Rice and Pulses Festival : तांदूळ, डाळ महोत्सवाला पुणेकरांचा प्रतिसाद, सेंद्रीय तांदळाला मोठी मागणी
पुण्यात दोन दिवसीय तांदूळ व डाळ महोत्सवाचं आयोजन करण्यात आलं होतं. या महोत्सवात एकूण 4 लाख 3 हजार 200 रुपयांची विक्रीची उलाढाल झाली आहे.
Rice and Pulses Festival : पुणे जिल्हा परिषद आणि उस्मानाबाद जिल्हा परिषद तसेच पुणे आणि उस्मानाबाद जिल्हा ग्रामीण विकास यंत्रणा यांच्या संयुक्त विद्यमाने दोन दिवसीय तांदूळ व डाळ महोत्सवाचं आयोजन करण्यात आलं होतं. या महोत्सवात एकूण 4 लाख 3 हजार 200 रुपयांची विक्रीची उलाढाल झाली आहे. पुणेकरांनी या महोत्सवात तांदूळ आणि डाळी खरेदीला चांगली पसंती दिली असल्याची माहिती पुणे जिल्हा ग्रामीण विकास यंत्रणेच्या प्रकल्प संचालक शालिनी कडू यांनी दिली.
उमेद महाराष्ट्र राज्य ग्रामीण जीवनोन्नती अभियानामार्फत महिला स्वयंसहायता समूहातील महिलांनी तयार केलेल्या उत्पादनांना बाजारपेठ उपलब्ध व्हावी, तसेच त्यांची आर्थिक उन्नती व्हावी या उद्देशाने हा महोत्सव आयोजित करण्यात आलेला होता. यामध्ये पुणे जिल्हा परिषद आणि उस्मानाबाद जिल्हा परिषदेनं पुढाकार घेतला होता. याला पुणेकरांनी चांगली प्रतिसाद दिल्याचे पाहायला मिळाले.
सेंद्रीय तांदळाला मागणी
महोत्सवामध्ये सेंद्रीय पद्धतीनं उत्पादित केलेला इंद्रायणी तांदूळ, आंबेमोहोर, कोलम, काळा तांदूळ, काळा गहू आणि उडीद, मटकी, मूग, हरभरा, तूर डाळ व राजमा विक्रीस ठेवण्यात आला होती. या सेंद्रीय तांदूळ, गहू, मूग, हरभऱ्याला मोठी मागणी असल्याचे चित्र दिसत होते. पुणे जिल्ह्यातील एकूण 10 महिला स्वयंसहायताकडून दोन दिवसांमध्ये 1 लाख 67 हजार 700 रुपये एवढी उलाढाल झालेली आहे. तसेच 250 किलोग्रॅम तांदळाची मागणी नोंदवण्यात आलेली आहे. उस्मानाबाद जिल्ह्यातील 5 महिला स्वयंसहायता समूहांची 2 लाख 35 हजार 500 रुपयांची डाळीची विक्री झाली आहे.
या महोत्सवास भारत सरकारच्या ग्राम विकास मंत्रालयाचे संचालक राघवेंद्र सिंग, 'उमेद', नवी मुंबई चे मुख्य कार्यकारी अधिकारी हेमंत वसेकर, जिल्हा परिषदेचे मुख्य कार्यकारी अधिकारी आयुष प्रसाद, उस्मानाबाद जिल्हा परिषद मुख्य कार्यकारी अधिकारी राहुल गुप्ता, पुणे स्मार्ट सिटीचे मुख्य कार्यकारी अधिकारी संजय कोलते, विभागीय आयुक्त कार्यालयाचे उपायुक्त (विकास) विजय कुमार मुळीक, जिल्हा ग्रामीण विकास यंत्रणा उस्मानाबादच्या प्रकल्प संचालक श्रीमती प्रांजल शिंदे, पुणे जिल्हा परिषदेचे अतिरिक्त मुख्य कार्यकारी अधिकारी कमलाकर रणदिवे तसेच विविध विभागातील अधिकारी व कर्मचारी यांनी महोत्सवास भेट देऊन खरेदी केली.
महत्त्वाच्या बातम्या
ट्रेंडिंग न्यूज
