Nashik Crime : नाशिक हादरलं! घरात घुसून आधी आईला बेशुद्ध केलं अन् तीन महिन्याच्या मुलीला संपवलं

Nashik Crime : नाशिक (Nashik)  शहरात रोजच नवनव्या घटनांनी शहर हादरत असून रस्त्याने चालणं देखील अवघड झालं आहे.

Nashik Gangapur Crime

Nashik Crime : नाशिक शहरात (Nashik City) सामान्य माणसाची सुरक्षितता ऐरणीवर आली आहे. आज शहरातून मन सुन्न करणारी घटना समोर आली आहे. एका अज्ञात महिलेने घरात घुसून आधी आईला बेशुद्ध केलं, त्यानंतर एका लहानग्या मुलीला गळा चिरून संपवल्याची संतापजनक घटना घडली आहे. गंगापूर-सातपूर लिंक रोडवर ही घटना घडली आहे. घटनेनंतर आजूबाजूच्या परिसरात भीतीचं वातावरण पसरलं आहे.  

नाशिक (Nashik)  शहरात दिवसेंदिवस वाढणारी गुन्हेगारी आता कळस गाठत आहे. रोजच नवनव्या घटनांनी शहर हादरत असून रस्त्याने चालणं देखील मुश्किल झालं आहे. अशातच गंगापूर पोलीस स्टेशन (Gangapur Police Station) हद्दीतील धृवनगर परिसरात आईला बेशुद्ध करुन तीन महिन्याच्या चिमुकलीची गळा चिरून हत्या करण्यात आली. धृवांशी भूषण रोकडे असं या चिमुकलीचं नाव आहे. या घटनेने नाशिक शहरात मोठी खळबळ उडाली असून पोलिसांनी अज्ञात महिलेविरोधात गुन्हा दाखल केला आहे.

पोलिसांनी दिलेल्या माहितीनुसार, गंगापूर-सातपूर लिंक रोड येथील धृवनगर परिसरात भूषण रोकडे हे आपली पत्नी, आई आणि 3 महिन्याची चिमुकली धृवांशी यांच्यासमवेत राहतात. भूषण हे सातपूर येथील एका कंपनीत सुपरवायझर आहेत. सोमवारी ते नेहमीप्रमाणे कामाला गेल्यानंतर तेव्हा घरात त्यांच्या आई आणि पत्नी दोघीच होत्या. सायंकाळी त्यांची आई दूध आणण्यासाठी घराबाहेर पडली. त्यावेळी भूषण यांची पत्नी आणि चिमुकली धृवांशी घरात होत्या. या गोष्टीचा फायदा घेत एक पंजाबी ड्रेस घातलेली अज्ञात महिला अचानक घरात घुसली.

आजीच्या पायाखालची जमीनच सरकली... 

दरम्यान, या महिलेने धृवांशी हिच्या आईच्या नाकाला रूमाल लावल्याने ती बेशुद्ध झाली. यानंतर या निर्दयी महिलेने पलंगावर झोपलेल्या तीन महिन्याच्या निरागस धृवांशीचा धारधार शस्त्राने गळा चिरला. काही वेळानंतर भूषण यांच्या आई दूध घेऊन घरी आल्यानंतर त्यांच्या पायाखालची जमीनच सरकली. त्यांनी आपल्या सूनेला बेशुद्ध अवस्थेत पडलेले बघितले. दुसरीकडे चिमुकली नात धृवांशी त्यांना रक्ताच्या थारोळ्यात आढळून आली. त्यांनी आरडाओरड करून या घटनेची माहिती शेजाऱ्यांना दिली. त्यानंतर तातडीने धृवांशी आणि तिच्या आईला रुग्णालयात दाखल करण्यात आले. मात्र, रुग्णालयात जाण्यापूर्वीच धृवांशीचा दुर्देवी मृत्यू झाला होता.

अज्ञात महिलेवर गुन्हा दाखल.... 

दरम्यान, घटनेची माहिती मिळताच गंगापूर पोलीस ठाण्याच्या पथकासह वरिष्ठ पोलीस अधिकारी घटनास्थळी दाखल झाले. मुलीची आई शुद्धवीर आली असून पोलिसांकडून चौकशी सुरू करण्यात आली आहे. मात्र तीन महिन्यांचा लहान चिमुकलीची हत्या का केली याची माहिती अजून मिळालेली नाही. मात्र मुलीच्या आईने एका महिलेवर संशय व्यक्त केला असून सोमवारी रात्री उशिरापर्यंत पोलीस अधिकारी घटनास्थळी तपास करत होते.