Gram Panchayat Elections 2023 LIVE Updates: ग्रामपंचायत निवडणुकांची रणधुमाळी, बारामतीत अजितदादांच्या पॅनलविरोधात भाजपचं पॅनल, तर नागपूर, ठाणे, बीडमध्ये दिग्गजांची प्रतिष्ठा पणाला
Gram Panchayat Elections 2023 LIVE: राज्यात आज ग्रामपंचायत निवडणुकांची रणधुमाळी 2 हजार 369 ग्रामपंचायतीत मतदान, 130 सरपंचांच्या रिक्तपदांच्या पोटनिवडणुकीसाठीही मतदान
Wardha Gram Panchayat Elections 2023 : मतदारांना आमिष दाखविण्याकरीता उमेदवार मोठ्या प्रमाणत दारूचा उपयोग करतात. मात्र, पोलिसांच्या सतर्कतेमुळे उमेदवाराच्या आशा धुळीस मिळाल्याचे चित्र दिसत आहे. समुद्रपुर पोलिसांनी कारसह तब्बल दहा लाख रुपयांचा दारूसाठा जप्त केला आहे. तर, दुसऱ्या कारवाईत सरपंच पदासाठी उभ्या असलेल्या उमेदवाराकडून दारूसाठा जप्त करीत त्याला अटक केली आहे.
पोलीस पेट्रोलिंग दरम्यान जाम चौकमध्ये कारमध्ये दारुसाठा येत असल्याची माहिती मिळताच सदर कार चौकात तपासली. यात कारमध्ये 38 पेट्या देशी दारू आणि 3 पेटी विदेशी दारू आढळून आली. पोलिसांनी कार आणि दारूसाठ्यासह दहा लाख रुपयांचा मुद्देमाल जप्त केला आणि आरोपी कार चालक अजय हजारे यास ताब्यात घेतले. तर या गुन्ह्यामध्ये आरोपी नामे प्रशांत उर्फ बंडू आंबटकर, वैभव बारसकर आणि चंद्रपूर येथील मॉडर्न वाईन शॉप धारक यांना आरोपी करण्यात आले आहे. तर, दुसऱ्या कारवाईमध्ये समुद्रपूर तालुक्यातील निभा येथे वाघेडा ग्रामपंचायतीमध्ये सरपंच पदासाठी उमेदवार असलेला विकी दिवाकर मसराम आणि त्याचा साथीदार शुभम हेमराज ठवरे यांना ताब्यात घेऊन त्यांच्याकडून दुचाकीसह 88 हजारांचा दारूसाठा जप्त केला आहे.
Beed Gram Panchayat Elections 2023 : बीड जिल्ह्यामध्ये आज 186 पैकी 158 ग्रामपंचायतीसाठी मतदानाला सुरुवात झाली आहे. मात्र, या पैकी 18 ग्रामपंचायतीमध्ये एकही उमेदवारी अर्ज न भरण्याचा निर्णय गावकऱ्यांनी घेतला. त्यामुळे आज या गावात सगळीकडे शुकशुकाट पाहायला मिळतोय. खरंतर ग्रामपंचायतीची निवडणूक ही छोट्यातल्या छोट्या गावासाठी सुद्धा फार प्रतिष्ठेची असते आणि म्हणून ग्रामपंचायत निवडणुकीची लगबग बीड जिल्ह्यामध्ये दीडशेपेक्षा जास्त गावांमध्ये पाहायला मिळते. मात्र, ज्या गावांनी आरक्षण वेळेपर्यंत निवडणुकीवर बहिष्कार टाकण्याचा निर्णय घेतला त्या गावांमध्ये मात्र आज कुठेही गडबड गोंधळ पाहायला मिळाला नाही.
Latur Gram Panchayat Elections 2023 : लातूर जिल्ह्यातील 13 ग्रामपंचायत सार्वत्रिक निवडणुका आज होत आहेत. त्यापैकी एक ग्रामपंचायत बिनविरोध निघाली आहे. तसेच, सहा ग्रामपंचायतीत पोट निवडणूकही आजच आहे. यासाठी प्रशासनाने मोठ्या प्रमाणावर बंदोबस्त तैनात केलेला आहे. मतदान प्रक्रिया शांततेत पार पाडण्यासाठी सर्व यंत्रणा उभी करण्यात आली आहे. जिल्ह्यातील 13 ग्रामपंचायतीसाठी 292 उमेदवार हे नशीब आजमावत आहेत. 13 सरपंच पदाच्या जागेसाठी 44 उमेदवार रिंगणात आहेत.
