Santosh Deshmukh Case : मला दहावी-बारावीत चांगले गुण, B.Sc पदवी घेतलीय; जयराम चाटेचा जामीनासाठी जगावेगळा युक्तिवाद, संतोष देशमुख हत्याकांडात मोठी अपडेट
Massajog Sarpanch Santosh Deshmukh Case Bail Rejected: मस्साजोग गावचे सरपंच संतोष देशमुख यांच्या निर्घृण हत्या प्रकरणातील आरोपी जयराम चाटेचा जामीन अर्ज मकोका न्यायालयाने फेटाळून लावला आहे.
बीड : महाराष्ट्राला हादरवून सोडणाऱ्या केज तालुक्यातील मस्साजोग गावचे सरपंच संतोष देशमुख (Sarpanch Santosh Deshmukh) यांच्या निर्घृण हत्या प्रकरणातील एक महत्त्वाची घडामोड समोर आली आहे. या प्रकरणातील मुख्य आरोपींपैकी एक असलेला जयराम चाटे (Jairam Chate) याचा जामीन अर्ज मकोका न्यायालयाने (MCOCA Court) फेटाळून लावला आहे. 10 जुलै रोजी झालेल्या सुनावणी दरम्यान न्यायालयाने हा निर्णय दिला.
विशेष म्हणजे, जयराम चाटे याने जामिनासाठी न्यायालयात दिलेले कारण अत्यंत धक्कादायक होते. मात्र, न्यायालयाने त्याचे दावे फेटाळत त्याला कोणताही दिलासा देण्यास नकार दिला.
Jairam Chate Reason For Bail : जामिनासाठी दिली 'ही' कारणे
आरोपी जयराम चाटे याने मकोका न्यायालयात दाखल केलेल्या जामीन अर्जात (Bail Plea) स्वतःला निर्दोष सांगत आपल्याला खोट्या गुन्ह्यात अडकवल्याचा दावा केला होता. याशिवाय त्याने जामीन मिळण्यासाठी एक अजब युक्तिवाद केला होता. 'मला दहावी आणि बारावीत खूप चांगले गुण (Marks) मिळाले आहेत, तसेच मी बीएससी (BSc) पदवीधर सुशिक्षित तरुण आहे,' असे कारण त्याने न्यायालयात दिले होते.
मात्र, न्यायालयाने आरोपीचा हा युक्तिवाद पूर्णपणे फेटाळून लावला. परीक्षेत चांगले गुण मिळवणे आणि उच्च शिक्षण असणे, हे एवढ्या गंभीर गुन्ह्यात जामीन देण्याचे कारण असू शकत नाही, असे स्पष्ट करत न्यायालयाने जयराम चाटेचा जामीन अर्ज थेट फेटाळला.
Sarpanch Santosh Deshmukh Flashback : संपूर्ण चित्रपटगृहासारखा थरार
9 डिसेंबर 2024 रोजी बीडच्या केज तालुक्यातील मस्साजोगचे सरपंच संतोष देशमुख यांचे अपहरण करून त्यांची निर्घृण हत्या करण्यात आली होती. विष्णू चाटे, जयराम चाटे, सुदर्शन घुले, कृष्णा आंधळे, सुधीर सांगळे, महेश केदार आणि प्रतीक घुले या आरोपींनी संतोष देशमुख यांना टाकळी शिवारात सुदर्शन घुलेच्या शेतात नेले होते. तिथे आरोपींनी संतोष देशमुख यांना नग्न करून लोखंडी रॉड आणि गॅस पाईपने बेदम मारहाण केली. त्यांचे हात-पाय तोडून त्यांना अक्षरशः हालहाल करून मारण्यात आले.
अत्यंत संतापजनक बाब म्हणजे, हे अमानुष हत्याकांड सुरू असताना आरोपींनी वाल्मिक कराड या परळीतील गुंडाला 'व्हिडिओ कॉल' (Video Call) करून हा सगळा प्रकार प्रत्यक्ष दाखवण्यात आला होता. वाल्मिक कराड हा माजी मंत्री धनंजय मुंडे यांचा निकटवर्तीय होता.
Beed Crime News : 1800 पानांचे चार्जशीट, 15 व्हिडिओ आणि 8 फोटो
या क्रूर हत्याकांडानंतर संपूर्ण महाराष्ट्रात संतापाची लाट उसळली होती. पोलिसांनी या प्रकरणात तात्काळ मकोका अंतर्गत कारवाई करत आरोपींना बेड्या ठोकल्या. पोलिसांनी या प्रकरणात न्यायालयात तब्बल 1,800 पानांचे दोषारोपपत्र (Santosh Deshmukh Case Charge sheet) दाखल केले आहे.
आरोपींच्या मोबाईलमधून पोलिसांना हत्येचे थेट 15 व्हिडीओ आणि 8 फोटो मिळाले आहेत. यामध्ये आरोपी संतोष देशमुख यांना मारहाण करताना आणि आनंद साजरा करताना स्पष्ट दिसत आहेत. हे फोटो सोशल मीडियावर व्हायरल झाल्यानंतर राज्यात तीव्र पडसाद उमटले होते.
12 मार्च 2025 रोजी या प्रकरणाची पहिली सुनावणी झाली होती. संपूर्ण भक्कम पुरावे पाठीशी असल्याने आणि गुन्ह्याचे गांभीर्य लक्षात घेऊन न्यायालयाने आरोपी जयराम चाटेला कारागृहातच ठेवण्याचा निर्णय दिला आहे.
ही बातमी वाचा:
महत्त्वाच्या बातम्या
