बजरंग सोनवणेंना उमेदवारी दिल्याने अमरसिंह पंडित समर्थकांमध्ये रोष, गेवराईत होणारी बैठक रद्द

बजरंग सोनवणे यांच्या प्रचारार्थ विधान परिषदेचे विरोधी पक्षनेते धनंजय मुंडे यांच्या उपस्थित पाटोदा, आष्टी, शिरूर आणि गेवराई येथे आज बैठक पार पडणार आहे. मात्र अमरसिंह पंडित यांच्या समर्थकांचा रोष पाहता पक्षावर गेवराईमध्ये संध्याकाळी सात वाजता होणारी बैठक रद्द करण्याची वेळ आली आहे.

बीड : बीडमध्ये राष्ट्रवादीने बजरंग सोनवणे यांना उमेदवारी दिल्याने पंडित समर्थक नाराज आहेत. पंडित समर्थकांमध्ये फेसबुकच्या माध्यमाने संताप व्यक्त केला जात आहे. त्यामुळे गेवराई येथे आज (शनिवार) संध्याकाळी आयोजित केलेली पक्षाची बैठक रद्द करण्यात आल्याची माहिती मिळाली आहे. अमरसिंह पंडित यांचे बंधू माजी जिल्हा परिषद अध्यक्ष विजयसिंह पंडित यांच्या फेसबुक पोस्टने वातावरण अधिकच तापले आहे. 'आपल्याला चटके देणारे काही दिवे तेच असतात ज्यांना आपण वाऱ्यामुळे विझताना वाचवलेलं असतं.' अशी पोस्ट विजयसिंह पंडित यांनी सोनवणे यांची उमेदवारी जाहीर झाल्यावर शेअर केली होती. त्यामुळे पंडित यांच्यातील नाराजी समोर आली आहे. त्यामुळे बजरंग सोनवणे यांच्या प्रचारार्थ विधान परिषदेचे विरोधी पक्षनेते धनंजय मुंडे यांची गेवराई येथे होणारी बैठक रद्द करण्याची वेळ आली आहे. राष्ट्रवादी काँग्रेसने उमेदवारांची दुसरी यादी काल जाहीर केली आहे. ज्यामध्ये बीड मतदारसंघातून जिल्हाध्यक्ष बजरंग सोनवणे यांना उमेदवारी जाहीर केली आहे. बीडमधून राष्ट्रवादीकडून माजी आमदार अमरसिंह पंडित, आमदार जयदत्त क्षीरसागर यांच्या नावाची चर्चा होती. मात्र क्षीरसागर भाजपच्या वाटेवर असल्याने त्यांच्या नावाची चर्चा मावळली. तर अमरसिंह पंडित यांना या मतदारसंघातून उमेदवारी मिळणार हे जवळपास निश्चित झालं होतं. मात्र बजरंग सोनवणे यांच्या नावावर शिक्कामोर्तब झाल्याने अमरसिंह पंडित गटाला मोठा धक्का बसला होता. त्यामुळे त्यांच्या समर्थकांमधून संताप व्यक्त केला जात आहे. बजरंग सोनवणे हे धनंजय मुंडे यांचे निकटवर्तीय असल्याने त्यांना तिकीट मिळालं, अशी चर्चा सध्या सुरु आहे.