Wardha Gram Panchayat Elections 2023 : वर्ध्याच्या 29 ग्रामपंचायतीच्या सार्वत्रिक निवडणुकीत सकाळी साडेनऊ वाजेपर्यंत 13 टक्के मतदान झाले. 33 ग्रामपंचायतीच्या पोटनिवडणुकीत 11. 20 टक्के मतदान पार पडले. 94 मतदान केंद्रावरून 22 हजार 850 मतदार मतदानाचा हक्क बजावणार आहेत. सरपंच पदासाठी 77 तर सदस्य पदासाठी 417 उमेदवार रिंगणात उतरले आहेत.
Dhule Gram Panchayat Elections 2023 : शिंदखेडा तालुक्यातील मांडळ या ठिकाणी दोन गटात वाद झाला. मतदाराच्या चिठ्ठीवर उमेदवाराचे चिन्ह असल्याने दुसऱ्या गटातील उमेदवार आणि कार्यकर्त्यांनी आक्षेप घेतल्याने दोन गट समोरासमोर आले होते. यावेळी कार्यकर्त्यांमध्ये वाद झाला होता, मात्र पोलिसांनी वेळीच हस्तक्षेप केल्याने वाद मिटला असून शांततेत मतदान सुरू आहे.
Amravati Gram Panchayat Elections 2023 : मतदान केंद्राच्या कक्षामध्ये उमेदवारांच्या प्रतिनिधींवरून दोन गटांत बाचाबाची झाली. अखेर पोलिसांनी दोन्ही गटाच्या कार्यकर्त्यांना बाहेर काढले. मतदान केंद्राबाहेर नागरिकांची मोठी गर्दी दिसून आली. पोलिसांनी दोन्ही गटाच्या कार्यकर्त्यांना 100 मीटरच्या आतमध्ये येण्यास मज्जाव केला.
Chik Mahud Gram Panchayat Election Live Update : अतिशय चुरशीची निवडणूक येथे होत असून आमदार शहाजी बापू पाटील यांची भावकी विरुद्ध सासुरवाडी अशी लढत येथे असून बापू आपल्या सासुरवाडीच्या बाजूने महायुतीमधून उमेदवार उभे केले आहेत. तर शहाजी बापू यांचा नातू आणि ठाकरे युवा सेनेचे तालुका अध्यक्ष सुभाष भोसले यांनी आपल्या पत्नीला शहाजू बापू यांच्या पाहुण्यांसमोर उभे केले आहे. या निवडणुकीत वारेमाप पैसा आमदार गटाने खर्च केल्याचा आरोप विरोधक करीत आहेत. चिक महूद येथे 6 हजार मतदान असून उद्या मतमोजणीत गुलाल आमचाच असा दावा दोन्ही गट करत आहेत.
Jalgaon Gram Panchayat Elections 2023 : राज्याचे पाणी पुरवठा मंत्री आणि जळगाव जिल्ह्याचे पालक मंत्ती गुलाबराव पाटील यांनी त्यांच्या मतदार संघात असलेल्या धरणगाव तालुक्यातील पाळधी बुद्रुक गावात मतदान केले आहे.
गुलाबराव पाटील यांनी प्रतिक्रिया देताना म्हटलं आहे की, पडणारा ही माझा आणि निवडून येणाराही माझा आहे, मी सगळ्यांच्या बाजूने आहे. मतदानाचा हक्क बजावणे हे लोकशाहीत आपले कर्तव्य असल्याने आपण मतदान केले आहे अशी प्रतिक्रिया मंत्री गुलाबराव पाटील यांनी दिली आहे.
