सोन्याचे दर कमी होण्याचे सगळे अंदाज फोल, एका दिवसात दरात विक्रमी वाढ, 10 ग्रॅमसाठी किती पैसे?

Gold Price : गेल्या काही दिवसांपासून सोन्याच्या दरात (Gold Price) सातत्यानं वाढ होत आहे. वाढत्या दरामुळं ग्राहकांच्या खिशाला मोठी झळ बसत आहे.

Gold Price  News

Source : ABPLIVE AI

Gold Price :  गेल्या काही दिवसांपासून सोन्याच्या दरात (Gold Price) सातत्यानं वाढ होत आहे. वाढत्या दरामुळं ग्राहकांच्या खिशाला मोठी झळ बसत आहे. सोन्याच्या दरात मोठी घसरण होणार असल्याचा अंदाज अमेरिकन संस्थांनी वर्तवला होता. परंतू. हा अंदाज फोल ठरल्याचे दिसत आहे. आज सोन्याच्या दरानं पुन्हा विक्रमी पातळी गाठल्याचं पाहायला मिळालं आहे. प्रति 10 ग्रॅम सोन्याच्या दरात 2940 रुपयांची वाढ झाली आहे. वाढत्या दरामुळं सोन्याच्या खरेदीकडे ग्राहक पाठ फिरवत असल्याचेही दिसत आहे. दर कधी कमी होमार असा सवालही ग्राहक करत आहेत.

24 कॅरेट सोन्याच्या दरात तब्बल 2940 रुपयांची वाढ 

गेल्या आठवड्याच्या अखेरच्या काही दिवसात सोने दरात घसरण झाली होती. उच्चांकीपासून सोन्याचे दर खाली आल्याने ग्राहकांना मोठा दिलासा मिळाला होता. मात्र आता सोने दरातील घसरणीला ब्रेक लागला असून आज सोन्याच्या भावात मोठी दरवाढ झाली आहे. नाशिक सराफा बाजारात सोन्याच्या भावात विक्रमी वाढ झाली आहे. आज 24 कॅरेट सोन्याच्या दरात तब्बल 2,940 रूपये प्रति 10 ग्रॅम इतकी वाढ झाली आहे. त्यामुळे सोन्याच्या स्वस्ताईच्या प्रतीक्षेत असणाऱ्या सर्वसामान्यांच्या खिशाला महागाईचा चटका बसला आहे. सोन्याच्या दरांत एका दिवसातील ही सर्वात मोठी वाढ ठरली आहे.

चांदी दरातही मोठी वाढ 

बुधवारी 24 कॅरेट सोन्याचा भाव हा 90,470 इतका होता. मात्र, आज या दरवाढीनंतर नाशिकच्या सराफ बाजारात 24 कॅरेट 10 ग्रॅम सोन्याचा दर 93,410 रुपये इतका आहे. तर 22 कॅरेट सोन्याचा दर 85630 रुपये इतका आहे. दुसरीकडे चांदी दरातही मोठी वाढ झाल्याचं चित्र पाहायला मिळत आहे. आज चांदीचा दर प्रति किलो 2 हजार रुपयांनी वाढून 95,000 रुपयावर पोहोचला आहे. त्यामुळे गेल्या काही दिवसांत कमी होत असलेले चांदीचे दर देखील पुन्हा वाढले आहेत.

पुढील काही वर्षांत सोन्याच्या किंमती 38 टक्के कमी होण्याचा तज्ज्ञांचा अंदाज 

दरम्यान, तज्ज्ञांनी दिलेल्या माहिनुसार, पुढील काही वर्षांत सोन्याच्या किंमती 38 टक्के कमी होऊ शकतात. अशा परिस्थितीत, भारतात सोन्याचे दर प्रति 10 ग्रॅम 55 हजार रुपयांपर्यंत कमी होण्याचा अंदाज आहे. मात्र, आज सोन्याच्या दरात झालेली मोठी वाढ पाहता आणि जागतिक अस्थिरता लक्षात घेऊन सध्या मौल्यवान धातूच्या किंमती 56,000 रुपयांपर्यंत कमी होतील, असा अंदाज लावणं कठीण आहे.

महत्वाच्या बातम्या: