एक्स्प्लोर

निवडणूक निकाल २०२४

(Source: ECI/ABP News/ABP Majha)

Devendra Fadnavis : मी देवेंद्र गंगाधरराव फडणवीस, प्रतिज्ञा खरी ठरणार, फडणवीस 31 वे मुख्यमंत्री म्हणून विराजमान होणार!

Devendra Fadnavis Maharashtra New CM : महाराष्ट्राच्या मुख्यमंत्रि‍पदासाठी देवेंद्र फडणवीस यांच्या नावावर शिक्कामोर्तब झाल्याची माहिती मिळत आहे.

By : अनिरुद्ध जोशी | Updated at : 29 Nov 2024 01:15 PM (IST)

Devendra Fadnavis will become 31st Chief Minister of Maharashtra Mi Punha Yein promise will come true Marathi News Devendra Fadnavis : मी देवेंद्र गंगाधरराव फडणवीस, प्रतिज्ञा खरी ठरणार, फडणवीस 31 वे मुख्यमंत्री म्हणून विराजमान होणार!

Devendra Fadnavis Maharashtra New CM

Source : ABP Majha

मुंबई : महाराष्ट्र विधानसभा निवडणुकीत (Maharashtra Vidhan Sabha Election Result 2024) महायुतीने (Mahayuti) मोठी मुसंडी मारली तर महाविकास आघाडीला (Mahavikas Aghadi) मोठा फटका बसला आहे. भाजपने (BJP) या निवडणुकीत 132 जागांवर विजय मिळवत ऐतिहासिक कामगिरी केली. त्यामुळे मुख्यमंत्री भाजपचाच होणार, अशी चर्चा राजकीय वर्तुळात गेल्या काही दिवसांपासून रंगली आहे. त्यातच काल दिल्लीत केंद्रीय गृहमंत्री अमित शाह (Amit Shah) यांच्या उपस्थितीत एकनाथ शिंदे (Eknath Shinde), देवेंद्र फडणवीस (Devendra Fadnavis) आणि अजित पवार (Ajit Pawar) यांची बैठक पार पडली. या बैठकीत महाराष्ट्राच्या मुख्यमंत्रि‍पदासाठी (Maharashtra CM) देवेंद्र फडणवीस यांच्या नावावर शिक्कामोर्तब झाल्याची माहिती सूत्रांकडून मिळत आहे. तर सर्व प्रक्रिया पार पडून लवकरच औपचारिक घोषणा करण्यात येईल, असेही बोलले जात आहे. त्यामुळे सगळं ठरल्यानुसार सुरळीत पार पडलं तर देवेंद्र फडणवीस हे महाराष्ट्राचे 31 वे मुख्यमंत्री होणार आहेत. तसेच देवेंद्र फडणवीस यांनी केलेल्या 'मी पुन्हा येईन'ची प्रतिज्ञा खरी ठरणार असल्याचे दिसून येत आहे.

महाराष्ट्र विधानसभा निवडणुकीचा निकाल लागताच राज्याचा नवा मुख्यमंत्री कोण होणार? याकडे संपूर्ण देशाचे लक्ष लागले आहे. तर भाजपचे संख्याबळ जास्त असल्याने मुख्यमंत्रीपद भाजपला जाणार, अशी शक्यता दिसल्याने सध्याचे काळजीवाहू मुख्यमंत्री एकनाथ शिंदे हे नाराज असल्याच्या चर्चा रंगल्या होत्या. तर एकनाथ शिंदे यांनी ठाण्यात घेतलेल्या पत्रकार परिषदेत पंतप्रधान नरेंद्र मोदी आणि केंद्रीय गृहमंत्री अमित शाह हे जो निर्णय घेतील, त्याला माझा आणि शिवसेनेचा पाठिंबा असेल, अशी भूमिका जाहीर केली. मात्र काल झालेल्या दिल्लीतील बैठकीचा एक फोटो समाज माध्यमांवर व्हायरल झाला. यात अजित पवार, प्रफुल पटेल, जेपी नड्डा, सुनील तटकरे आणि देवेंद्र फडणवीसांच्या चेहऱ्यावर हास्य असल्याचे दिसून आले. तर काळजीवाहू मुख्यमंत्री एकनाथ शिंदेंच्या चेहऱ्यावर नाराजी दिसली. याबाबत विचारले असता मी कधी गंभीर, हसरा तुम्हीच ठरवता...मी आजही खुश आहे, असे स्पष्टीकरण एकनाथ शिंदे यांनी दिले आहे. तर दुसरीकडे राष्ट्रवादी अजित पवार गटाने देखील देवेंद्र फडणवीस यांना पाठिंबा दर्शवला आहे.

