Shardiya Navratri 2025 : नवरात्रीच्या 9 दिवसांत देवीला करा प्रसन्न; बनवा 'हे' 9 प्रकारचे नैवेद्य

Shardiya Navratri 2025 : नवरात्रीच्या नऊ दिवसांत तुम्ही देवीला वेगवेगळ्या प्रकारचे नैवेद्य अर्पण करु शकतात.

Shardiya Navratri 2025

गणेशोत्सवानंतर आता लवकरच नवरात्रीला सुरुवात होणार आहे. येत्या 22 सप्टेंबरपासून शारदीय नवरात्रीचा उत्सव सुरु होतोय. यामध्ये नऊ दिवस देवीच्या नऊ वेगवेगळ्या रपांची पूजा केली जाते. असं म्हणतात, देवीच्या प्रत्येक रुपाला तिचा आवडता नैवेद्य अर्पण केल्याने मनातील सर्व इच्छा पूर्ण होतात आणि देवीचा आशीर्वाद मिळतो.

नवरात्रीचा पहिला दिवस देवी शैलपुत्रीला समर्पित आहे. या दिवशी देवीला शुद्ध तुपापासून बनवलेली मिठाई अर्पण करा. यामुळे तुमचं आरोग्य निरोगी राहण्यास मदत होईल.

नवरात्रीचा दुसरा दिवस ब्रह्मचारिणी मातेला समर्पित आहे. या देवीला साखर आणि पंचामृत अर्पण करावे. देवीला हे अर्पण केल्याने दीर्घायुष्य लाभते.

नवरात्रीच्या तिसऱ्या दिवशी देवी चंद्रघंटेला खीर किंवा दुधापासून बनवलेली मिठाई अर्पण करा. यामुळे तुमच्या जीवनातील सर्व संकटे दूर होतात.

नवरात्रीच्या चौथ्या दिवशी तुम्ही कुष्मांडा देवीसाठी मालपोह्याचा नैवेद्य दाखवू शकता. याद्वारे बुद्धी आणि ज्ञान प्राप्त होते.

नवरात्रीचा पाचवा दिवस स्कंद मातेला समर्पित आहे. या दिवशी तुम्ही देवीला केळ्याचा नैवेद्य दाखवू शकता. यामुळे तुमच्या मनातील इच्छा पूर्ण होतील.

नवरात्रीच्या सहाव्या दिवशी देवी कात्यायनीची पूजा करावी. देवीच्या या रूपाला मध आणि गोड पान अर्पण करावे. असं म्हणतात की, हे अन्न अर्पण केल्याने सौंदर्य वाढते.

नवरात्रीचा सातवा दिवस देवी कालरात्रीला समर्पित आहे. देवीच्या या रूपाला गूळ किंवा गुळापासून बनवलेली मिठाई अर्पण करावी. यामुळे जीवनातील सर्व काही शुभ होते.

नवरात्रीचा आठवा दिवस देवी महागौरीला समर्पित आहे. देवीच्या या रूपाला नारळ किंवा नारळापासून बनवलेली मिठाई अर्पण करावी.

नवरात्रीच्या शेवटच्या दिवशी देवी सिद्धिदात्रीची पूजा करावी. या दिवशी देवीला खीर, पुरी आणि शिरा अर्पण करावा.

(टीप : वरील सर्व बाबी एबीपी माझा केवळ माहिती म्हणून वाचक-प्रेक्षकांपर्यंत पोहोचवत आहे. यातून एबीपी माझा कोणताही दावा करत नाही.)