Hardik Pandya Trade IPL 2027 : हार्दिकच्या ट्रेडमध्ये खतरनाक ट्विस्ट; MI अन् CSK दोन्ही फ्रेंचायजींनी अखेर सांगितली आतली गोष्ट, नक्की कोणत्या संघांत जाणार पांड्या?
Hardik Pandya Trade IPL 2027 Update : आयपीएल 2026 संपल्यानंतर भारताचा स्टार अष्टपैलू हार्दिक पांड्या पुन्हा एकदा चर्चेच्या केंद्रस्थानी आला आहे.
Hardik Pandya Trade IPL 2027 Update : आयपीएल 2026 संपल्यानंतर भारताचा स्टार अष्टपैलू हार्दिक पांड्या पुन्हा एकदा चर्चेच्या केंद्रस्थानी आला आहे. गेल्या काही दिवसांपासून हार्दिक पंड्या मुंबई इंडियन्स (MI) सोडून चेन्नई सुपर किंग्स (CSK) मध्ये जाणार असल्याच्या चर्चा जोरात सुरू होत्या. दोन्ही फ्रँचायझींमध्ये ट्रेडबाबत बोलणी अंतिम टप्प्यात पोहोचल्याच्याही बातम्या समोर आल्या होत्या. मात्र, आता या सर्व चर्चांवर मुंबई इंडियन्स आणि चेन्नई सुपर किंग्स या दोन्ही संघांनी अधिकृत भूमिका स्पष्ट केली आहे.
CSK चे CEO म्हणाले, हार्दिकबाबत कोणताही प्रस्ताव नाही
'क्रिकबझ'च्या वृत्तानुसार, चेन्नई सुपर किंग्सचे मुख्य कार्यकारी अधिकारी (CEO) काशी विश्वनाथन यांनी हार्दिक पांड्याबाबत सुरू असलेल्या चर्चांना पूर्णविराम देण्याचा प्रयत्न केला आहे. त्यांनी स्पष्टपणे सांगितले की, हार्दिक पंड्याला संघात घेण्याबाबत सध्या कोणताही प्रस्ताव त्यांच्या टेबलावर आलेला नाही. त्यांनी पुढे सांगितले की, सध्या मेजर लीग क्रिकेट (MLC) स्पर्धा सुरू असल्यामुळे फ्रँचायझीने अजून आयपीएल 2026 हंगामाचा संपूर्ण आढावा पूर्ण केलेला नाही. हा आढावा पूर्ण झाल्यानंतरच ट्रेड विंडोमध्ये कोणत्या खेळाडूंना लक्ष्य करायचे याचा निर्णय घेतला जाईल.
मुंबई इंडियन्सनेही अफवा फेटाळल्या
दुसरीकडे, मुंबई इंडियन्सनेही हार्दिक पंड्याच्या ट्रेडच्या चर्चांना सध्या कोणताही आधार नसल्याचे स्पष्ट केले आहे. फ्रँचायझीच्या प्रवक्त्याने सांगितले की, मुंबई इंडियन्स सध्या कोणत्याही खेळाडूच्या ट्रेडबाबत चर्चा करत नाही. संघाचा पोस्ट-सीझन रिव्ह्यू नुकताच सुरू झाला असून तो पूर्ण झाल्यानंतरच खेळाडूंच्या भवितव्याबाबत निर्णय घेतले जातील. रिलायन्स इंडस्ट्रीज लिमिटेड (RIL) च्या वार्षिक सर्वसाधारण सभेनंतर मुंबई इंडियन्सने संपूर्ण हंगामाचे सखोल मूल्यांकन सुरू केले आहे. यावेळी फक्त खेळाडूंच्या कामगिरीचाच नाही, तर कोचिंग स्टाफ, सपोर्ट स्टाफ, रणनीती आणि संपूर्ण व्यवस्थापनाच्या कामगिरीचाही बारकाईने आढावा घेतला जात आहे. फ्रँचायझीच्या म्हणण्यानुसार, प्रत्येक पर्यायाचा विचार करून भविष्यातील नियोजन केले जाणार आहे. त्यामुळे कोणताही मोठा निर्णय घेण्यापूर्वी सर्व बाबींचे विश्लेषण केले जाईल.
मग हार्दिकचा ट्रेड पूर्णपणे रद्द झाला का?
क्रिकबझच्या वृत्तानुसार, हार्दिक पांड्या आणि मुंबई इंडियन्सच्या व्यवस्थापनामध्ये काही पातळीवर चर्चा झाल्याची माहिती समोर आली आहे. मात्र, दोन्ही बाजूंनी याबाबत अधिकृतरीत्या कोणतीही पुष्टी केलेली नाही. याशिवाय अंतिम निर्णय घेण्यापूर्वी मुख्य प्रशिक्षक आणि सपोर्ट स्टाफकडून सविस्तर अहवाल मागवण्यात आला आहे. या अहवालांच्या आधारेच संघाच्या भविष्यातील योजनांवर शिक्कामोर्तब होणार आहे. म्हणूनच हार्दिकचा ट्रेड पूर्णपणे रद्द झालेला नसला तरी त्याबाबत कोणतीही घाई केली जाणार नाही, हे स्पष्ट झाले आहे.
आयपीएल 2027 मध्ये हार्दिकसाठी अनेक संघ मैदानात?
जर भविष्यात हार्दिक पंड्या ट्रेड विंडोमध्ये उपलब्ध झाला, तर त्याच्यासाठी फक्त चेन्नई सुपर किंग्सच नव्हे, तर इतरही अनेक मोठे संघ प्रयत्न करू शकतात. कोलकाता नाईट रायडर्स (KKR), राजस्थान रॉयल्स (RR) आणि दिल्ली कॅपिटल्स (DC) या सर्व फ्रँचायझी हार्दिकसारख्या अनुभवी अष्टपैलू खेळाडूला आपल्या संघात घेण्यासाठी उत्सुक असतील.
सर्वात मोठा प्रश्न अजूनही कायम
हार्दिक पंड्याच्या भवितव्याबाबत अंतिम निर्णय घेण्यापूर्वी सर्वात महत्त्वाचा मुद्दा म्हणजे मुंबई इंडियन्सला त्याच्या बदल्यात समाधानकारक ट्रेड पॅकेज मिळते का? जोपर्यंत हा प्रश्न सुटत नाही, तोपर्यंत हार्दिकचा ट्रेड निश्चित झाल्याचे म्हणणे योग्य ठरणार नाही. सध्या मुंबई इंडियन्सकडून सर्व पर्यायांचा विचार सुरू असून पोस्ट-सीझन रिव्ह्यू पूर्ण झाल्यानंतरच हार्दिक पांड्याच्या भवितव्याबाबत अंतिम चित्र स्पष्ट होण्याची शक्यता आहे.
हे ही वाचा -
महत्त्वाच्या बातम्या
