Maharashtra Vidhansabha 2024: सेना भवनाच्या दारात हायव्होल्टेज लढत.... अमित ठाकरे सरवणकरांना भिडणार!

विधानसभा निवडणूक जाहीर झाल्यानंतर आता राजकीय पक्षांकडून उमेदवारांची घोषणा होऊ लागली आहे. भाजप, शिवसेना शिंदे गटासह महाराष्ट्र नवनिर्माण सेनेने आपल्या उमेदवारांच्या नावाची घोषणा केली. राज ठाकरे यांचे पुत्र अमित ठाकरे हे देखील निवडणुकीच्या मैदानात उतरले आहेत. अमित ठाकरे यांना दादर-माहीममधून उमेदवारी जाहीर करण्यात आली आहे.

तर, दुसरीकडे शिवसेना शिंदे गटाने विद्यमान आमदार सदा सरवणकर यांना पुन्हा उमेदवारी दिली आहे. शिवसेना भवन असलेल्या मतदारसंघात शिवसेना ठाकरे गटानेही उमेदवार देण्याची तयारी सुरू केली आहे. अमित ठाकरे यांना उमेदवारी जाहीर झाल्यानंतर आता दादर-माहीममधील लढत हायव्होलेटज लढत झाली आहे.

तर, दुसरीकडे शिवसेनेतील एकनाथ शिंदे यांना साथ देणारे आमदार सदा सरवणकर हे देखील निवडणुकीच्या रिंगणात असणार आहेत. अमित ठाकरे यांना उमेदवारी जाहीर झाल्यानंतर त्यांच्याविरोधात उमेदवार दिला जाणार नसल्याचे म्हटले जात होते.

शिवसेना शिंदे गट अमित ठाकरे यांना पाठिंबा देईल अशी चर्चा होती. मात्र, शिंदे गटाने आपल्या उमेदवाराची घोषणा केली.

तसेच उद्धव ठाकरे हे माहीममध्ये आदित्य ठाकरे यांच्या विरोधात उमेदवार देणार नाहीत अशी चर्चा राजकीय वर्तुळात आहे. मनसेने एकदा दादर-माहीममधून विजय मिळवला होता. 2009 मनसेचे नितीन सरदेसाई यांनी शिवसेनेतून काँग्रेसमध्ये गेलेले सदा सरवणकर यांचा पराभव केला होता. शिवसेनेचे आदेश बांदेकर हे तिसऱ्या स्थानी होते.