IND vs AUS, Toss Update : नाणेफेकीचा कौल भारताच्या बाजूने, प्रथम गोलंदाजी करण्याचा निर्णय
India vs Australia, ODI : मुंबईच्या वानखेडे मैदानावर आज भारत विरुद्ध ऑस्ट्रेलिया पहिली एकदिवसीय लढत रंगणार आहे. तीन सामन्यांच्या मालिकेतील हा पहिलाच सामना आहे.
IND vs AUS, ODI Match Toss : भारत आणि ऑस्ट्रेलिया (IND vs AUS) यांच्यात आजपासून (17 मार्च) एकदिवसीय सामन्यांना सुरुवात होत आहे पहिला सामना मुंबईच्या वानखेडे मैदानात (Wankhede Stadium) सुरु होत असून नुकतीच नाणेफेक पार पडली आहे. भारतीय संघाचा आजच्या सामन्यासाठीचा कर्णधार हार्दिक पांड्याने नाणेफेक (Toss) जिंकत प्रथम गोलंदाजी करण्याचा निर्णय घेतला आहे. आजच्या सामन्याची खेळपट्टी फलंदाजीसाठी उपयुक्त असल्याने एक मोठी धावसंख्या उभा राहू शकते. पण अशातच धावांचा पाठलागही केला जाऊ शकत असल्याने पांड्याने हा धाडसी निर्णय घेतला आहे.
भारतीय संघाचा विचार केल्यास रोहित शर्मा सोडता इतर दमदार आणि दिग्गज खेळाडू संघात आहेत. विराट कोहलीही संघात असून विशेष म्हणजे केएल राहुल मधल्या फळीत फलंदाजीला येणार आहे. कुलदीप यादव आणि शार्दूल ठाकूरही बऱ्याच काळानंतर संघात परतत आहेत. दरम्यान ऑस्ट्रेलियाविरुद्धच्या पहिल्या वनडेत वैयक्तिक कारणांमुळे नियमित कर्णधार रोहित शर्मा गैरहजर आहे. त्यामुळे त्याच्या जागी हार्दिक पांड्या पहिल्या वनडेत कर्णधारपद सांभाळत आहे. हार्दिक वनडेत भारताची धुरा सांभाळण्याची ही पहिलीच वेळ असेल. यापूर्वी त्याने टी-20 मध्ये टीम इंडियाचे नेतृत्व केले आहे. दरम्यान, जसप्रीत बुमराहच्या अनुपस्थितीत त्याने टीम इंडियाच्या बॉलिंग युनिटला पाठिंबा दिला आहे.
कशी आहे दोन्ही संघाची अंतिम 11?
भारतीय संघ : शुभमन गिल, इशान किशन (विकेटकीपर), विराट कोहली, सूर्यकुमार यादव, केएल राहुल, हार्दिक पांड्या (कर्णधार), रवींद्र जडेजा, शार्दुल ठाकूर, कुलदीप यादव, मोहम्मद सिराज, मोहम्मद शमी
ऑस्ट्रेलिया संघ : ट्रॅव्हिस हेड, मिचेल मार्श, स्टीव्हन स्मिथ (कर्णधार), मार्नस लॅबुशॅग्ने, जोश इंग्लिस (विकेटकीपर), कॅमेरॉन ग्रीन, ग्लेन मॅक्सवेल, मार्कस स्टॉइनिस, शॉन अॅबॉट, मिचेल स्टार्क, अॅडम झाम्पा
कुठे पाहाल लाईव्ह स्ट्रिमिंग?
भारत आणि ऑस्ट्रेलिया यांच्यातील एकदिवसीय सामन्याचं थेट प्रक्षेपण स्टार स्पोर्ट्स 1 या चॅनेलवर दुपारी 1.00 वाजता सुरु होईल. तसंच या सामन्याचं ऑनलाईन लाईव्ह स्ट्रीमिंग हॉटस्टार या अॅप आणि वेबसाइटवरुन पाहता येईल.
कसोटी मालिका जिंकून आता लक्ष्य एकदिवसीय मालिका
भारत आणि ऑस्ट्रेलिया (IND vs AUS) यांच्यात पार पडलेल्या कसोटी मालिकेतील सुरुवातीचे दोन्ही सामने जिंकल्यामुळे टीम इंडियाने (Team India) मालिका 2-1 ने जिंकत बॉर्डर-गावस्कर (BGT 2023) ट्रॉफी खिशात घातली. चौथा सामना अनिर्णित ठरला असला तरी मालिका भारतानेच जिंकली.
हे देखील वाचा-
महत्त्वाच्या बातम्या
