Volleyball League Fraud in Nagpur : आपण बँकिंग आणि इतर ऑनलाईन व्यवहारांमध्ये फसवणुकीचे (Online Fraud) प्रकार नेहमीच ऐकत असतो. मात्र, आता ठगबाजांनी चक्क खेळाडूंनाच टार्गेट करत एकाच वेळी शेकडो वॉलीबॉलपटूंची फसवणूक केली आहे. वॉलीबॉल ज्युनियर प्रो लीगच्या नावाखाली नागपूरात ही फसवणूक (Volleyball League Fraud in Nagpur) करण्यात आली आहे. मागील काही दिवसांपासून सोशल मीडियावर वॉलीबॉल ज्युनियर प्रो लीगच्या (Junior Volleyball League) ट्रायलची जाहिरात झळकत होती. यावेळी प्रसिद्ध कबड्डी प्रो लीग सारखीच व्हॉलीबॉल प्रो लीग आयोजित करण्यात आल्याचे सांगण्यात आले होते. त्यासाठीचे ट्रायल्स 25 सप्टेंबर रोजी नागपूर जिल्ह्यातील कामठी येथे यशोदा हॉस्पिटल जवळच्या मैदानावर घेण्याचेही जाहिरातीत सांगण्यात आले.
अशाप्रकारच्या प्रो लीगमधून झटपट पैसा आणि झटपट प्रसिद्धी मिळेल, या आशेने राज्यभरातून शेकडो वॉलीबॉलपटूंनी ऑनलाईन नोंदणी केली. त्यासाठी प्रत्येक खेळाडूने 800 रुपये भरले. ट्रायल्सच्या दिवशी किट दिली जाईल असे सांगून अनेकांकडून अतिरिक्त पाच पाच हजार रुपये देखील घेण्यात आले. नागपूर, वर्धा, चंद्रपूर, गोंदिया सह ठाणे, पुणे, सातारा, सांगली अशा अनेक जिल्ह्यातून तरुण वॉलीबॉलपटू नागपूरात दाखल झाले होते. मात्र, नियोजित ठिकाणी पोहोचल्यावर जाहिरातीत नमूद केलेल्या मैदानात अशा कोणत्याच प्रकारचे ट्रायल्स आयोजित करण्यात आलं नसल्याचं दिसून आलं.
फसवणूक करणारी टोळी परप्रांतीय असल्याची शक्यता
खेळाडूंनी बराच तास वाटही पाहिली. त्यानंतर संबधित नंबरवर संपर्कही साधला, तेव्हा तो मोबाईल क्रमांक ही बंद आढळला. ज्यानंतर मात्र खेळाडूंना आपली फसवणूक झाल्याचे लक्षात आले आणि त्यांनी नागपूरच्या एमआयडीसी पोलीस स्टेशनमध्ये पोलीस तक्रार दिली आहे. दरम्यान आतापर्यंत कोणालाही अटक झालेली नाही. महाराष्ट्रातील तरुणांची फसवणूक करणारी ही मंडळी परप्रांतीय असल्याची माहितीही समोर येत आहे.
रंगतदार, सांघिक खेळ
एक अतिशय रंगतदार आणि भारतात बऱ्याच ठिकाणी खेळण्यात येणारा सांघिक खेळ म्हणजे वॉलीबॉल. या खेळात प्रत्येकी 6 खेळाडू असलेले दोन संघ उंच जाळी लावलेल्या कोर्टवर एकमेकांविरुद्ध आमने-सामने असतात. प्रत्येक संघ बॉल दुसऱ्या संघाच्या कोर्टमध्ये ढकलून टप्पा पाडण्याचा प्रयत्न करतो.मैदानाची लांबी 18 मीटर आणि रुंदी 9 मीटर असते. १८९५ साली अमेरिकेमध्ये सुरु झालेला हा खेळ जगभरात खेळला जातो. समुद्रकिनारी सर्वाधिक खेळला जाणारा खेळ म्हणजे वॉलीबॉलच आहे.
हे देखील वाचा-