Parbhani Gram Panchayat Elections 2023 : राज्यात आज ग्रामपंचायत निवडणुकीची रणधुमाळी सुरुय परभणी जिल्ह्यात तीन ग्रामपंचायतीवर सार्वत्रिक, तर 8 ठिकाणी पोटनिवडणूक पार पडत आहे. सकाळपासूनच मतदारांनी आपला मतदानाचा हक्क बजावण्यास सुरुवात केली आहे. गंगाखेड तालुक्यातील ईळेगाव जिंतूरच्या लिंबाळा तर सेलूमधील हिस्सी येथे सार्वत्रिक निवडणूक होत आहे. तर, जिल्ह्यातील विविध तालुक्यामधील 8 ग्रामपंचायतीत एक एका जागेसाठी पोटनिवडणूक होत आहे. सकाळच्या सत्रात मतदार मतदानासाठी फारसे उत्सुक दिसून आले नाहीत. सर्वत्र संथ गतीने मतदानाला सुरुवात झाली आहे. मतदाना दरम्यान कुठलाही अनुचित प्रकार घडू नये यासाठी सर्वच ठिकाणी चोख पोलीस बंदोबस्त तैनात करण्यात आला आहे.
Sindhudurg Gram Panchayat Elections 2023 : सिंधुदुर्ग जिल्ह्यात आज 24 ग्रामपंचायतींच्या आणि 52 ग्रामपंचायतींच्या पोटनिवडणुकासाठी मतदान होत आहेत. एकूण 24 ग्रामपंचायतींपैकी दोडामार्ग कुडासे खुर्द ही ग्रामपंचायत बिनविरोध झाल्याने 23 ग्रामपंचायतसाठी आज मतदान होत आहे. तर 52 ग्रामपंचायत सदस्य पदासाठी पोट निवडणुकीसाठी मतदान होत असून त्यापैकी 14 बिनविरोध तर 5 सदस्य पदासाठी मतदान पार पडणार आहे. तर 33 सदस्य पदासाठी अर्ज प्राप्त झाले नाहीत. जिल्ह्यातील 24 ग्रामपंचायतींच्या सार्वत्रिक निवडणुकीसाठी सकाळी 7.30 सायंकाळी 5.30 या वेळेत मतदान प्रक्रिया सुरू झाली आहे. एकूण 24 सरपंचपदांसाठी 64 तर 76 सदस्यपदांसाठी 342 उमेदवार रिंगणात आहेत. महायुती विरुद्ध महाविकास आघाडी अशी लढत होत आहे. निवडणूक शांततेत पार पडण्यासाठी पोलीस बंदोबस्त तैनात करण्यात आला आहे. जिल्ह्यातील देवगड 9, मालवण 1, कणकवली 2, कुडाळ 5, वेंगुर्ले 4, दोडामार्ग 3 अशा 24ं ग्रामपंचायतींच्या सार्वत्रिक निवडणुका जाहीर झाल्या आहेत. जिल्ह्यातील बहुसंख्य ग्रामपंचायतीवर आपलाच झेंडा फडकेल अशी महायुती आणि महाविकास आघाडी दोघांनाही आशा आहे. विकास हा अजेंडा ठेवून आणि सरकारने केलेल्या कामाचा फायदा आम्हाला ग्रामपंचायत निवडणुकीत होईल अशी आशा निलेश राणेंना आहे. तर, निलेश राणे ज्या ज्या ठिकाणी प्रचाराला गेले त्या ठिकाणी आमच्या जागा निवडून येतील अशी खात्री खासदार विनायक राऊत यांना आहे. त्यामुळे सिंधुदुर्गात 24 ग्रामपंचायतींच्या निवडणुकावर महायुती आणि महाविकास आघाडी दोघांचाही लक्ष लागलं आहे.
Nashik Grampanchayat : नाशिक जिल्ह्यातील 48 ग्रामपंचायतीसाठी आज सकाळी आठ वाजेपासून मतदान प्रक्रिया सुरु झाली आहे. आज सकाळी नाशिक तालुक्यातील जलालपूर या ग्रामपंचायतीसाठी 85 वर्षीय लक्ष्मी जाधव या आजीबाईने देखील मतदानाचा हक्क बजावला.
