Sanjay Jadhav : परभणीत काँग्रेससोबत राहील, संजय जाधव यांना विश्वास, अजित पवारांच्या एका फोन कॉलचा संदर्भ देखील सांगितला
Parbhani : खासदार संजय जाधव यांनी परभणी महापालिका निवडणुकीत काँग्रेस सोबत राहील, असा विश्वास व्यक्त केला आहे. काँग्रेससोबत निवडणूकपूर्व आघाडी केल्याचं देखील ते म्हणाले.
परभणी : चंद्रपूर महानगरपालिका निवडणुकीमध्ये काय झालं याचा परिणाम परभणी महानगरपालिका महापौर आणि उपमहापौर निवडीमध्ये होणार नाही, असं परभणीचे शिवसेना उद्धव बाळासाहेब ठाकरे पक्षाचे खासदार संजय जाधव यांनी म्हटलं आहे. काँग्रेससोबत आमची अगोदरच युती होती आणि आताही युती कायम आहे. आम्हाला कुठलिही अडचण महापौर करण्यामध्ये येणार नसल्याचं खासदार संजय जाधव यांनी म्हटलं आहे. अजित पवार यांचा अपघात होण्यापूर्वी 25 तारखेला त्यांचा मला फोन आला होता, असंही संजय जाधव म्हणाले.
संजय जाधव अजित पवार यांच्यासोबत झालेली चर्चा सांगताना म्हणाले की, मी त्यांनाही सांगितलं होतं की आम्हाला एकटे तुमच्यासोबत जाता येणार नाही, आपण काँग्रेस शिवसेना आणि राष्ट्रवादी आपण तिघे एकत्र बसू, मात्र त्यानंतर दुर्घटना घडली. परंतु, त्यांची राष्ट्रवादी देखील आमच्या सोबत येऊ शकतात, अशी माहिती खासदार संजय जाधव यांनी दिली आहे.
चंद्रपूरचा परिणाम परभणीत होणार?
चंद्रपूरमध्ये काँग्रेस आणि ठाकरेंची शिवसेना एकत्र येण्याऐवजी ठाकरेंच्या शिवसेनेनं भाजपबरोबर जाण्याचा निर्णय घेतला. चंद्रपूरमध्ये भाजपचा महापौर झाला त्यामुळे आता परभणीत काय होणार याकडे सर्वांचे लक्ष लागले आहे. परभणीत ठाकरेंच्या शिवसेनेला महापौर करण्यासाठी काँग्रेसची आवश्यकता आहे. याबाबत काँग्रेसच्या स्थानिक नेत्यांना विचारले असता त्यांनी पक्ष श्रेष्ठींकडून काय आदेश येतो, त्यानंतर पाहू असे सांगितलं आहे. ठाकरेंच्या शिवसेनेचे आमदार डॉ. राहुल पाटील यांनी शिवसेना आणि काँग्रेस एकसंध आहे. परभणीत चंद्रपूरचा कुठलाही परिणाम होणार नसल्याचे सांगितले आहे.
परभणी शहर महानगर पालिका महापौर आणि उपमहापौर पदाची निवडणूक परवा म्हणजेच 12 फेब्रुवारी रोजी होणार आहे तत्पूर्वी कुठलाही दगाफटका बसू नये म्हणून शिवसेना उद्धव बाळासाहेब ठाकरे यांचे 25 आणि काँग्रेसचे 12 नगरसेवक हे सहलीवर गेले आहेत. दोन्ही पक्षांचे नगरसेवक मतदानाच्या दिवशी परभणीत दाखल होणार असल्याची माहिती आहे.
दरम्यान, चंद्रपूरमध्ये घडलेल्या प्रकरणानंतर काँग्रेस प्रदेशाध्यक्ष हर्षवर्धन सपकाळ यांनी आम्ही देखील परभणीत आमच्या सोयीची भूमिका घ्यायची का असा सवाल विचारला आहे. आता परभणीत काय घडणार हे पाहावं लागणार आहे. परभणी महापालिकेची सदस्यसंख्या 65 असून बहुमताचा आकडा 33 इतका आहे. आता परभणीत कोणाचा महापौर होणार याकडे सर्वांचं लक्ष लागलं आहे.
परभणी महापालिकेतील संख्याबळ: एकूण जागा 65
शिवसेना उद्धव बाळासाहेब ठाकरे : 25
काँग्रेस :12
भाजप :12
राष्ट्रवादी काँग्रेस :11
जनसुराज्य शक्ती :3
यशवंत सेना :1
इतर : 1
Before You Go
Vijay Thalapathy : तामिळनाडूनत काँग्रेस का हाथ अभिनेता विजय के साथ
महत्त्वाच्या बातम्या
