हाफिज सईद दहशतवाद्यांच्या यादीत, पाकिस्तानच्या पंजाब सरकारची कारवाई

इस्लामाबाद: पाकिस्तानच्या पंजाब सरकारनं मुंबई 26/11 हल्ल्याचा मास्टरमाईंड आणि जमात उल दावाचा प्रमुख हाफिज सईदला दहशतवाद विरोधी कायद्याच्या अंतर्गत आणून तो दहशतवादी असल्याचं जवळजवळ मान्य केलं आहे. डॉन न्यूजच्या मते, पंजाब सरकारनं सईद आणि त्याचा साथीदार काझी काशिफला दहशतवाद विरोधी कायद्याच्या (एटीए) चौथ्या यादीत टाकलं आहे. या यादीत अब्दुल्ला ओबैद, जाफर इकबाल, अब्दुर रहमान आबिद या तिघांची नावंही टाकण्यात आली आहेत. 30 जानेवारी 2017 पासून हाफिज सईद नजर कैदेत आहे. 2008 साली मुंबईत झालेल्या दहशतवादी हल्ल्यानंतरही सईदला नजरकैदेत ठेवण्यात आलं होतं. पण 2009 साली कोर्टानं त्याची सुटका केली होती. पाकिस्तानी वृत्तपत्रानुसार, पाकिस्तानच्या गृह मंत्रालयानं दशतवाद विरोधी विभागाला या लोकांवर आवश्यक ती कारवाई करण्याचे आदेश दिले आहेत. चौथ्या यादीत सईद नाव समाविष्ट करणं ही गोष्ट हे सिद्ध करते की, त्याचा कोणत्या तरी दहशतवादी कारवाईशी संबंध आहे. या यादीत नाव आल्यानं सईदच्या परदेशी प्रवासावर प्रतिबंध येऊ शकतो. तसेच त्याच्या संपत्तीचीही चौकशी होऊ शकते. तसेच याचं उल्लंघन केल्यास 3 वर्ष शिक्षा आणि दंडही होऊ शकतो. संबंधित बातम्या:

26/11 हल्ल्याचा मास्टरमाईंड हाफिज सईद नजरकैदेत

हाफिज सईद पाण्यामार्गे भारतात हल्ला करण्याच्या तयारीत

होय, बुरहान वानी माझ्या संपर्कात होता : हाफिज सईद

पाकिस्तानच्या शत्रूचं असं स्वागत का?: हाफिज सईद

‘हे’ आहेत ‘फॅण्टम’चे हाफिज सईद, ‘यांच्या’ भूमिकेमुळेच हाफिज सईदचा तिळपापड