कुणाची हॉटेलमध्ये बॉडी मिळाली, तर कुणाला गोळ्यांनी झाडलं! जेव्हा 'त्या' 4 क्रिकेटर्सच्या हत्येने संपूर्ण क्रीडाविश्व हादरलं
क्रिकेटला जेंटलमॅन गेम म्हटलं जातं. सुमारे 149 वर्षांपूर्वी सुरू झालेला हा खेळ काळानुसार खूप बदलला आणि आज जगभरात त्याचे कोट्यवधी चाहते आहेत.
क्रिकेटला जेंटलमॅन गेम म्हटलं जातं. सुमारे 149 वर्षांपूर्वी सुरू झालेला हा खेळ काळानुसार खूप बदलला आणि आज जगभरात त्याचे कोट्यवधी चाहते आहेत. सामान्यतः क्रिकेटचा गुन्हेगारी किंवा हिंसाचाराशी काहीही संबंध नसतो, पण इतिहासात काही अशा दुर्दैवी घटना घडल्या आहेत ज्यांनी संपूर्ण क्रीडाजगत हादरून गेले. येथे आपण अशाच चार क्रिकेटपटूंविषयी जाणून घेणार आहोत, ज्यांच्या अकस्मात आणि धक्कादायक मृत्यूंनी खळबळ उडवली. यामध्ये एका तरुण खेळाडूची कारकीर्द सुरू होण्याआधीच त्याची हत्या करण्यात आली होती.
लुईस वोर्स्टर : भरदिवसा गोळ्या झाडून हत्या
लुईस वोर्स्टर हे दक्षिण आफ्रिका आणि नामिबियासाठी खेळलेले नामांकित क्रिकेटपटू होते. क्रिकेटप्रती असलेल्या त्यांच्या आवडीमुळे ते दक्षिण आफ्रिकेतून नामिबियात स्थलांतरित झाले होते. ते डावखुरे फलंदाज आणि उजव्या हाताने ऑफ-ब्रेक गोलंदाजी करणारे ऑलराऊंडर होते. त्यांनी 95 प्रथम श्रेणी आणि 96 लिस्ट ए सामने खेळले होते. ऑक्टोबर 2009 मध्ये त्यांनी शेवटचा सामना खेळला. 2012 साली, वयाच्या 45व्या वर्षी सेंचुरियन, गौतेंग येथे सशस्त्र दरोड्यादरम्यान त्यांच्यावर गोळीबार करून त्यांची हत्या करण्यात आली. या घटनेने दक्षिण आफ्रिका आणि नामिबियातील क्रिकेटविश्वाला मोठा धक्का बसला.
राहतुल्लाह : 18व्या वर्षी दुर्दैवी अंत
राहतुल्लाह हा पाकिस्तानचा एक होतकरू वेगवान गोलंदाज होता. तो पाकिस्तान अंडर-19 संघाचा भाग राहिला होता आणि त्याचं भविष्य उज्ज्वल मानलं जात होतं. मात्र एका भयंकर घटनेने त्याची स्वप्नं अधुरीच राहिली. घरगुती स्पर्धेसाठी तो पेशावरला जात असताना अज्ञात हल्लेखोरांनी त्याची हत्या केली. एका उर्दू वृत्तपत्रानुसार, घरातून बाहेर पडल्यानंतर दोन दिवसांनी त्याचा मृतदेह सापडला. त्या वेळी तो फक्त 18 वर्षांचा होता.
कुंतल चंद्रा : क्रूर पद्धतीने खून
कुंतल चंद्रा, ज्याला ‘पापोन’ या नावानेही ओळखलं जात होतं, हा बांग्लादेशचा क्रिकेटपटू होता. तो उजव्या हाताचा फलंदाज असून अधूनमधून यष्टिरक्षणही करत असे. 2000 साली बांग्लादेश अंडर-19 संघासाठी खेळल्यानंतर त्याने 2004-05 मध्ये चिटगाव विभागाकडून प्रथम श्रेणी क्रिकेटमध्ये पदार्पण केले. पहिल्याच सामन्यात त्याने 5 झेल घेतले आणि 71 व 33 धावांची उपयुक्त खेळी केली. मात्र, चांगली सुरुवात असूनही त्याला केवळ तीन प्रथम श्रेणी आणि दोन लिस्ट ए सामने खेळण्याची संधी मिळाली. 3 डिसेंबर 2012 रोजी ढाक्याबाहेरील रस्त्याच्या कडेला त्याचा मृतदेह सापडला. त्याच्या डोळ्यांवर पट्टी बांधलेली होती आणि तोंडात कापड कोंबलेलं होतं. या क्रूर हत्येने संपूर्ण बांग्लादेशी क्रिकेटविश्व हादरून गेले.
बॉब वूल्मर : हॉटेलच्या खोलीत मृत्यू
बॉब वूल्मर हे इंग्लंडचे माजी क्रिकेटपटू आणि पाकिस्तान संघाचे मुख्य प्रशिक्षक होते. 2007 च्या क्रिकेट विश्वचषकादरम्यान, पाकिस्तान संघ आयर्लंडकडून पराभूत होऊन स्पर्धेबाहेर पडला. त्यानंतरच्या दिवशी जमैकातील किंग्स्टन येथील हॉटेलच्या खोलीत वूल्मर मृतावस्थेत आढळले. सुरुवातीला त्यांच्या गळा दाबून हत्या झाल्याचा संशय व्यक्त करण्यात आला, मात्र पुढील तपासात ठोस निष्कर्ष निघू शकला नाही. त्यांच्या मृत्यूचं गूढ आजही कायम आहे आणि क्रिकेट इतिहासातील सर्वात मोठ्या अनुत्तरित रहस्यांपैकी एक मानलं जातं.
हे ही वाचा -
महत्त्वाच्या बातम्या
