दक्षिण आफ्रिकेविरुद्धच्या सामन्यांनाही हार्दिक मुकणार? खराब फॉर्म नाही तर दुसरंच आहे कारण

Indian Cricket team मधील अष्टपैलू खेळाडू हार्दिक पंड्या मागील काही काळापासून खराब फॉर्ममध्ये असल्याने त्याची कामगिरीही निराशाजनक होत आहे. ज्यामुळे न्यूझीलंडविरुद्धही तो संघात दिसला नाही.

मुंबई: अव्वल दर्जाचे खेळाडू असतानाही यंदाच्या टी20 विश्वचषकात (T20 World Cup 2021) भारतीय संघ (Indian Cricket team) सेमीफायनलपर्यंतही पोहचू शकला नाही. त्यामुळे आता संघात अनेक नवे बदल करण्यात येत असून आगामी आयसीसी स्पर्धांपूर्वी भारताला एक मजबूत संघ बनवण्यासाठी बीसीसीआय (BCCI) सज्ज झाला आहे. दरम्यान भारत विरुद्ध न्यूझीलंड सामन्यातही संघात काही बदल करण्यात आले. ज्यातील मोठा बदल म्हणजे संघाचा स्टार अष्टपैलू खेळाडू हार्दिक पंड्या (Hardik Pandya) याला विश्रांती देण्यात आली होती. दरम्यान न्यूझीलंड नंतर भारतीय संघ दक्षिण आफ्रिका संघाशी भिडणार असून यावेळी तरी हार्दीकला संधी मिळेल का? हा प्रश्न सध्या उपस्थित होत आहे.

येत्या 17 डिसेंबरपासून आफ्रिका आणि भारत यांच्यातील सामन्यांना सुरुवात होणार आहे. तत्पूर्वी हार्दीक या दौऱ्यात खेळणार का? याबाबत काही महत्त्वाच्या गोष्टी समोर येत आहेत. खराब फॉर्ममुळे संघाबाहेर गेलेला हार्दीक आफ्रिकेविरुद्ध संघात परतू शकतो. मात्र यावेळी त्याला गोलंदाजीसाठी संपूर्णपणे फिट होणे गरजेचे आहे. त्यामुळे आता खराब फॉर्मसह फिटनेस हे कारणही पंड्याच्या संघात पुनरागमनातील अडचण होत आहे. 

हार्दीकला फिटनेस टेस्ट अनिवार्य

याबाबत एका बीसीसीआयच्या अधिकाऱ्याने दिलेल्या माहितीनुसार, 'जर हार्दिक पंड्याला संघात परतायचे असेल तर त्याला एनसीएची फिटनेस टेस्ट पास करावी लागेल. हार्दिकला संघात पुनरागमनासाठी संपूर्णपणे फिट होणे अत्यंत गरजेचे आहे.  पंड्याचे दुखापतीतून सावरणे विश्रांतीवर अवलंबून आहे. त्याने लवकरात लवकर एनसीए गाठावे, त्यानंतर आम्ही त्याच्या दक्षिण आफ्रिका दौऱ्यावर जाण्याबाबत निर्णय घेऊ.” सीसीआयच्या अधिकाऱ्याने असेही सांगितले की, हार्दिक पंड्या सध्या कसोटी सामने खेळण्यासाठी तंदुरुस्त (फिट) नाही, कारण या फॉरमॅटमध्ये अधिक फिटनेस आवश्यक हार्दिक पंड्याला सर्व फॉर्मेटमध्ये खेळण्यासाठी वेळ लागेल. आम्ही घाई करत नाही, कारण लवकरच विश्वचषक स्पर्धा पुन्हा येणार आहे. ज्यात खेळण्याच्या दृष्टीने हार्दीक फिटनेस टेस्ट पास झाला तर त्याला दक्षिण आफ्रिकेविरुद्धच्या वनडे आणि टी-20 मालिकेत संधी मिळू शकते. 

अय्यरचा पर्यायही उपलब्ध

पंड्याच्या फिटनेससह आणखी एक अडचण म्हणजे पंड्याला उपलब्ध झालेला वेंकटेश अय्यर हा पर्याय. आयपीएलच्या दुसऱ्या पर्वात युएईमध्ये केकेआर संघातून खेळण्यास सुरुवात केलेल्या वेंकटेशने काही सामन्यातच आपला खेळ दाखवत सर्वांची मनं जिकंली. अय्यरने काही अर्धशतकांसह विकेट्सही मिळवल्या. ज्यानंतर आता न्यूझीलंड दौऱ्यात लगेचच अय्यरला संधीही मिळाली. यावेळी अय्यरने पहिल्या दोन सामन्यात फलंदाजीसह तिसऱ्य़ा सामन्यात गोलंदाजीही केली. ज्यावेळी त्याने एक विकेटही मिळवली. ज्यामुळे आता पंड्याच्या पुनरागमनात
अय्यरही एक काटा असल्याचं दिसत आहे.  

संबधित बातम्या-

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha