देवेंद्र फडणवीस तुम्हाला औरंगाबादमध्ये जे आणायचं ते येणार नाही, तुमच्या मुख्यमंत्रीपदाच्या स्वप्नावर माती पडेल: असदुद्दीन ओवेसी

Devendra Fadnavis Vs Asaduddin Owaisi: देवेंद्र फडणवीसांचं मुख्यमंत्रीपदाचं स्वप्न भंगणार, असदुद्दीन ओवेसींचं भाकीत

Asaduddin Owaisi slams Devendra Fadnavis

Source : Facebook

छत्रपती संभाजीनगर: लोकसभा निवडणुकीत व्होट जिहादमुळे भाजपचा अनेक जागांवर पराभव झाला, असे देवेंद्र फडणवीस म्हणतात. पण मग अयोध्येतही तुमचा पराभव कसा झाला? तिकडे तुम्हाला मतं का मिळाली नाहीत, असा सवाल एमआयएम पक्षाचे खासदार असदुद्दीन ओवेसी (Asaduddin Owaisi) यांनी उपस्थित केला. देवेंद्र फडणवीसांच्या जिभेवर काल माझे नाव आले. पण देवेंद्र फडणवीस (Devendra Fadnavis) यांनी लक्षात ठेवावे की, तुम्ही माझा सामना करु शकत नाही. मोदी-शाह आले तरी फडणवीस माझा सामना करु शकत नाहीत, असे ओवेसी यांनी म्हटले. ते रविवारी छत्रपती संभाजीनगरमध्ये आयोजित करण्यात आलेल्या प्रचारसभेत बोलत होते. 

देवेंद्र फडणवीस सातत्याने 'व्होट जिहाद', 'धर्मयुद्ध', असे शब्द बोलत असतात. हा निवडणूक आचारसंहितेचा भंग नाही का? फडणवीस तुम्ही काही आमदार विकत घेतले, मग तुम्हाला चोर किंवा दरोडेखोर म्हणावे का? महाराष्ट्रातील उद्योग गुजरातला जात असताना ते रोखण्याची तुमची हिंमत झाली नाही का? फडणवीस तुम्हाला औरंगाबादला जे आणायचं आहे ते येणार नाही. देवेंद्र फडणवीसांच्या तोंडातून मनोज जरांगे यांचं नाव निघेल का? ते नेहमी 'जिहाद' 'जिहाद' बोलत असतात, अशी टीका ओवेसी यांनी केली.

फडणवीसांचे पूर्वज नव्हे आमचे पूर्वज इंग्रजांशी लढले होते: ओवेसी

इंग्रज आणि मराठे युद्ध झाले, तेव्हा मुस्लिम मराठ्यांसोबत होते. मालेगावच्या किल्ल्यावर मुस्लिम उभे राहिले आणि इंग्रजांना हरवलं. ते फडणवीस तुमचे पूर्वज नव्हते ते ओवेसीचे पूर्वज होते. लढाईत मरणाऱ्यांमध्ये तुमचे पूर्वजाचे नाव होते का? नाही तर ओवेसीच्या बापाचे नाव होते. तुमचा हिरो मात्र इंग्रजांना लव्ह लेटर लिहून 'आय लव्ह' लिहत होता. देवेंद्र फडणवीस सतत 'लव्ह जिहाद' झाला, 'लँड जिहाद' झाला, असे म्हणतात. जिथे तुम्हाला मत मिळाले नाही, तिथे व्होट जिहाद झाले. मग तुम्ही अयोध्येत कसे हरलात, हे सांगा, असा सवाल ओवेसींनी विचारला.

देवेंद्र फडणवीस पुन्हा मुख्यमंत्री होणार नाहीत; ओवेसींचं भाकीत

शिंदे फडणवीस तुम्हाला लाज वाटत नाही का, शहरात आठ दिवसाला पाणी येत आहे, कचरा वाढला आहे. फडणवीस तुम्ही औरंगाबादला पाणी दिले नाही. यांच्याकडून काही होत नाही, हे फक्त हिंदू मुस्लिम करतील. मोदी म्हणतात 'एक है तो सेफ है'. 10 वर्षात मग आम्ही सेफ नव्हतो का? मराठा समाजाची आरक्षणाच्या नावाने फसवणूक करण्यात आली. हे सर्व मिठाई वाटत आहेत. त्यामुळे सोडू नका, मिठाई खा. पण मतदान पतंगाला करा. 1500 मिळत आहेत ते घेऊन टाका, पण मतदान पतंगाला करा. घाबरण्याची तुम्हाला गरज नाही. फडणवीस तुम्ही मुख्यमंत्रीचे स्वप्नं पाहत आहेत, पण तुमच्या स्वप्नांवर माती पडणार आहे, अशी टीका ओवेसी यांनी केली.

आणखी वाचा