बातम्या
महत्त्वाच्या बातम्या
