Mumbai-Goa Highway | Raigad मध्ये मुसळधार पाऊस, वाहतूक कोंडीने प्रवासी हैराण

रायगड जिल्ह्यात सकाळपासून सुरू असलेल्या मुसळधार पावसामुळे मुंबई-गोवा महामार्गाला मोठा फटका बसला आहे. नागोठणे कोलाड खांब परिसरात खड्ड्यांमुळे रस्त्यांवर मोठ्या प्रमाणावर पाणी साचले आहे. यामुळे वाहतुकीवर परिणाम झाला असून, वाहनांच्या लांबच लांब रांगा लागल्या आहेत. प्रवासी आणि वाहनचालकांना नाहक त्रास सहन करावा लागत आहे. पावसाचा जोर कायम राहिल्यास मुंबई-गोवा महामार्गावरील वाहतूक पूर्णपणे ठप्प होण्याची शक्यता वर्तवण्यात आली आहे. म्हसळा तालुक्यातही सकाळपासून तुफान पाऊस सुरू आहे. म्हसळा तालुक्यातील धोरजे गावाला जोडणारा छोटा पूल पाण्याखाली गेल्याने पाच गावांचा संपर्क तुटला आहे. म्हसळा-दिघी मार्गावरही पाणी साचल्याने वाहनचालकांची तारांबळ उडाली आहे. हवामान विभागाने रायगड जिल्ह्याला पुढील काही तास अति मुसळधार पावसाचा इशारा दिला आहे. दक्षिण रायगडमधील म्हसळा आणि श्रीवर्धन तालुक्यातही सकाळपासून पाऊस सुरू आहे. मुंबई-गोवा हायवेवरील सुकेली खिंडीजवळ आणि हॉटेल गोमांतक परिसरात रस्त्यावर पाणी साचले आहे. वाहतुकीची कोंडी झाली असून, वाहनांचा वेग मंदावला आहे. "अर्धवट स्थितीत सुरू असलेल्या मुंबई गोवा महामार्गाचं जे काम आहे त्याचा परिणाम वाहतुकीवरती पुन्हा एकदा पाहायला मिळत आहे."