एक्स्प्लोर

Solapur Crime News: मोठी बातमी : दरोडेखोर महिलांचा मोठा कट उधळला, सिद्धेश्वर एक्सप्रेसमध्ये 9 महिलांची टोळी पकडली, सर्वजणी धाराशिवच्या!

Solapur Crime News: मध्य रेल्वेच्या सोलापूर विभागात रेल्वे सुरक्षा बलाने मोठी कामगिरी बजावत मुंबई-सोलापूर सिद्धेश्वर एक्सप्रेसमध्ये दरोडा टाकण्याचा कट उधळून लावला आहे.

Written By : आफताब शेख, एबीपी माझा | Updated at : 24 Apr 2026 05:09 PM (IST)

Solapur Crime News

Source : ABP Majha

Solapur Crime News: मध्य रेल्वेच्या सोलापूर विभागात रेल्वे सुरक्षा बलाने (RPF) मोठी कामगिरी बजावत मुंबई-सोलापूर सिद्धेश्वर एक्सप्रेसमध्ये दरोडा टाकण्याचा कट उधळून लावला आहे. या प्रकरणी आरपीएफने नऊ संशयित महिलांना अटक केली असून, त्यांच्याकडून अधिक तपास केला जात आहे. या कारवाईमुळे रेल्वे प्रवाशांमधून समाधान व्यक्त होत आहे. याप्रकरणी, योगिनी उर्फ उषा येरवंड्या पवार, ऐश्वर्या उर्फ पूजा पिंटू काळे, शिवानी आर्यन काळे, नेहा रेवण काळे, करीना जालिंदर काळे, सपना मगर भोसले, अश्विनी महेंद्र काळे यांस अटक करण्यात आली आहे.

Solapur Crime News: कुर्डूवाडी स्थानकावर सापळा

याबाबत मिळालेल्या माहितीनुसार, बुधवारी कुर्डूवाडी रेल्वे स्थानकावर आरपीएफच्या सीपीडीएस (CPDS) पथकाने संशयास्पद हालचाली करणाऱ्या महिलांच्या एका टोळीवर लक्ष केंद्रित केले होते. सिद्धेश्वर एक्सप्रेसमध्ये दरोडा टाकण्याच्या उद्देशाने या महिला दबा धरून बसल्या होत्या. मात्र, पथकाने वेळीच झडप घालून या नऊही महिलांना ताब्यात घेतले.

Solapur Crime News: धाराशिव कनेक्शन आणि गुन्हेगारी पार्श्वभूमी

अटक करण्यात आलेल्या सर्व महिला आरोपी या धाराशिव जिल्ह्यातील रहिवासी आहेत. धक्कादायक बाब म्हणजे, यातील काही महिलांवर यापूर्वी देखील रेल्वेमध्ये चोरी आणि लूटमारीचे गंभीर गुन्हे दाखल असल्याचे समोर आले आहे. ही टोळी केवळ सोलापूरच नव्हे, तर पुणे विभागातही सक्रिय असल्याची शक्यता पोलिसांनी वर्तवली आहे.

Solapur Crime News: लोहमार्ग पोलिसांकडून तपास सुरू

आरपीएफने या महिलांना प्राथमिक चौकशीनंतर पुढील कायदेशीर कारवाईसाठी लोहमार्ग पोलीस (GRP), कुर्डूवाडी यांच्या ताब्यात दिले आहे. ही टोळी रेल्वेमध्ये कशा प्रकारे चोरी करायची आणि त्यांच्या मागे आणखी कोणाचे हात आहेत का, याचा तपास आता लोहमार्ग पोलीस करत आहेत. प्रवासादरम्यान प्रवाशांनी आपल्या मौल्यवान वस्तूंची काळजी घ्यावी आणि संशयास्पद व्यक्ती आढळल्यास तातडीने रेल्वे पोलिसांशी संपर्क साधावा, असे आवाहन रेल्वे प्रशासनाकडून करण्यात आले आहे.

इतर महत्त्वाच्या बातम्या

Nagpur Crime News: 'पैसे देऊ शकत नसशील, तर तुझ्या मुलीला माझ्याकडे पाठव', सावकाराची संतापजनक मागणी, बापाने थेट काटा काढला; नागपूर हादरलं!

