IND W vs AUS W 3rd T20: भारतीय महिला संघ आणि ऑस्ट्रेलिया महिला संघात (India Women vs Australia Women) आज तिसरा टी-20 सामना खेळला जाणार आहे. मुंबईच्या (Mumbai) ब्रेबॉर्न स्टेडियमवर (Brabourne Stadium) दोन्ही संघ आमने सामने येणार आहेत. पाच सामन्यांच्या मालिकेतील पहिला सामना गमावल्यानंतर भारतीय संघानं दुसऱ्या सामन्यात ऑस्ट्रेलियावर थरारक विजय मिळवत मालिकेत 1-1 अशी बरोबरी साधली. दरम्यान, आजचा सामना जिंकून मालिकेत मजबूत पकड बनवण्यासाठी दोन्ही संघ मैदानात उतरतील. दुसऱ्या टी-20 सामन्यात जबरदस्त फलंदाजी करणाऱ्या भारतीय सलामीवीर स्मृती मानधनावर (Smriti Mandhana) सर्वांचं लक्ष असेल. भारत आणि ऑस्ट्रेलिया यांच्यातील तिसरा टी-20 सामना कधी, कुठं खेळला जाईल? याबाबत सविस्तर माहिती जाणून घेऊयात.


कधी, कुठं पाहता येणार सामना?
भारतीय महिला आणि ऑस्ट्रेलिया महिला यांच्यातील तिसरा टी-20 सामना आज (14 डिसेंबर) मुंबईच्या ब्रेबॉर्न स्टेडियम येथे खेळवला जाईल. हा सामना स्टार स्पोर्ट्स नेटवर्कवर थेट प्रसारित केला जाईल. भारतीय वेळेनुसार, या सामन्याला संध्याकाळी 7:00 वाजता सुरूवात होईल. यापूर्वी अर्धातास नाणेफेक होईल. या सामन्याचे लाईव्ह स्ट्रिमिंग डिज्नी प्लस हॉटस्टारवर पाहता येईल. तसेच या सामन्याचे प्रत्येक अपडेट्स जाणून घेण्यासाठी तुम्ही एबीपी माझाच्या वेबसाईटवर भेट देऊ शकतात.


हेड टू हेड रेकॉर्ड
भारतीय महिला आणि ऑस्ट्रेलिया यांच्यात आतापर्यंत 26 आंतरराष्ट्रीय टी-20 सामने खेळले गेले आहेत. यापैकी ऑस्ट्रेलियाच्या संघानं 18 सामने जिंकले आहेत. तर, भारताला फक्त सात सामन्यात विजय मिळवता आलाय. यातील एक सामना अर्निर्णित ठरलाय. ही आकडेवारी पाहता ऑस्ट्रेलियाच्या संघाचं पारडं जडं दिसत आहे. 


भारताचं उत्कृष्ट प्रदर्शन
मुंबईच्या डीवाय पाटील स्टेडियममध्ये खेळण्यात आलेल्या दुसऱ्या टी-20 सामन्यात भारतानं ऑस्ट्रेलियाचा धुव्वा उडवला. या सामन्यात ऑस्ट्रेलियानं दिलेल्या 188 धावांचा पाठलाग करताना भारतीय संघाला 187 धावापर्यंत मजल मारता आली. त्यानंतर सुपरओव्हर सामन्यात स्मृती मानधना रिचा घोष यांच्या फटकेबाजीच्या जोरावर भारतानं प्रथम फलंदाजी करत ऑस्ट्रेलियासमोर 21 धावांचं लक्ष्य ठेवलं. त्यानंतर भारताची वेगवान गोलंदाज रेणुका ठाकूरनं भेदक गोलंदाजी करत ऑस्ट्रेलियाच्या फलंदाजांचे हात बांधून ठेवले. ज्यामुळं सामन्याचा निकाल भारताच्या बाजूनं लागला. या विजयासह भारतानं पाच सामन्यांच्या टी-20 मालिकेत 1-1 अशी बरोबरी साधलीय. 


संघ:


भारतीय महिला संघ:
स्मृती मानधना, शेफाली वर्मा, जेमिमाह रॉड्रिग्स, हरमनप्रीत कौर (कर्णधार), ऋचा घोष (विकेटकिपर), दीप्ती शर्मा, देविका वैद्य, राधा यादव, अंजली सरवाणी, मेघना सिंह, रेणुका ठाकूर सिंह, राजेश्वरी गायकवाड, एस. मेघना, हरलीन देओल, यास्तिका भाटिया.


ऑस्ट्रेलिया महिला संघ:
अ‍ॅलिसा हिली (विकेटकिपर/ कर्णधार), बेथ मूनी, ताहलिया मॅकग्रा, ऍशलेग गार्डनर, एलिस पेरी, फोबी लिचफिल्ड, अॅनाबेल सदरलँड, हेदर ग्रॅहम, अलाना किंग, किम गर्थ, मेगन शुट, ग्रेस हॅरिस, निकोला कॅरी, डार्सी ब्राउन.



हे देखील वाचा-