उदयनराजे यांचा भाजप प्रवेश बारगळला, तिसऱ्या मेगाभरतीत प्रवेश नाही!

दोन दिवसांपूर्वी पुण्यात उदयनराजेंची जवळच्या कार्यकर्त्यांसोबत बैठक झाली. यात कार्यकर्त्यांनीही त्यांना भाजपमध्ये न झाल्याचा सल्ला दिला. तर दुसरीकडे उदयनराजेंनी खासदारकीचा राजीनामा न दिल्याने त्यांना पक्षात घेण्यासाठी भाजपमधले काही नेते अनुत्सुक असल्याची चर्चा होती.

मुंबई : होय-नाही करत अखेर राष्ट्रवादी काँग्रेसचे साताऱ्यातील खासदार उदयनराजे भोसले यांचा भाजप प्रवेश बारगळला आहे. आज (11 सप्टेंबर) होणाऱ्या भाजपच्या मेगाभरती 3.0 मध्ये उदयनराजेंचा प्रवेश होणार नाही, हे आता स्पष्ट झालं आहे. उदयनराजे भोसले आणि मुख्यमंत्री देवेंद्र फडणवीस यांच्यात काल (10 सप्टेंबर) 'वर्षा' बंगल्यावर दीड तास चर्चा झाली. परंतु मुख्यमंत्र्यांसमोर ठेवलेल्या मागण्या पूर्ण होत नसल्याने उदयनराजेंचा भाजप प्रवेश तूर्तास तरी लांबणीवर पडला आहे. जवळच्या कार्यकर्त्यांचा भाजपमध्ये न जाण्याचा सल्ला खासदार उदयनराजे भोसले भाजपमध्ये जाणार असल्याची चर्चा गेल्या काही दिवसांपासून रंगली होती. या पार्श्वभूमीवर राष्ट्रवादीच्या अनेक नेत्यांनी त्यांची मनधरणी करण्याचा प्रयत्न केला. परंतु उदयनराजेंनी कोणताही निर्णय जाहीर केला नव्हता. त्यानंतर दोन दिवसांपूर्वी पुण्यात उदयनराजेंची जवळच्या कार्यकर्त्यांसोबत बैठक झाली. यात कार्यकर्त्यांनीही त्यांना भाजपमध्ये न झाल्याचा सल्ला दिला. तर दुसरीकडे उदयनराजेंनी खासदारकीचा राजीनामा न दिल्याने त्यांना पक्षात घेण्यासाठी भाजपमधले काही नेते अनुत्सुक असल्याची चर्चा होती. तेव्हापासून उदयराजे भाजपमध्ये प्रवेश करणार नसल्याचं म्हटलं जात होतं. तिसरी मेगाभरती विधानसभा निवडणुकीच्या पार्श्वभूमीवर विरोधी पक्षाला लागलेली गळती कमी झालेली नाही. दोन मेगाभरतीनंतर भाजपची तिसरी मेगाभरती आज पार पडणार आहे. काँग्रेस आणि राष्ट्रवादीला रामराम ठोकलेले अनेक दिग्गज नेते आज भाजपमध्ये प्रवेश करणार आहेत. मुख्यमंत्री देवेंद्र फडणवीस, भाजप प्रदेशाध्यक्ष चंद्रकांत पाटील यांच्या उपस्थितीत आज मुंबईच्या गरवारे क्लब इथे दुपारी 3 वाजता हा प्रवेश पार पडणार आहे. राष्ट्रवादीचे नवी मुंबईतील बडे नेते, माजी मंत्री गणेश नाईक, मुंबईतील काँग्रेस नेते, माजी मंत्री कृपाशंकर सिंह यांच्यासह इंदापूरचे काँग्रेस नेते हर्षवर्धन पाटील, साताऱ्याचे काँग्रेस जिल्हाध्यक्ष आणि पृथ्वीराज चव्हाण यांचे निकटवर्तीय आनंदराव पाटील भाजपमध्ये प्रवेश करणार आहेत. दुसरी मेगाभरती काही दिवसांपूर्वीच केंद्रीय गृहमंत्री आणि भाजपचे राष्ट्रीय अध्यक्ष अमित शाह यांच्या उपस्थितीत राष्ट्रवादीचे दिग्गज नेते पद्मसिंह पाटील यांचे पुत्र आमदार राणा जगजितसिंह यांनी भाजपमध्ये प्रवेश केला. त्यांच्यासोबत राष्ट्रवादीचे माजी खासदार धनंजय महाडिक आणि काँग्रेसचे आमदार जयकुमार गोरे यांनी देखील भाजपमध्ये प्रवेश केला. पहिली मेगाभरती भाजपच्या मेगाभरतीच्या पहिल्या टप्प्यात राष्ट्रवादीचे दिग्गज नेते मधुकरराव पिचड, त्यांचे पुत्र विद्यमान आमदार वैभव पिचड, आमदार शिवेंद्रराजे भोसले, संदीप नाईक, चित्रा वाघ, काँग्रेसचे आमदार कालिदास कोळंबकर यांनी मुख्यमंत्र्यांच्या उपस्थितीत भाजपमध्ये प्रवेश केला होता. संबंधित बातम्या

• भाजपची आज तिसरी मेगाभरती, विरोधीपक्षातील 'या' दिग्गज नेत्यांचा भाजप प्रवेश होणार
• भाजपची मेगाभरती; काँग्रेस राष्ट्रवादीच्या दिग्गज नेत्यांचा भाजपमध्ये प्रवेश
• काँग्रेस नेते हर्षवर्धन पाटील उद्या भाजपमध्ये प्रवेश करणार
• राष्ट्रवादीचे नेते गणेश नाईक यांच्या भाजप प्रवेशाचा मुहूर्त ठरला, मुख्यमंत्री आणि नितीन गडकरी यांच्या उपस्थितीत भाजपप्रवेश
• एक आणि पाच सप्टेंबरला भाजपमध्ये मेगाभरती, अमित शाहांच्या उपस्थितीत 'या' दिग्गज नेत्यांच्या प्रवेशाची चर्चा
• आमची मेगाभरती नाही लिमिटेड भरती : मुख्यमंत्री