Ahmednagar Gram Panchayat Election Live Update : देशात प्रथमच शेतकरी संपावर गेला तो अहमदनगर जिल्ह्यातील पुणतांबा गावातून. शेतकरी संपाची मशाल पेटविणाऱ्या पुणतांबा ग्रामपंचायत निवडणुकीत सरपंचपद महिला अनुसूचित जमाती प्रवर्गासाठी राखीव असून यावेळी सरपंचपदासह 9 महिला ग्रामपंचायतमध्ये जाणार आहे. या निवडणुकीत 33 महिला निवडणूक रिंगणात असून पाण्याचा महत्वाचा प्रश्न सोडविण्यासाठी प्राधान्य देण्यासाठी आम्ही निवडणूक लढवत असल्याचं महिला उमेदवारांनी स्पष्ट केलंय.
Sangli Gram Panchayat Elections 2023 : सांगली जिल्ह्यातील 84 ग्रामपंचायती आणि 81 सरपंच पदासाठी निवडणुका पार पडत असून प्रत्यक्ष मतदानाला सुरुवात झाली आहे. अत्यंत चुरशीने या निवडणुकीसाठी प्रचार पार पडला, त्यामुळे आता मतदानासाठी मतदारांमध्येही उत्साह पाहायला मिळत आहे. अनेक मतदान केंद्रांवर मतदारांच्या सकाळपासूनच रांगा लागल्याचं पाहायला मिळत आहे. 84 ग्रामपंचायतीच्या 681 जागांसाठी 1 हजार 533 उमेदवार तर 81 सरपंच पदासाठी 222 उमेदवार रिंगणात आहेत. एक लाख 87 हजार 798 मतदार मतदानाचा हक्क बजावणार आहेत. यासाठी जिल्ह्यामध्ये 365 मतदान केंद्र नियुक्त करण्यात आले असून मतदान प्रक्रियेसाठी 1 हजार 85 बॅलेट मशीन उपलब्ध करण्यात आले आहेत. तर या मतदान प्रक्रियेसाठी 2 हजार 434 कर्मचारी नियुक्त करण्यात आले आहेत. 94 ग्रामपंचायती पैकी 11 ग्रामपंचायती आणि 13 सरपंच बिनविरोध निवड झाले आहेत. आज पार पडत असलेल्या या मतदानासाठी जिल्ह्यामध्ये मोठा पोलीस बंदोबस्त देखील तैनात करण्यात आला आहे.
Washim Gram Panchayat Election Live Update : वाशिम जिल्ह्यातील दोन ग्रामपंचायतीच्या निवडणुका पार पडत आहेत. कारंजा तालुक्यातील कामठवाडा आणि मंगरुळपिर तालुक्यातील पोटी या दोन ग्रामपंचायतीच्या सदस्य पदासह सरपंच आज निवडणूक प्रक्रिया आज सकाळी साडे सात पासून सुरू झालीय. दोन्ही ग्रामपंचायतवर सत्ता असलेल्या राष्ट्रवादी काँग्रेस पुन्हा बाजी मारणार का बदल होणार? हे पाहणं महत्वाचं असणार आहे.
Wardha Gram Panchayat Elections 2023 : वर्ध्यात ग्रामपंचायत निवडणुकीच्या प्रत्यक्ष मतदानाला सुरुवात झाली आहे. वर्ध्याच्या 6 तालुक्यांतील 29 ग्रामपंचायतींच्या सार्वत्रिक निवडणुका तर 33 ग्रामपंचायतीमध्ये पोटनिवडणुका होत आहेत.
एकूण 94 मतदान केंद्रांवर मतदान होत आहे. यावेळी 22 हजार 850 मतदार मतदानाचा हक्क बजावणार आहेत. पोटनिवडणुकीत उमेदवारांमध्ये उत्साह नसल्यामुळे अनेक ठिकाणी सदस्य बिनविरोध निवडून आले आहेत. मात्र, ज्या ग्रामपंचायतींच्या सार्वत्रिक निवडणुका होत आहेत, तेथे चुरस निर्माण झाली आहे. भाजप - काँग्रेस - राष्ट्रवादी काँग्रेस अशी बहुतांश ग्रामपंचायतमध्ये लढत असल्याने वातवरण चांगलेच तापले आहे. जिल्ह्यातील 6 तालुक्यातील ग्रामपंचायतींच्या सार्वत्रिक निवडणुका होत आहेत. सरपंचपदासाठी 77 तर सदस्यांसाठी 417 उमेदवार रिंगणात आहेत.
