Anant Garje & Gauri Garje Crime: गौरीशी कडाक्याचं भांडण, अनंत गर्जे घराबाहेर पडला, कार कोस्टल रोडवर असताना मनात संशयाची पाल चुकचुकली अन्...

Anant Garje & Gauri Garje Crime: आत्महत्येच्या काही मिनिटापूर्वीच गौरी आणि अनंत यांचे कडाक्याचे भांडण झाले होते. यानंतर अनंत गर्जे हे पंकजा मुंडे यांच्या कार्यक्रमानिमित्त घराबाहेर पडले होते.

Anant Garje & Gauri Garje Crime

Source : ABP Majha

Anant Garje & Gauri Garje Crime: राज्याच्या पर्यावरण मंत्री पंकजा मुंडे (Pankaja Munde) यांचे स्वीय सहायक (PA) अनंत गर्जे (Anant Garje) यांच्या पत्नी डॉ. गौरी पालवे (Gauri Palve) यांनी वरळीच्या बीडीडी वसाहतीतील घरी गळफास घेऊन आपली जीवनयात्रा संपवल्याची घटना घडली आहे. अन्य महिलेसोबतचे संबंध उघड झाल्याने अनंतसह त्याचे कुटुंबीय गौरीला त्रास देत असल्याचा आरोप तिच्या कुटुंबीयांनी केला आहे. तर गौरीने आत्महत्या केली नसून तिची हत्या झाल्याचे आरोप देखील त्यांनी केलाय. या प्रकरणात अनंत गर्जे यांच्यावर आत्महत्येस प्रवृत्त केल्याचा गुन्हा दाखल करण्यात आला आहे. रविवारी रात्री 1 वाजता अनंत गर्जे यांनी वरळी पोलिसांसमोर (Worli Police) आत्मसमर्पण केले. त्यानंतर पोलिसांनी अनंत गर्जे यांना अटक केली आहे. आता गौरी गर्जे यांच्या प्रकरणात महत्त्वाची अपडेट समोर येत आहे. 

Anant Garje & Gauri Garje Crime: मनात संशयाची पाल चुकचुकली अन्...

आत्महत्येच्या काही मिनिटापूर्वीच गौरी आणि अनंत यांचे कडाक्याचे भांडण झाले होते. यानंतर अनंत गर्जे हे पंकजा मुंडे यांच्या कार्यक्रमानिमित्त घराबाहेर पडले होते. अनंत गर्जे यांची गाडी कोस्टल रोडला असताना गर्जे वारंवार गौरी यांना फोन करत होते. मात्र गौरी यांनी फोन उचलला नाही. याच संशयातून अनंत यांनी गाडी पुन्हा घराकडे वळवली. घराबाहेरून आवाज देऊनही गौरी दार उघडत नव्हती. आतून कुठलीही प्रतिक्रिया मिळत नसल्याने अनंत यांनी खिडकीतून घरात डोकावले. यावेळी गौरी यांनी गळफास घेतल्याचे त्यांना दिसून आले. अनंत गर्जे यांच्या चौकशीत ही माहिती समोर आल्याचे पोलीस सूत्रांकडून समजत आहे.

Pankaja Munde news: पंकजा मुंडे यांनी आपल्या निवेदनात नेमकं काय म्हटलं?

दरम्यान, पंकजा मुंडे यांनी डॉ. गौरी गर्जे-पालवे यांच्या मृत्यू प्रकरणावर प्रतिक्रिया दिली आहे. त्यांनी म्हटले आहे की, दिनांक 22  नोव्हेंबर 2025 रोजी संध्याकाळी  6.30 ते 6.45 वाजेच्या सुमारास माझा पीए अनंतचा फोन माझ्या दुसऱ्या पीएच्या फोनवर आला. तो खूप रडत होता. पत्नीने आत्महत्या केल्याचे अत्यंत आक्रोशाने त्याने मला सांगितले. ही गोष्ट माझ्यासाठी ही खुप धक्कादायक होती. पोलिसांच्या कुठल्याही कारवाईमध्ये कसूर राहू नये व त्यांनी योग्य तपास करुन या विषयाला हाताळावे असे माझे म्हणणे आहे, तसे मी पोलिसांना देखील सांगितले आहे. गौरीच्या वडीलांशीही मी बोलले, ते प्रचंड दु:खात आहेत हे मी समजू शकते. अश्या घटना जीवाला चटका लावून जातात आणि मनाला सुन्न करतात. कोणाच्या अति वैयक्तिक जीवनात काय चालू असतं हे अनाकलनीय आहे. अचानक धक्कादायक अशी ही घटना घडली असल्याने मलाही अस्वस्थ वाटत आहे.

आणखी वाचा