मतदान संपताच संभाजीराजेंच्या उमेदवारास अटक, भाजपसोबतचा वाद भोवला; 307 चा गंभीर गुन्हा दाखल

कोपरखैरणे येथे भाजप कार्यकर्त्याला मारहाण केल्याप्रकरणी अंकूश कदम यांच्यावर 307 अंतर्गत गुन्हा दाखल झाला आहे.

sambhajiraje candidate arrest airoli vidhansabha

Source : Abp

नवी मुंबई : राज्यातील विधानसभा निवडणुकांसाठी आज मतदान प्रकिया पार पडली. त्यानुसार, राज्यभरात सायंकाळी 5 वाजेपर्यंत 58.22 टक्के मतदान झाले होते, त्यामुळे राज्यात एकूण अंदाजे 60 टक्क्यांपर्यंत मतदान झाल्याची माहिती आहे. बीडसह काही जिल्ह्यातील वादाच्या घटना वगळता राज्यात शांततेत आणि उत्साहात मतदान पार पडले. मात्र, मंत्री धनंजय मुंडेंच्या परळी मतदारसंघात काही ठिकाणी राडा झाल्याच्या घटना समोर आल्या आहेत. याशिवाय आता ऐरोली (Airoli) विधानसभा मतदारसंघातही माजी खासदार व स्वराज्य पक्षाचे संस्थापक संभाजीराजेंच्या स्वराज्य पक्षाचे उमेदवार आणि भाजप (BJP) भाजपमध्ये जुंपल्याचं पाहायला मिळालं. विशेष म्हणजे याप्रकरणी ऐरोली विधानसभा मतदारसंघाचे उमेदवार अंकूश कदम यांच्यावर 307 सारखा गंभीर गुन्हा दाखल करण्यात आला असून त्यांना अटकही करण्यात आली आहे. 

कोपरखैरणे येथे भाजप कार्यकर्त्याला मारहाण केल्याप्रकरणी अंकूश कदम यांच्यावर 307 अंतर्गत गुन्हा दाखल झाला आहे. अंकुश कदम यांच्यासह 30 ते 35 कार्यकर्त्यावर गुन्हा दाखल करण्यात आल्याने येथील मतदारसंघात वातावरण तणावाचं बनलं आहे. ऐरोली विधानसभा मतदारसंघात यंदा चौरंगी लढत होत असून भाजप महायुतीकडून गणेश नाईक हे उमेदवार आहेत. तर, शिवसेना ठाकरे गटाकडून एम.के.मढवी यांना मैदानात उतरवण्यात आलं आहे. विजय चौगुले हे अपक्ष उमेदवार असून परिवर्तन महाशक्ती या तिसऱ्या आघाडीमधील स्वराज्य पक्षाचे उमेदवार अंकुश कदम हे आहेत. मात्र, येथील मतदारसंघात राडा झाल्यानंतर अंकुश कदम यांच्यावर गुन्हा दाखल करण्यात आला असून त्यांना अटक झाली आहे. भाजप कार्यकर्त्यासोबत झालेल्या मारहाणीतून हा गुन्हा दाखल झाला आहे.  

ऐरोली विधानसभा मतदारसंघातील लढती

गणेश नाईक - भाजप
एम.के.मढवी - शिवसेना ठाकरे
विजय चौगुले - अपक्ष
अंकुश कदम - महाराष्ट्र स्वराज्य पक्ष

मतदारसंघाचा इतिहास

ऐरोली विधानसभा मतदारसंघातून 2009 आणि 2014 मध्ये संदीप गणेश नाईक यांना जनतेने विजयी केलं होतं. दोन्ही वेळा संदीप नाईक हे राष्ट्रवादी काँग्रेसच्या तिकीटावर निवडून आले होते. संदीप नाईक यांनी शिवसेना उमेदवार विजय चौघुले यांचा पराभव केला होता. पण, 2019 च्या निवडणुकीत या मतदारसंघात भाजपने बाजी मारली होती. भाजपचे उमेदवार गणेश नाईक यांनी राष्ट्रवादीच्या उमेदवाराचा पराभव केला होता. 

मतदारसंघा कसा आहे?

ऐरोली मतदारसंघ ठाणे जिल्ह्यात येतो. कळवा आणि ठाणे जवळच्या असलेल्या या मतदारसंघात दलित, मुस्लिम, पाटील आणि यादव या मतदारवर्ग मोठा आहे. 2019च्या आकडेवारीनुसार, ऐरोली मतदारसंघात एकूण 4 लाख 47 हजार 697 मतदार आहेत. यातील 42 हजार 531 दलित, 26 हजार 861 मुस्लिम, 17 हजाराहून अधिक पाटील आणि साडेबारा हजार यादव मतदार आहेत. त्याशिवाय 9 हजाराच्या आसपास राजपूत आणि 8 हजाराच्या जवळपास आदिवासी मतदार आहेत.