देवेंद्र फडणवीस 2014 साली पहिल्यांदा मुख्यमंत्री

याआधी देवेंद्र फडणवीस हे 2014 मुख्यमंत्री झाले होते. त्यांनी मुख्यमंत्रिपदाचा सलग पाच वर्षांचा कार्यकाळ पूर्ण करुन दाखवला. 2019 साली भाजपाने शिवसेनेशी हातमिळवणी करत महायुती म्हणून निवडणूक लढवली होती. या निवडणुकीत महायुतीला 161 जागा मिळाल्या. त्यात भाजपाने 105 जागा जिंकल्या होत्या तर शिवसेनेने 56 जागा जिंकल्या होत्या. मात्र उद्धव ठाकरेंनी अडीच-अडीच वर्षे मुख्यमंत्रिपदावरुन आग्रह सुरु केला. यानंतर भाजप आणि शिवसेनेची युती तुटली. त्यानंतर देवेंद्र फडणवीस यांनी अजित पवार यांच्यासोबत पहाटेचा शपथविधी केला होता. त्यानंतर अजित पवार हे शरद पवार यांच्याकडे गेल्याने हे सरकार केवळ 72 तास चालले होते. यानंतर उद्धव ठाकरे यांच्या नेतृत्वाखाली महायुती सरकारने सत्ता स्थापन केली आणि देवेंद्र फडणवीस यांना 105 आमदारांसह विरोधक म्हणून बसण्याची वेळ आली. याच दरम्यान देवेंद्र फडणवीस यांनी 'मी पुन्हा येईल' असा नारा दिला. यावरून विरोधकांनी त्यांच्यावर जोरदार टीका देखील केली होती.

'मी पुन्हा येईन'ची प्रतिज्ञा खरी ठरणार

21 जून 2022 साली एकनाथ शिंदे यांनी 40 आमदारांना बरोबर घेऊन बंड केले. त्यानंतर उद्धव ठाकरेंचे सरकार कोसळले. 30 जूनला एकनाथ शिंदेंनी मुख्यमंत्री म्हणून आणि देवेंद्र फडणवीस यांनी उपमुख्यमंत्री म्हणून शपथ घेतली होती. यावेळी देवेंद्र फडणवीस यांचे पुन्हा मुख्यमंत्री बनण्याचे स्वप्न अपूर्ण राहिले होते. पुढे अजित पवार देखील शिंदे-फडणवीस यांच्या सोबत सरकारमध्ये स्थापन केले. 2024 सालच्या निवडणुका भाजप, शिवसेना शिंदे गट आणि राष्ट्रवादी अजित पवार गट यांच्या महायुतीने एकत्रित लढल्या. यात भाजपने ऐतिहासिक कामगिरी करून दाखवली. त्यामुळे भाजपचाच मुख्यमंत्री होणार, असा चर्चा राजकीय वर्तुळात सुरु झाल्या. त्यातच कालच्या बैठकीत महाराष्ट्राच्या मुख्यमंत्रि‍पदासाठी देवेंद्र फडणवीस यांच्या नावावर शिक्कामोर्तब झाल्याचे समजते. यासाठीच्या सर्व प्रक्रिया लवकरच पार पडून औपचारिक घोषणा करण्यात येईल, अशी माहिती सूत्रांकडून मिळत आहे. त्यामुळे सगळं ठरल्यानुसार सुरळीत पार पडलं तर देवेंद्र फडणवीस महाराष्ट्राचे 31 वे मुख्यमंत्री होणार आहेत. त्यामुळे देवेंद्र फडणवीस यांनी केलेल्या 'मी पुन्हा येईन'ची प्रतिज्ञा खरी ठरणार आहे.