Pune Crime Jalindar Supekar: हगवणेंचा नातेवाईक जालिंदर सुपेकरांवर आणखी एक खळबळजनक आरोप, तुरुंगातील कैद्याकडून 500 कोटी रुपये मागितले

Jalindar Supekar news: जालिंदर सुपेकर यांचे काळे कारनामे आता एक-एक करुन समोर येत आहेत. जालिंदर सुपेकर हे मुळशीतील हगवणे कुटुंबीयांचे नातेवाईक आहेत. गृहखात्याने त्यांचं डिमोशन केलं होतं.

Pune Crime Jalindar Supekar

Source : ABP

Jalindar Supekar News: वैष्णवी हगवणे हिच्या आत्महत्येसाठी कारणीभूत असणाऱ्या मुळशीतील हगवणे कुटुंबीयांचे नातेवाईक असणारे वरिष्ठ पोलीस अधिकारी राजेंद्र सुपेकर यांच्याबाबत आणखी एक खळबळजनक आरोप करण्यात आला आहे. वैष्णवी हगवणे आत्महत्या प्रकरणापूर्वी जालिंदर सुपेकर हे विशेष महानिरीक्षक (कारागृह) (Special IG Prisons) या पदावर कार्यरत होते. या काळात त्यांनी अमरावती कारागृत बंदिस्त कारागृहात असणाऱ्या एका कैद्याकडून 500 कोटी रुपये मागितल्याचा आरोप करण्यात आला आहे. या कैद्याने आपल्या वकिलांमार्फत न्यायालयात तशी तक्रार केली आहे. 

पुण्यातील सावकार नानासाहेब आणि त्याचा मुलगा गणेश गायकवाड हे सूनेचा छळ केल्याच्या आरोपावरुन गेली काही वर्षे तुरुंगात आहेत‌ . या बाप-लेकांनी त्यांच्या वकिलांमार्फत जालिदर सुपेकर यांनी त्यांना 550 कोटी रुपये मागितल्याची तक्रार न्यायालयात केली आहे. गणेशचे लग्न राष्ट्रवादी काँग्रेस आणि त्यानंतर शिवसेनेत गेलेल्या दिपक साळुंखे यांच्या मुलीसोबत 2017 मध्ये झाले होते‌. मात्र, हुंड्यासाठी तीचा सतत छळ होत होता. सिगारेटचे चटके देऊन तीला मारहाण होत होती, अशी तक्रार 2021 मधे पोलीसांकडे करण्यात आली. त्यानंतर गायकवाड बाप लेकांना अटक झाली होती. नाना गायकवाडच्या सावकारी विरुध्द अनेक जणांनी तक्रारी केल्याने त्याच्यावर मकोका कायद्या अंतर्गत कारवाई करण्यात आली. मात्र, येरवडा कारागृहात बंदिस्त असताना त्याच्यावर इतर कैद्यांकडून हल्ला करण्यात आला. त्यामुळे त्याला आणि गणेशला अमरावती कारागृहात हलविण्यात आले‌ . गायकवाडच्या वकीलाने केलेल्या दाव्यानुसार जालिंदर सुपेकर तुरुंग उपमहानिरिक्षक असताना 19 ऑगस्ट 2023 ला अमरावती कारागृहात आले होते आणि तिथे त्यांनी गायकवाडला 550 कोटी रुपये जामिनासाठी मागितल्याचा आरोप गायकवाडच्या वकिलांनी न्यायालयात दाखल याचिकेत केला आहे. तुम्ही मला पैसे द्या, मी तु्म्हाला या प्रकरणातून बाहेर काढतो, असे सुपेकर यांनी सावकार यांनी म्हटल्याचा आरोप वकिलांनी केला आहे. त्यामुळे आता जालिंदर सुपेकर यांच्या अडचणी वाढण्याची शक्यता आहे. या पार्श्वभूमीवर आता गृहखाते जालिंदर सुपेकर यांच्यावर कारवाई करणार का, याकडे सर्वांच्या नजरा लागल्या आहेत. 

जालिंदर सुपेकरांची बदली, डिमोशनही झालं

वैष्णवी हगवणे आत्महत्या प्रकरणाशी संबंध आढळून आल्यानंतर गृह विभागाने जालिंदर सुपेकर यांच्यावर कारवाई केली होती. जालिंदर सुपेकर हे सध्या विशेष पोलीस महानिरिक्षक कारागृह व सुधार सेवा या पदावर कार्यरत होते. आता तिथुन त्यांची बदली पदावनती करुन उप महासमादेशक होमगार्ड या पदावर पाठवण्यात आले होते. 

आणखी वाचा