ग्रँडमास्टर अभिमन्यू पुराणिकला जागतिक ज्युनिअर बुद्धिबळात रौप्य

जागतिक ज्युनियर बुद्धिबळाचं रौप्यपदक जिंकून अभिमन्यू पुराणिकने आजवरचं तिसरं मोठं यश मिळवलं.

मुंबई : महाराष्ट्राचा ग्रँडमास्टर अभिमन्यू पुराणिकने परदेशात भारताचा तिरंगा डौलाने फडकवला. तुर्कीतल्या जागतिक ज्युनियर बुद्धिबळ स्पर्धेत अभिमन्यूने रौप्य पदकावर आपलं नाव कोरलं. इराणच्या मघसुदलू परहामने सर्वाधिक साडेनऊ गुणांसह सुवर्णपदक पटकावलं. तर अभिमन्यूने 11 राऊंड्सअखेर साडेआठ गुणांची कमाई करत रौप्य पदकाची कमाई केली. अठरा वर्षांचा अभिमन्यू पुराणिक हा मूळचा पुण्याचा आहे. तो सिम्बायोसिस कॉलेजमध्ये बीकॉमच्या पहिल्या वर्षाला आहे. फिडे ट्रेनर जयंत गोखले हे अभिमन्यूचे प्रशिक्षक आहेत. अभिमन्यूने जागतिक ज्युनियर बुद्धिबळाचं रौप्यपदक जिंकून आजवरचं तिसरं मोठं यश मिळवलं. अभिमन्यूने 2015 साली आंतरराष्ट्रीय मास्टर आणि 2017 साली ग्रँडमास्टर हा किताब पटकावला होता.