Ashok Kharat Crime News: अशोक खरातचा 'तिसऱ्या मुंबई'वर होता डोळा, 3 कोटींची जमीन अवघ्या 58 लाखांत लाटली; अटकेच्या दिवशीच हालचाली!

About the author आफताब शेख, एबीपी माझा

आफताब शेख हे एबीपी माझा वृत्त वाहिनीत सिनिअर करस्पॉन्डट म्हणून कार्यरत आहेत. मागील 9 वर्षांपासून एबीपी माझाच्या माध्यमातून कार्यरत असून आपल्या संवेदनशील आणि निष्पक्ष पत्रकारितेने त्यांनी स्वतंत्र ओळख निर्माण केली आहे. 3 जुलै 2017 रोजी मुंबई येथील एबीपी माझाच्या मुख्य कार्यालयातून त्यांनी पत्रकारितेच्या प्रवासाला सुरुवात केली. फेब्रुवारी 2019 पासून ते सोलापूर येथे सिनिअर करस्पॉन्डन्ट म्हणून कार्यरत आहेत. सध्या ते सोलापूर श्रमिक पत्रकार संघाचे सरचिटणीस म्हणूनही जबाबदारी सांभाळत आहेत.

सोलापूरच्या राजकीय घडामोडींपासून सामाजिक, शैक्षणिक, प्रशासकीय, औद्योगिक, मनोरंजन, क्रीडा आणि व्यावसायिक क्षेत्रांतील महत्त्वाच्या विषयांना त्यांनी एबीपी माझाच्या माध्यमातून राज्यस्तरीय व्यासपीठ मिळवून दिले आहे. ‘कामगारांचे शहर‘ म्हणून ओळखल्या जाणाऱ्या सोलापूरमधील कामगारांचे प्रश्न, सर्वसामान्य नागरिकांच्या समस्या आणि उपेक्षित घटकांचा आवाज शासनदरबारी पोहोचवण्याचा त्यांचा सातत्यपूर्ण प्रयत्न राहिला आहे. बहुभाषिक आणि समृद्ध सांस्कृतिक वारसा लाभलेल्या सोलापूरचा इतिहास, परंपरा आणि वर्तमानही त्यांनी आपल्या वार्तांकनातून प्रभावीपणे मांडले आहे. कोरोना काळात कोविड वॉर्डमध्ये प्रत्यक्ष जाऊन रुग्णांच्या व्यथा आणि आरोग्य व्यवस्थेतील वास्तव समोर आणला तर महापूर-दुष्काळातील रिपोर्ट्समधून त्यांनी आपल्या संवेदनशील पत्रकारितेचा प्रत्यय दिला. सोलापूरसह मुंबई, पुणे, धाराशिव, लातूर, बीड, नांदेड आणि छत्रपती संभाजीनगर जिल्ह्यांतही त्यांनी वार्तांकन केले आहे.

त्यांनी सोलापूरच्या दयानंद कला व शास्त्र महाविद्यालयातून कला शाखेची पदवी, तर मुंबई विद्यापीठातून मास्टर ऑफ मास कम्युनिकेशन अँड जर्नलिझम ही पदव्युत्तर पदवी प्राप्त केली आहे. पत्रकारितेसोबतच सामाजिक कार्याचीही त्यांना विशेष आवड आहे. महाविद्यालयीन जीवनातील सामाजिक योगदानासाठी 2016 मध्ये तत्कालीन राष्ट्रपती प्रणव मुखर्जी यांच्या हस्ते त्यांना इंदिरा गांधी राष्ट्रीय सेवा योजना पुरस्काराने (Indira Gandhi NSS Award-2016) सन्मानित करण्यात आले. याशिवाय, पत्रकारितेतील योगदानासाठी त्यांना विविध संस्था आणि संघटनांकडून अनेक पुरस्कारांनी गौरविण्यात आले आहे.

Published at : 24 Apr 2026 12:10 PM (IST)

Tags :

Solapur Railway RPF Solapur Crime Solapur News Crime News POLICE