माझा उत्तराधिकारी भारतातून असेल, दलाई लामांना विश्वास, चीनचा जळफळाट

माझा उत्तराधिकारी भारतातून असेल, असा विश्वास तिबेटी बौद्ध धर्मगुरू दलाई लामा यांनी व्यक्त केला आहे.

शिमला : माझा उत्तराधिकारी भारतातून असेल, असा विश्वास तिबेटी बौद्ध धर्मगुरू दलाई लामा यांनी व्यक्त केला आहे. धर्मशाला येथील एका कार्यक्रमात दलाई लामा बोलत होते. दलाई लामा म्हणाले की, "माझा उत्तराधिकारी जर चीनने जाहीर केला असेल तर त्याचा कधीही सन्मान केला जाणार नाही." परंतु दलाई लामा यांच्या या विधानाचा चीनने विरोध केला आहे. दलाई लामा यांनी 1959 साली तिबेट सोडले, या घटनेच्या 60 व्या वर्षपूर्तीनिमत्त आज धर्मशाला येथे एका कार्यक्रमाचे आयोजन करण्यात आले होते. या कार्यक्रमात दलाई लामा बोलत होते. दलाई लामा म्हणाले की, "चीनसाठी सर्वात महत्त्वाचा विषय म्हणजे दलाई लामांचा पुनर्जन्म होणे हा आहे. त्यामुळे मला भविष्यातल्या दलाई लामाबद्दल चिंता आहे, तुम्ही जर भविष्यात दोन दलाई लामा पाहीले तर त्यापैकी एक भारतातून आणि दुसरा चीन जाहीर करेल. परंतु चीनमधून आलेल्या धर्मगुरुला कधीही सन्मान दिला जाणार नाही." गेल्या आठवड्याभरापासून चीनमधील काही नेत्यांकडून दलाई लामा यांचा उत्तराधिकारी कोण असेल? याबाबत चर्चा सुरु आहे. या पार्श्वभूमीवर दलाई लामा यांनी माझा उत्तराधिकारी भारतातून असेल चीनमधून नाही, हे स्पष्ट केले आहे.