Nashik Gram Panchayat Elections 2023 : ग्रामपंचायत निवडणुकीसाठी मतदान सुरु झालं आहे. कळवण, देवळा, मालेगाव, सटाणा येवला या तालुक्यातील 19 ग्रामपंचायतीसाठी मतदानाला सुरुवात झाली आहे. मेशी येथे मतदारांच्या लांबच लांब रांगा लागल्या आहेत. प्रस्थापितांविरोधात नवोदितांनी या ग्रामपंचायत निवडणुकीत दंड थोपटलेले आहे. या दरम्यान मतदारांचा उत्साह पाहायला मिळतोय.
Bhandara Gram Panchayat Elections 2023 : भंडारा जिल्ह्यात होत असलेल्या 64 ग्रामपंचायतीच्या सार्वत्रिक निवडणूकीच्या मतदानाला सुरुवात झालेली आहे. सरपंच पदासाठी 160 तर सदस्यपदाकरिता 1123 असे एकूण 1,283 उमेदवार निवडणूक मैदानात आहेत. तर 91,259 मतदार मतदान हक्क बजावणार आहेत. काँग्रेस प्रदेशाध्यक्ष नाना पटोले, राष्ट्रवादीचे नेते खासदार प्रफुल्ल पटेल, आमदार राजू कारेमोरे, भारत राष्ट्र समितीचे चरण वाघमारे यांची या निवडणुकीत प्रतिष्ठा पणाला लागलेली आहे.
Gadchiroli Gram Panchayat Elections 2023 : गडचिरोली जिल्ह्यातील 23 ग्रामपंचायतीमध्ये सार्वत्रिक निवडणुका होत आहेत. सरपंचपदासाठी 82 उमेदवार, तर सदस्यपदासाठी 452 उमेदवार मिळून 534 उमेदवार निवडणुकीच्या रिंगणात आहेत. सार्वत्रिक निवडणुकीसाठी 7 तालुक्यांमध्ये 37 ग्रामपंचायतींमध्ये निवडणूक कार्यक्रम लावला होता. त्यापैकी गडचिरोली तालुक्यातील देवापूर ग्रामपंचायतमध्ये सर्व उमेदवार अविरोध निवडले गेले, तर 13 ग्रामपंचायतींमध्ये कोणीच उमेदवारी दाखल केली नाही. त्यामुळे 23 ग्रामपंचायतींमध्येच सार्वत्रिक निवडणुकीसाठी प्रत्यक्षात आज मतदान होत आहे. त्यात कोरची तालुक्यातील 6, धानोरा तालुक्यातील 5, एटापल्ली तालुक्यातील 3, भामरागड तालुक्यातील 6, अहेरी तालुक्यातील 2 आणि सिरोंचा तालुक्यातील 1 ग्रामपंचायतींचा समावेश आहे. सकाळी 7.30 वाजतापासून दुपारी 3 वाजेपर्यंत मतदानाची वेळ आहे. मतमोजणी मंगळवार 7 रोजी होणार आहे.
Ahmednagar Gram Panchayat Election Live Update : अहमदनगर जिल्ह्यातील 194 ग्रामपंचायत निवडणूक जाहीर झाल्यानंतर आज 178 ग्रामपंचायतींसाठी मतदान प्रक्रियेला सुरुवात झाली आहे. अहमदनगर जिल्ह्यातील ज्येष्ठ नेत्यांची प्रतिष्ठा या निवडणुकीत पणाला लागली असून शेतकरी संपाची हाक देणाऱ्या पुणतांबा गावात सुद्धा ग्रामपंचायत निवडणुकीसाठी मतदान प्रक्रिया सुरू झाली आहे. मतदानासाठी महिलांनी मोठा सहभाग घेतला असल्याचं चित्र दिसून येत असून पुणतांबा ग्रामपंचायतसाठी भाजपचे राधाकृष्ण विखे पाटील, भाजपचे विवेक कोल्हे आणि राष्ट्रवादीचे आमदार आशुतोष काळे या तीन नेत्यांची प्रतिष्ठा पणाला लागली आहे. पुणतांबा ग्रामपंचायत सरपंच निवडणूक पदासाठी उद्धव ठाकरे शिवसेना गटाचाही उमेदवार उभा असल्याने या चौरंगी लढतीत मतदार नेमकं कोणाला कौल देतील हे पाहणं महत्त्वाचं आहे.
