शिवसेनेचे माजी नगरसेवक एम. के. मढवींवर तडीपारीची कारवाई,  ठाणे जिल्हा आणि मुंबई उपनगरमध्ये येण्यास बंदी

Deportation : नवी मुंबई पोलिसांकडून शिवसेनेचे माजी नगरसेवक एम. के मढवी यांना दोन वर्षासाठी तडीपार करण्यात आले आहे. त्यांना ठाणे जिल्हा आणि मुंबई उपनगरमध्ये येण्यास दोन वर्षांसाठी बंदी करण्यात आली आहे.

shiv sena former corporator m k madhavi

मुंबई : शिवसेनेचे (shiv sena ) माजी नगरसेवक एम. के. मढवी यांना तडीपार करण्यात आले आहे.  नवी मुंबई पोलिसांकडून कारवाई करत  मढवी यांना दोन वर्षासाठी तडीपार करण्यात आले आहे.  मढवी हे उध्दव ठाकरे यांचे समर्थक असून दसरा मेळाव्यात देखील उद्धव ठाकरे यांनी आपल्या भाषणात त्यांचा उल्लेख केला होता.   

नवी मुंबई पोलिसांनी केलेल्या कारवाईत मढवी यांना ठाणे जिल्हा आणि मुंबई उपनगरमध्ये पुढील दोन वर्ष येण्यास बंदी घालण्यात आली आहे. मढवी यांच्यावर 18  गुन्ह्यांची नोंद आहे. यामध्ये मारहाण , जीवे मारण्याची धमकी आणि आर्थिक फसवणूक, सणासुधीसारख्या संवेदनशील काळात दंगल घडवणे , खुनाचा प्रयत्न करणे,  खून करणे,  खंडणीसाठी धमकावणे ,  सार्वजनिक ठिकाणी मानवी जिवीतास धोका पोचवणे अशा गंभीर गुन्ह्यांचा समावेश आहे.  त्यामुळेच पोलिसांकडून त्यांच्यावर तडीपारीची कारवाई करण्यात आली आहे.  

दरम्यान, गेल्याच आठवड्यात मढवी यांनी पोलिस उपायुक्त आणि मुख्यमंत्री एकनाथ शिंदे यांच्यावर गंभीर आरोप केले होते. शिंदे गटात सहभागी होत नसल्याने आपला एन्काऊंटर करू अशा धमक्या पोलिस देत असल्याचा गंभीर आरोप मढवी यांनी केला होता. त्यांच्या आरोपानंतर राजकीय वर्तुळाच एकच खळबळ उडाली होती. परंतु, आरोप केल्यानंतर अगदी एका महिन्याच्या आत त्यांच्यावर तडीपारीची कारवाई करण्यात आली आहे.   

दसरा मेळाव्यात उद्धव ठाकरेंकडून उल्लेख 
5 ऑक्टोबर रोजी शिवाजी पार्कवर शिवसेनेचा दसरा मेळावा पार पडला. या दसरा मेळाव्यात भाषण करताना शिवशेना पक्षप्रमुख उद्धव ठाकरे यांनी त्यांच्या भाषणात मढवी यांचा उल्लेख केला होता. एकनाथ शिंदे गटाकडून शिवसैनिकांना कशा प्रकारे त्रास दिला जातोय हे सांगत असताना मढवी यांचे उदाहरण उध्दव ठाकरे यांनी दिले होते.   

एन्काऊंटर करण्याच्या धमक्या दिल्याचा आरोप
एकनाथ शिंदे गटात सहभागी होण्यासाठी मुख्यमंत्र्यांकडून दबाव टाकला जात आहे. यासाठी पोलिस उपायुक्त विवेक पानसरे यांच्याकडून एन्काऊंटर करण्याच्या धमक्या दिल्या जात असल्याचा आरोप एम. के. मढवी यांनी केला होता. एम. के. मढवी, विनया मढवी, करण मढवी असे तीघेजण शिवसेनेकडून नगरसेवक झाले होते. एकनाथ शिंदे गटात सहभागी न होता मढवी परिवार उध्दव ठाकरे यांच्या बरोबर कायम राहिला आहे. आपण शिंदे गटात सहभागी होत नसल्यानं आपल्या विरोधात पोलिस कारवाई करून तडीपारीच्या नोटीसा काढल्या आहेत. यासाठी मुख्यमंत्री एकनाथ शिंदे, माजी नगरसेवक विजय चौगुले यांचा हात असल्याचा आरोप मढवींनी केला होता. एवढेच नाही तर या आरोपानंतर पोलिस उपयुक्तांची बदली न झाल्यास आम्ही सहकुटुंब आत्महत्या करू, असा इशारा देत माझ्या कुटुंबीयांना काहीही झाल्यास याला सर्वस्वी मुख्यमंत्री एकनाथ शिंदे, स्थानिक नेते विजय चौगुले, माजी आमदार संदीप नाईक आणि उपायुक्त विवेक पानसरे जबाबदार असतील असा इशाराही त्यांनी दिला होता. 

महत्वाच्या बातम्या