दारू प्यायची इच्छा झाली तर भाजपवाल्यांनी पाठवलेली दारू प्या, पण मत काँग्रेसलाच द्या; काँग्रेसच्या बंटी शेळकेंचे वादग्रस्त वक्तव्य
Central Nagpur Assembly Constituency : भाजपवाले भ्रष्टाचाराच्या पैशाने निवडणूक लढवत आहेत, त्यांनी पैसे दिले तर घ्या पण मत काँग्रेसलाच द्या असं वक्तव्य काँग्रेसचे नागपूर मध्यचे उमेदवार बंटी शेळके यांनी केलं.
नागपूर : जर तुमची दारू प्यायची इच्छा झाली तर भाजपवाल्यांनी तुमच्या घरी पाठवलेली दारू घ्या, मात्र मत काँग्रेसला द्या असा वादग्रस्त सल्ला नागपूर मध्यचे काँग्रेस उमेदवार ऋषीकेश उर्फ बंटी शेळके यांनी केलं. नागपुरात शेकडो मतदारांच्या उपस्थितीत काँग्रेस उमेदवाराने असा वादग्रस्त सल्ला दिला आहे. त्यावर आता भाजपकडून काय प्रतिक्रिया येते ते पाहावं लागेल.
रविवारी मध्य नागपूर विधानसभा क्षेत्रात बंटी शेळके यांच्यासाठी प्रियंका गांधी यांनी रोड शो केले. प्रियंका गांधी त्या ठिकाणी पोहोचण्यापूर्वी बंटी शेळके यांनी रोड शोसाठी आलेल्या शेकडो काँग्रेस कार्यकर्ते आणि मतदारांसमोर भाषण केले. त्यावेळी बोलताना बंटी शेळके म्हणाले की, भाजप पक्ष भ्रष्टाचाराचे पैशातून ही निवडणूक लढवत आहे. त्यांच्याकडे खूप पैसा आहे. त्यामुळे ते तुमच्या घरी आमिष म्हणून दारू घेऊन आले आणि तुमची ती पिण्याची इच्छा झाली, तर ती दारू तुम्ही घेऊन घ्या. जर भाजपवाले त्यांच्या भ्रष्टाचाराचा पैसा घेऊन तुमच्या घरी आले, तर तुम्ही तेही ठेऊन घ्या. मात्र मत काँग्रेसला द्या.
माझ्याकडे लोकांना वाटण्यासाठी पैसा नाही. मी दुचाकीवर फिरणारा नेता आहे आणि भविष्यातही दुचाकीवालाच राहीन असं ही बंटी शेळके या भाषणात म्हणाले.
काँग्रेसचे उमेदवार बंटी शेळके काय म्हणाले?
मी दारू पीत नाही. दारू पिणे चुकीचे आहे. लिव्हर खराब होते.मात्र भाजपवाले पैशाच्या जोरावर निवडणूक लढवत आहेत. पाचशे कोटींची निवडणूक ते लढवत आहेत. ते मतदारांना सोन्याचे दागिने देत आहेत. भाजपवाले तुमच्या घरी दारू देण्यासाठी आले आणि जर तुमची दारू प्यायची इच्छा झाली तर तुम्ही ती दारू घ्या. मात्र, त्यानंतरही मत काँग्रेसला द्या.
मी तर पैसा वाटू शकत नाही. मात्र त्यांच्याकडे भ्रष्ट मार्गाचा खूप पैसा आहे. जर तुमची इच्छा त्यांच्याकडून तो पैसा घेण्याची झाली तर तेही घेऊन घ्या. मात्र मत काँग्रेसला द्या. जनशक्ती विरुद्ध धनशक्ती अशी ही लढाई आहे. आमच्याकडे पैसा नाही. माझं घर आजही कच्चं आहे. माझ्याकडे दुचाकी आहे. नगरसेवक असूनही माझ्याकडे दुचाकीच राहिली आहे. मी आजही दुचाकीवर आहे आणि उद्याही दुचाकी वरच राहणार.
ही बातमी वाचा:
महत्त्वाच्या बातम्या
ट्रेंडिंग न्यूज