Dhule Gram Panchayat Elections 2023: धुळे जिल्ह्यातील 31 ग्रामपंचायतींसाठी निवडणुकीचा कार्यक्रम जाहीर झाला होता यापैकी पाच ग्रामपंचायती या बिनविरोध झाल्या असून उर्वरित 26 ग्रामपंचायतींसाठी आज मतदानाची प्रक्रिया पार पडत आहे. 31 पैकी 5 ग्रामपंचायती बिनविरोध झाल्या असून साक्री तालुक्यातील एक ग्रामपंचायत काँग्रेसकडे गेली असून शिरपूर तालुक्यातील दोन आणि शिंदखेडा तालुक्यातील दोन ग्रामपंचायती या भाजपकडे गेल्या आहेत. यात साक्री तालुक्यातील डांगरशिरवाडे ही काँग्रेसकडे. शिरपूर तालुक्यातील बभलाज आणि गिधाडे या 2 भाजपकडे गेल्या आहेत. आणि शिंदखेडा तालुक्यातील अंजनविहिरे आणि पथारे ह्या ग्रामपंचायत भाजपकडे गेल्या आहेत. जिल्ह्यातील तीनही तालुक्यांमध्ये भाजपा विरुद्ध महाविकास आघाडी ही लढत रंगली आहे. धुळे जिल्ह्यातील ग्रामपंचायतच्या निवडणुकीसाठी मतदानाची प्रक्रिया सुरू झाली.
Pune Gram Panchayat Election LIVE: पुणे जिल्ह्याच्या जुन्नर तालुक्यातील नारायणगावमध्ये ग्रामपंचायत निवडणुकीत धक्कादायक प्रकार पाहायला मिळाला असून चक्क ग्रामपंचायत निवडणुकीच्या उमेदवारांच्या फोटोला काळी बाहुली लिंबू टाचण्या टोचून जादूटोना केल्याचा धक्कादायक प्रकार समोर आला आहे,चक्क ग्रामपंचायत निवडणुकीत जादूटोण्याचा वापर केल्याने याबाबत नागरिकांकडून चिड व्यक्त केली जात असून नारायणगाव च्या ग्रामपंचायत निवडणूक सध्या सुरू असून उद्या या ठिकाणी मतदान होणार,वार्ड क्रमांक चारमधील मुक्ताई हनुमान ग्रामविकास परिवर्तन पॅनलच्या उमेदवारांच्या फोटोला अशाप्रकारे काळी बाहुली लिंबू आणि टाचण्या टोचल्याचा अंधश्रद्धेचा प्रकार समोर आला असून याबाबत नारायणगाव पोलीस स्टेशन मध्ये उमेदवारांकडून तक्रार दाखल करण्यात आली असून पोलीस याबाबत काय कारवाई करतात हे पाहणं आता महत्त्वाचं असणार आहे.
Katewadi Gram Panchayat Elections 2023 LIVE Updates: अजित पवार (Ajit Pawar) भाजपसोबत (BJP) सत्तेत गेले असले तरी बारामतीत मात्र भाजप आणि अजित पवार यांच्यात जमत नसल्याचं चित्र पाहायला मिळत आहे. त्याचं कारण आहे, बारामती तालुक्यातील काटेवाडी ग्रामपंचायत निवडणुकीमध्ये अजित पवार गटाच्या पॅनल पुढे भाजपाचा पॅनल उभा ठाकला आहे. तर इंदापूरमध्ये हर्षवर्धन पाटील यांच्या बावडा गावात देखील भाजप विरुद्ध अजित पवार गट अशी लढत होणार आहे. बारामती तालुक्यातल्या 31 ग्रामपंचायत, इंदापूर तालुक्यातील 6, दौंड तालुक्यातील 9 तर पुरंदर तालुक्यातील 12 ग्रामपंचायत साठी आज मतदान पार पडत आहे.
