सोनं खरेदी करावं की नको? किंमतीत घसरण होणार की लाखाचा टप्पा ओलांडणार? काय म्हणतात तज्ज्ञ?
सोने पुन्हा एकदा गुंतवणूकदारांसाठी सुरक्षित पर्याय म्हणून समोर आला आहे. 2025 च्या पहिल्या चार महिन्यांतच, सोने जवळपास 25 टक्क्यांनी वाढले आहे.
Gold Price : सोने पुन्हा एकदा गुंतवणूकदारांसाठी सुरक्षित पर्याय म्हणून समोर आला आहे. 2025 च्या पहिल्या चार महिन्यांतच, सोने जवळपास 25 टक्क्यांनी वाढले आहे. MCX आणि COMEX या दोन्ही आंतरराष्ट्रीय एक्सचेंजेसवर आतापर्यंतच्या सर्वोच्च पातळीवर सोने पोहोचले आहे. व्यापारयुद्ध, महागाईचा दबाव आणि 'सेफ हेव्हन' मालमत्तेकडे गुंतवणूकदारांचा कल यामुळे सोन्याची ही वाढ झाल्याचे मानले जात आहे. दरम्यान, सोन्यात गुंतवणूक करण्याची योग्य वेळ असल्याची माहिती तज्ज्ञांनी दिली आहे.
जगभरातील मध्यवर्ती बँकांकडून सोन्याच्या खरेदीमुळेही किंमतीत वाढ
ज्या गुंतवणूकदारांना दीर्घकालीन संपत्तीचे संरक्षण करायचे आहे त्यांच्यासाठी सोन्यात गुंतवणूक करण्याची ही योग्य वेळ असल्याचे तज्ज्ञ म्हणाले. अमेरिका आणि चीन यांच्यात सध्या सुरु असलेला व्यापार तणाव, जागतिक स्तरावर वाढती युद्धसदृश परिस्थिती आणि महागाईची स्थिती यामुळे गुंतवणूकदार सोन्याकडे आकर्षित झाले आहेत, असे तज्ज्ञांचे मत आहे. याशिवाय जगभरातील मध्यवर्ती बँकांकडून सोन्याच्या खरेदीमुळेही किंमती मजबूत होत आहेत.
सोन्यात गुंतवणूक करण्याची योग्य वेळ
मोतीलाल ओसवाल फायनान्शिअल सर्व्हिसेसचे गट वरिष्ठ उपाध्यक्ष नवनीत दमानी म्हणतात की, धोरणातील अनिश्चितता, जागतिक चलनवाढ आणि भू-राजकारणातील अस्थिरता यांमध्ये सोने एक स्थिर मालमत्ता म्हणून उदयास आले आहे. मध्यवर्ती बँका आणि गुंतवणूकदारांचे वाढते व्याज त्याला आणखी बळ देत आहे. सध्याची परिस्थिती लक्षात घेता 'बाय ऑन डिप्स' धोरण मध्यम ते दीर्घ मुदतीसाठी चांगले मानले जाते. तुम्हाला आत्ताच सोने खरेदी करायचे असेल तर कदाचित तुम्हाला प्रतीक्षा करावी लागेल. वास्तविक, सोने सध्या उच्च पातळीवर आहे आणि येथून नफा बुकिंग आणि सुधारणा होण्याची पूर्ण शक्यता आहे. ज्या गुंतवणूकदारांना दीर्घकालीन संपत्तीचे संरक्षण करायचे आहे किंवा भू-राजकीय जोखमींविरुद्ध हेजिंग करायचे आहे, त्यांच्यासाठी सोन्यात गुंतवणूक करण्याची ही योग्य वेळ आहे.
दिवसेंदिवस सोन्याच्या दरात वाढ होत असल्याचं चित्र पाहायला मिळत आहे. वाढत्या दरामुळं ग्राहकांच्या खिशाला झळ बसत आहे. 17 मार्च रोजी सोन्याचा दर 90 हजार 500 रुपये प्रति 10 ग्राम होता. आता मात्र, दरात मोठी वाढ झाल्याचे पाहायला मिळत आहे. मागील 24 तासात सोन्याचा भाव 650 रुपयांनी वाढला आहे. काल संध्याकाळी सोन्याच्या दर मुंबईत 97 हजार 417 रुपये प्रति तोळा होता. दिवसेंदिवस दरात वाढ होत असल्यानं ग्राहकांना मोठा आर्थिक तोटा सहन करावा लागत आहे. गेल्या अनेक दिवसांपासून दरात सातत्यानं वाढ होत असल्याचं चित्र पाहायला मिळत आहे.
महत्त्वाच्या बातम्या
