Nirmala Sitharaman : 'रशियाकडून तेल खरेदी सुरु ठेवणार, तो आमचा निर्णय', केंद्रीय अर्थमंत्री निर्मला सीतारामन यांचं अमेरिकेला प्रत्युत्तर
Nirmala Sitharaman : रशियाकडून तेल खरेदी करत असल्यानं अमेरिकेनं भारतावर दबाव वाढवला आहे. अमेरिकेनं भारतावर 50 टक्के टॅरिफ लादलं आहे. या दरम्यान निर्मला सीतारामन यांचं वक्तव्य समोर आलंय.
Nirmala Sitharaman on buying Russian Oil नवी दिल्ली : अमेरिकेनं भारतानं रशियाकडून तेल खरेदी करु नये यासाठी दबाव वाढवला आहे. यामुळं डोनाल्ड ट्रम्प यांनी भारतातून आयात होणाऱ्या वस्तूंवर 25 टक्के टॅरिफ आणि 25 टक्के अतिरिक्त आयात शुल्क लादलं आहे. यामुळं भारतातून अमेरिकेला निर्यात होणाऱ्या वस्तूंवर 50 टक्के टॅरिफ द्यावं लागेल. या दरम्यान केंद्रीय अर्थमंत्री निर्मला सीतारामन याचं एक मोठं वक्तव्य समोर आलं आहे. निर्मला सीतारामन यांनी भारत रशियाकडून तेल खरेदी सुरु ठेवेल, असं म्हटलं. आमचे ऊर्जा संसाधनांसदर्भातील निर्णय पूर्णपणे राष्ट्रहितावर आधारित आहेत, असं सीतारामन यांनी म्हटलं.
भारत रशियाकडून तेल खरेदी सुरु ठेवणार
न्यूज 18 ला दिलेल्या मुलाखतीत निर्मला सीतारामन म्हणाल्या की भारत रशियाकडून तेल खरेदी करणं सुरु ठेवणार आहे. आम्हाला आपल्या आवश्यकता आणि गरजांनुसार निर्णय घ्यायचा आहे की तेल कोणाकडून खरेदी करायचं, हा निर्णय देशहित लक्षात ठेवून घेतला जाईल. निर्मला सीतारामन पुढं म्हणाल्या की गोष्ट रशियाकडून तेल खरेदी करणं असो की आणखी काही, आम्ही दर, वाहतूक आणि दुसऱ्या कोणत्या वस्तूंसदर्भातील निर्णय आपल्या गरजेनुसार घेतले जातील. तेल खरेदी विदेशी चलनाशी संबंधित असल्यानं आम्ही आमच्या सोयीनुसार आणि सुविधेनुसार निर्णय घेऊ, आम्ही कोणत्याही शंकेशिवाय रशियाकडून तेल खरेदी सुरु ठेवणार, असं निर्मला सीतारामन म्हणाल्या. भारत कच्च्या तेलाच्या आयातीवर सर्वाधिक खर्च करतो, असंही त्यांनी सांगितलं.
अमेरिकेचे अध्यक्ष डोनाल्ड ट्रम्प यांनी रशियाकडून तेल खरेदी करणाऱ्या देशांनी यूक्रेन विरुद्धच्या युद्धाला पोत्साहन दिल्याचा आरोप केला आहे. भारत आणि चीननं रशियाकडून मोठ्या प्रमाणात तेल खरेदी केली आहे. चीन हा रशियाचा सर्वात मोठा तेल खरेदीदार आहे तर भारताचा क्रमांक दुसरा आहे. यामुळं अमेरिकेनं भारतावर 50 टक्के टॅरिफ लादलं आहे. याची अंमलबजावणी 27 ऑगस्टपासून सुरु झाली आहे. येत्या काळात अतिरिक्त निर्बंध लादू असं देखील अमेरिकेनं म्हटलं आहे.
डोनाल्ड ट्रम्प यांनी जानेवारी महिन्यात अमेरिकेचं अध्यक्षपद दुसऱ्यांदा स्वीकारलं. त्यानंतर ट्रम्प यांनी रशियासोबत व्यापार करणाऱ्या देशांवर फेज-2 आणि फेज -3 टॅरिफ लादण्याची धमकी दिली होती. चीननंतर भारत रशियाकडून मोठ्या प्रमाणात तेल खरेदी करतो. भारत रशियाकडून तेल खरेदी सुरु ठेवणार असेल तर त्यांना दंड द्यावा लागेल, असं ट्रम्प म्हणाले होते. याबाबत निर्मला सीतारामन यांनी प्रतिक्रिया देताना म्हटलं की जीएसटी दरांमधील सुधारणांमुळं टॅरिफमुळं निर्माण झालेला दबाव कमी करण्यात फायदेशीर ठरेल.
महत्त्वाच्या बातम्या