Thane Gram Panchayat Elections LIVE Updates: मुख्यमंत्री एकनाथ शिंदे यांच्या ठाणे जिल्ह्यात 61 सार्वत्रिक ग्रामपंचायत तर 7 रिक्त झालेल्या ग्रामपंचायतच्या जागांसाठी मतदान प्रक्रियेला सुरुवात
68 ग्रामपंचायतीत 13 ग्रामपंचायती या बिनविरोध झाल्या असून सात ग्रामपंचायत विविध कारणामुळे निवडणुका होणार नसून उर्वरित 48 ग्रामपंचायत साठी मतदान प्रक्रियेला सुरुवात
48 ग्रामपंचायतीसाठी थेट 135 उमेदवार रिंगणात असून सदस्यांसाठी 1279 उमेदवार निवडणुकीच्या रिंगणात उभे आहेत
सर्वच ग्रामपंचायत मतदानासाठी प्रशासन सज्ज झाले असून कुठलाही अनुचित प्रकार घडू नये यासाठी पोलीस देखील सज्ज झालेले आहेत
शहापूर मधील वासिम ग्रामपंचायत मध्येही सकाळपासून मतदारांचा चांगला प्रतिसाद मिळत असून सकाळपासूनच या ठिकाणी मतदारांनी मोठ्या प्रमाणात रांगा लावून द्यायला दिसून येत आहे
Katewadi Gram Panchayat Election 2023 LIVE : उपमुख्यमंत्री अजित पवारांच्या मातोश्री आशा पवार मतदान करण्यासाठी काटेवाडीतील मतदान केंद्रावर आल्या होत्या. माझं वय आता जास्त झालं आहे. त्यामुळे माझ्या देखतच अजित पवारांनी मुख्यमंत्री व्हावं, अशी इच्छा आशा पवार यांनी सर्वांसमोर बोलून दाखवली. तसेच, अजित पवारांवर जनतेचे प्रेम आहे, असंही त्या म्हणाल्या आहेत.
Nagpur Gram Panchayat Elections 2023: पंधरा दिवसांच्या राजकीय रणधुमाळीनंतर जिल्ह्यातील 357 ग्रामपंचायतींच्या सार्वत्रिक आणि 5 ग्रामपंचायतींच्या पोटनिवडणुका रविवार, 5 नोव्हेंबर रोजी होणार आहेत. यात 5 लाख 48 हजार 291 मतदार 1216 मतदान केंद्रांवर मतदानाचा हक्क बजावतील. यात 2 लाख 65 हजार 302 महिला तर 2 लाख 82 हजार 987 पुरुष मतदारांचा समावेश आहे. पाच ग्रा.पं.ची निवडणूक 8 मतदान केंद्रावर होईल.
Palghar Gram Panchayat Elections 2023: पालघर : पालघर जिल्ह्यात आज 100 ग्रामपंचायतींसाठी निवडणुका होत असून यामध्ये 51 सार्वत्रिक तर 49 ग्रामपंचायतींमध्ये पोट निवडणुकीसाठी मतदान पार पडत आहे. 628 जागांसाठी तब्बल 2099 इतके उमेदवार रिंगणात आहेत. जिल्ह्यातील टेंभी खोडावे ही ग्रामपंचायत सरपंचासह बिनविरोध झाली आहे. सकाळी साडेसात वाजता मतदानाला सुरुवात होणार असून साडेपाच वाजेपर्यंत मतदान पार पडणार आहे तर उद्या या निवडणुकांसाठी मतमोजणी पार पडून निकाल जाहीर होणार आहेत.
Buldhana Gram Panchayat Elections 2023: बुलढाण्यात 48 ग्रामपंचायतींसाठी उत्साहात मतदान सुरू झालं आहे. सरपंच पदासाठी थेट मतदान असल्याने चुरस वाढली असून आमदार संजय रायमुलकर, आमदार श्वेता महाले , आमदार आकाश फुंडकर, आमदार राजेंद्र शिंगणे यांची प्रतिष्ठा पणाला लागली आहे.
