NEET Fee Refund : नीट परीक्षा फी परताव्यावर विद्यार्थ्यांमध्ये संभ्रम; RE-NEET सोबत CBI तपासात नवे धागेदोरे
NEET Paper Leak : नीट पेपरफुटीनंतर NTA ने आधीचे परीक्षा शुल्क परत करण्याची घोषणा केली आहे. मात्र फी विद्यार्थ्यांच्या खात्यात की नेट कॅफे चालकांच्या खात्यात जमा होणार, याबाबत संभ्रम निर्माण झाला आहे.
NEET Fee Refund : NEET UG 2026 पेपरफुटी प्रकरणानंतर एनटीएने (National Testing Agency) RE-NEET घेण्याचा निर्णय जाहीर केला आहे. विद्यार्थ्यांना नव्याने अर्ज भरण्याची गरज नसल्याचे स्पष्ट करण्यात आले असून, परीक्षा शुल्क परत करण्याची घोषणा करण्यात आली आहे. मात्र हा परतावा नेमका विद्यार्थ्यांच्या खात्यात होणार की नेट कॅफे किंवा सेतू केंद्र चालकांच्या खात्यात, याबाबत विद्यार्थ्यांमध्ये आणि पालकांमध्ये मोठा संभ्रम निर्माण झाला आहे.
NEET साठी सर्वसाधारण प्रवर्गातील विद्यार्थ्यांकडून 1700 रुपये तर राखीव प्रवर्गातील विद्यार्थ्यांकडून 1000 रुपये शुल्क आकारण्यात आले होते. ग्रामीण भागातील अनेक विद्यार्थ्यांनी अर्ज नेट कॅफे आणि सेतू केंद्रांच्या माध्यमातून भरल्याने ऑनलाइन व्यवहार संबंधित चालकांच्या खात्यांतून झाले होते, तर विद्यार्थ्यांनी त्यांना रोख रक्कम दिली होती.
RE NEET 2026 : फी नेमकी कोणाच्या खात्यात जमा होणार?
NTA कडून फी परताव्याची घोषणा झाल्यानंतर सर्वात मोठा प्रश्न असा निर्माण झाला आहे की, रिफंड मूळ व्यवहार ज्या खात्यातून झाला त्याच खात्यात जमा होणार का? तसे झाल्यास अनेक विद्यार्थ्यांचे पैसे थेट नेट कॅफे चालकांच्या खात्यात जाण्याची शक्यता आहे.
विद्यार्थ्यांनी स्वतःचे किंवा पालकांचे बँक तपशील अद्ययावत ठेवावेत, तसेच फी थेट विद्यार्थ्यांच्या खात्यात जमा होण्यासाठी स्पष्ट आणि पारदर्शक यंत्रणा तयार करण्याची मागणी तज्ज्ञांनी केली आहे.
NEET Paper Leak : NTA कार्यालयातूनच पेपर फुटल्याचा संशय
दरम्यान, तपासात धक्कादायक माहिती समोर आली आहे. पेपर नाशिक किंवा इतर केंद्रांमधून फुटला नसून तो थेट NTA च्या कार्यालयातूनच लीक झाला असावा, असा संशय व्यक्त केला जात आहे. तपास यंत्रणांनी या दिशेने चौकशी सुरू केली आहे.
CBI Investigation NEET : सोशल मीडियावरून तयार केले विद्यार्थ्यांचे नेटवर्क
या प्रकरणातील आरोपी शुभम खैरनारने करिअर काऊन्सिलिंगच्या नावाखाली विद्यार्थ्यांचे मोठे नेटवर्क तयार केल्याचे समोर आले आहे. सोशल मीडिया, फोन आणि ऑनलाइन माध्यमांतून मार्गदर्शन देत तो विद्यार्थ्यांचे अर्ज, प्रवेश प्रक्रिया आणि परीक्षांशी संबंधित सेवा पुरवत होता. याच नेटवर्कच्या माध्यमातून विविध राज्यांतील विद्यार्थ्यांपर्यंत पोहोचून पेपर विक्रीचे रॅकेट चालवले जात असल्याची प्राथमिक माहिती तपासात समोर आली आहे.
NEET Maharashtra Connection : नगर, पुणे आणि नाशिक कनेक्शन
Central Bureau of Investigation ने तपासाचा विस्तार महाराष्ट्रात केला असून अहिल्यानगर, पुणे आणि नाशिक येथून अटकसत्र सुरू आहे. अहिल्यानगरमधील ओंकार शिंगोटे या विद्यार्थ्याला अटक करण्यात आली आहे. तसेच धनंजय लोखंडे हा या घोटाळ्यातील महत्त्वाचा दुवा असल्याचे तपासात स्पष्ट झाले आहे.
Pune Agents NEET : विद्यार्थ्यांचा एजंट म्हणून वापर
धनंजय लोखंडेने विविध शहरांतील एजंटमार्फत NEET प्रश्नपत्रिका विक्रीचे जाळे उभे केले होते. मनिषा वाघमारे (Manisha Waghmare) आणि शेषराव सोळंकी यांच्यासारख्या व्यक्तींमार्फत पैसे गोळा करणे आणि इच्छुक विद्यार्थ्यांचा शोध घेणे अशी कामे केली जात होती. शेषराव सोळंकीच्या मोबाईलमधील संभाषण तपासल्यानंतर या रॅकेटचे आणखी धागेदोरे समोर आले आहेत.
ही बातमी वाचा:
महत्त्वाच्या बातम्या
