धोनीच्या निवृत्तीचे संकेत, बीसीसीआयने वार्षिक कॉन्ट्रॅक्टमधून वगळलं

बीसीसीआयने आगामी मोसमासाठी टीम इंडियाच्या संभाव्य शिलेदारांची कॉन्ट्रॅक्ट यादी जाहीर केली असून, या यादीत माजी कर्णधार महेंद्रसिंग धोनीचा समावेश करण्यात आलेला नाही.

फोटो ; गेट्टी इमेज

मुंबई : बीसीसीआयने आगामी मोसमासाठी टीम इंडियाच्या संभाव्य शिलेदारांची कॉन्ट्रॅक्ट यादी जाहीर केली असून, या यादीत माजी कर्णधार महेंद्रसिंग धोनीचा समावेश करण्यात आलेला नाही. बीसीसीआयच्या कॉन्ट्रॅक्ट यादीत ए प्लस, ए, बी, सी या चार श्रेणींचा समावेश आहे. गत मोसमात धोनीचा समावेश पाच कोटी रुपयांचं वार्षिक मानधन असलेल्या ए श्रेणीत होता. पण यंदा त्याला एकाही श्रेणीच्या कॉन्ट्रॅक्ट यादीत समावून घेण्यात आलेलं नाही.

धोनी कसोटी क्रिकेटमधून 2014 सालीच निवृत्त झाला आहे. सध्या तो केवळ एकदिवसीय आणि टी-20 सामन्यांमध्येच भारताचं प्रतिनिधित्व करत होता. इंग्लंडमधल्या विश्वचषकानंतर धोनीने एकदिवसीय आणि टी-20 सामन्यांमधून सातत्याने माघार घेतली किंवा त्याला खेळवण्यात आलेलं नाही. त्यामुळे आता बीसीसीआयने धोनीला कॉन्ट्रॅक्ट देण्याचं टाळून, त्याला वेळीच निवृत्त होण्याचे संकेत दिले असल्याचे बोलले जात आहे.

बीसीसीआयनं आगामी मोसमासाठी जाहीर केलेल्या कॉण्ट्रॅक्ट यादीत कर्णधार विराट कोहली, एकदिवसीय उपकर्णधार रोहित शर्मा आणि जसप्रीत बुमराह या तीन शिलेदारांचा ए प्लस श्रेणीत समावेश केला आहे. या सर्वोच्च श्रेणीतल्या खेळाडूंना सात कोटी रुपयांचं वार्षिक मानधन देण्यात येईल.

बीसीसीआयने ए श्रेणीत अकरा खेळाडूंचा समावेश केला असून, त्यांना पाच कोटी रुपयांचं वार्षिक मानधन देण्यात येईल. या यादीत कसोटी उपकर्णधार अजिंक्य रहाणे, रवीचंद्रन अश्विन, रवींद्र जडेजा, भुवनेश्वर कुमार, चेतेश्वर पुजारा, के. एल. राहुल, शिखर धवन, मोहम्मद शमी, इशांत शर्मा, कुलदीप यादव आणि ऋषभ पंतचा समावेश आहे.

बीसीसीआयनं बी श्रेणीत पाच खेळाडूंचा समावेश केला आहे. या यादीत वृद्धीमान साहा, उमेश यादव, यजुवेंद्र चहल, हार्दिक पांड्या, मयांक अग्रवाल यांचा समावेश करण्यात आला आहे. या खेळाडूंना वार्षिक तीन कोटी रुपयांचं वार्षिक मानधन दिलं जाणार आहे.

सी श्रेणीत एकूण आठ खेळाडूंचा समावेश करण्यात आला आहे. या खेळाडूंना एक कोटी रुपयांचं वार्षिक मानधन देण्यात येईल. या यादीत केदार जाधव, नवदीप सैनी, दीपक चहर, मनिष पांडे, हनुमा विहारी, शार्दुल ठाकूर, श्रेयस अय्यर आणि वॉशिंग्टन सुंदर या खेळाडूंचा समावेश करण्यात आला आहे.