ग्राम संसद म्हणून ओळखल्या जाणाऱ्या ग्रामपंचायतीच्या निवडणुकात बुलढाणा जिल्ह्यात आज 48 ग्रामपंचायतीच्या निवडणुकीसह 10 ग्रामपंचायतीच्या पोटनिवडणुकीच्या मतदानाला सुरुवात झाली आहे. यावेळी थेट जनतेतून सरपंच पदासाठी मतदान होत असल्यामुळे या सर्व निवडणुकीत चुरस वाढली आहे. या मतदानासाठी जिल्ह्यात 180 मतदान केंद्र असून एक हजाराच्या वर कर्मचारी या निवडणुकीसाठी तैनात करण्यात आले आहेत. या सर्व ग्रामपंचायतीच्या निवडणुकीसाठी जवळपास दीड लाख मतदार आपला मतदानाचा हक्क बजावणार आहेत. आज सकाळपासूनच या मतदानासाठी मोठा उत्साह बघायला मिळत आहे. ग्रामीण भागात शेतीच्या कामाला सुरुवात झालेली आहे. त्यामुळे मतदार सकाळीच आपला मतदानाचा हक्क बजावून कामावर निघत आहेत.
पार्श्वभूमी
Gram Panchayat Elections 2023 LIVE Updates: राज्यातील ग्रामपंचायतींच्या निवडणुकीचा (Gram Panchayat Elections) धुरळा उडाला असून सुमारे 2 हजार 359 ग्रामपंचायतींच्या सार्वत्रिक निवडणुकांसाठी रविवारी, 5 नोव्हेंबर रोजी मतदान पार पडणार आहे. त्यासाठी प्रशासनाने सर्व तयारी केली आहे. काही ग्रामपंचायती आधीच बिनविरोध झाल्या असून रविवारी 2 हजार 950 सदस्यपदाच्या तर 130 सरपंचांच्या रिक्त पदांच्या पोटनिवडणुकांसाठी मतदान होणार आहे.
आज निवडणुकांसाठी मतदान, किती वाजेपर्यंत मतदान सुरू राहणार?
राज्यभरातील सुमारे 2 हजार 359 ग्रामपंचायतींच्या सार्वत्रिक निवडणुकांसाठी आणि 2 हजार 950 सदस्यपदाच्या तर 130 सरपंचांच्या रिक्त पदांच्या पोटनिवडणुकांसाठी आज मतदान होणार आहे.
आज सकाळी 7.30 ते सायंकाळी 5.30 या वेळेत मतदान होईल. तर ग्रामपंचायतींच्या निवडणुकीची मतमोजणी सोमवारी म्हणे 6 नोव्हेंबरला होईल.
मात्र, गडचिरोली आणि गोंदिया या नक्षलग्रस्त भागात सकाळी 7.30 ते दुपारी 3 वाजेपर्यंतच मतदानाची वेळ असणार आहे. गडचिरोली आणि गोंदिया या नक्षलग्रस्त भागात 7 नोव्हेंबर 2023 रोजी मतमोजणी होईल.
ग्रामपंचायतीसाठी नेत्यांचं मतदान
पुणे जिल्ह्यातील बारामती तालुक्यातील काटेवाडी गावात अजित पवारांचे कुटुंब ग्रामपंचायत निवडणुकीसाठी मतदान करणार आहे. सुनेत्रा पवार सकाळी 7.30 वाजता काटेवाडीत मतदान करतील. स्वःत अजित पवार मात्र तब्येत ठीक नसल्यानं मतदानाला येणार नाहीत, अशी माहिती मिळत आहे. तर पुणे जिल्ह्यातील आंबेगाव तालुक्यात निरगुडसर गावात सहकारमंत्री दिलीप वळसे पाटील मतदान करणार आहेत. तर खेड तालुक्यातील शेल पिंपळगाव गावात अजित पवार गटाचे आमदार दिलीप मोहिते मतदान करतील. जुन्नर तालुक्यातील नारायणगाव ग्रामपंचायतीत मतदान असुनही तब्येतीच्या कारणास्तव खासदार अमोल कोल्हे मतदान करणार नसल्याची माहिती मिळत आहे. याव्यतिरिक्त जळगावात मंत्री गुलाबराव पाटील पाळधी खुर्द गावात मतदान करणार आहेत, तर पंढरपुरातील सांगोल्यात महूद गावात शहाजी बापू पाटील मतदान करतील
- - - - - - - - - Advertisement - - - - - - - - -