Prestige Battle: एशियाटिक सोसायटी अध्यक्षपदासाठी दोन माजी खासदार रिंगणात, Kumar Ketkar विरुद्ध Vinay Sahasrabuddhe लढत

दोनशे वर्षांहून अधिक जुन्या आणि प्रतिष्ठित अशा ‘द एशियाटिक सोसायटी ऑफ मुंबई’च्या अध्यक्षपदाच्या निवडणुकीकडे सर्वांचे लक्ष लागले आहे. या निवडणुकीच्या रिंगणात दोन माजी खासदार उतरल्याने ही लढत अत्यंत चुरशीची झाली आहे. काँग्रेसचे माजी खासदार आणि ज्येष्ठ पत्रकार कुमार केतकर (Kumar Ketkar) यांचा सामना भाजपचे माजी खासदार विनय सहस्रबुद्धे (Vinay Sahasrabuddhe) यांच्याशी होणार आहे. 'एशियाटिक'चे भविष्यातील भगवीकरण रोखण्यासाठी मतदानाला या, असा एका गटाने प्रचार सुरु केला आहे, तर पारशी-बोहरींचे संस्थेवरील वर्चस्व संपवण्याचा दुसऱ्या गटाचा प्रचार आहे. ही निवडणूक ८ नोव्हेंबर रोजी होणार असून, त्यात केवळ अध्यक्षपदच नव्हे, तर उपाध्यक्ष आणि व्यवस्थापकीय समितीच्या जागांसाठीही मतदान होईल. वाढलेल्या १८०० नवीन सभासदांच्या नोंदणीवरून आणि मतदार याद्यांमधील घोळावरून आधीच वाद निर्माण झाला असून, हे प्रकरण धर्मादाय आयुक्तांपर्यंत पोहोचले आहे. त्यामुळे या निवडणुकीला वैचारिक आणि राजकीय संघर्षाचे स्वरूप आले आहे.