Bhiwandi : चार किलो गांजासह मनसेचा शहर उपाध्यक्ष अटकेत, गुन्हे शाखेच्या कारवाईने राजकीय वर्तुळात खळबळ
Bhiwandi Police Action : पोलिसांनी आरोपीला न्यायालयात हजर केलं असता त्याला चार दिवसांची पोलिस कोठडी सुनावण्यात आली आहे. या प्रकरणी आणखी कुणी सहभागी आहे का याचा तपास पोलिस करत आहेत.
ठाणे : भिवंडी शहरातील कोंबडपाडा परिसरात गांजाची तस्करी करत असलेल्या मनसेच्या भिवंडी शहर उपाध्यक्षाला गुन्हे शाखेने अटक केली आहे. कुमार व्यंकटेश पुजारी (वय 34) असे अटक करण्यात आलेल्या पदाधिकाऱ्याचे नाव आहे. त्याच्याकडून तब्बल 3 किलो 960 ग्रॅम गांजा जप्त करण्यात आला आहे. जप्त करण्यात आलेल्या मुद्देमालाची एकूण किंमत सुमारे 1 लाख 28 हजार रुपये आहे. पोलिसांनी आरोपीकडून गांजा, मोबाईल फोन आणि रोख रक्कम जप्त केली आहे.
पोलिसांनी दिलेल्या माहितीनुसार, ही कारवाई भिवंडीतील कोंबडपाडा परिसरातील एका मोकळ्या मैदानात करण्यात आली. पुजारी हा स्वतःच्या फायद्यासाठी गांजाची साठवणूक आणि विक्री करत असल्याची माहिती पोलिसांच्या प्राथमिक तपासात समोर आली आहे. त्याच्या विरुद्ध निजामपूर पोलीस ठाण्यात एनडीपीएस कायद्यानुसार गुन्हा दाखल करण्यात आला आहे.
कुमार पुजारीला अटक केल्यानंतर त्याला न्यायालयात हजर केले असता चार दिवसांची पोलिस कोठडी सुनावण्यात आली आहे. मनसेसारख्या पक्षाच्या भिवंडी शहर उपाध्यक्षाच्या अटकेमुळे राजकीय वर्तुळात एकच खळबळ उडाली आहे. या प्रकरणात आणखी कुणाचा सहभाग आहे, इतर टोळ्यांशी याचा काही संबंध आहे या याचा सखोल तपास भिवंडी गुन्हे शाखा करत आहे.
ही बातमी वाचा:
महत्त्वाच्या बातम्या
