आता नेटफ्लिक्स सांगणार, तुमच्या इंटरनेटचा स्पीड किती आहे?

मुंबई : नेटफ्लिक्सने Fast.com नावाची एक वेबसाईट सुरु केली आहे. ज्याद्वारे यूजर्सना आपल्या इंटरनेट कनेक्शनचा स्पीड किती आहे, हे सांगितलं जाणार आहे. मग तो मोबाईल असो, वा ब्रॉडबँड.   विशेष म्हणजे नेटफ्लिक्सची ही सेवा पूर्णपणे अॅड फ्री आहे. शिवाय, तुम्हाला कोणत्याही प्रकारचं सबस्क्रिप्शन घेण्याची गरज नाही. जगाच्या कुठल्याही कोपऱ्यातून तुम्ही या वेबसाईटच्या माध्यमातून मोबाईल किंवा ब्रॉडबँड इंटरनेटचा स्पीड किती आहे, हे जाणून घेऊ शकता.   ‘नेटफ्लिक्स’च्या माहितीनुसार, ज्यावेळी एखाद्या यूजरला व्हिडीओ स्ट्रीम करताना अडथळे येतात, त्यावेळी यूजर्स fast.com चा वापर करुन डाऊनलोड स्पीड चेक करु शकतात.   वेबसाईटवर यूजर्सच्या इंटरनेट स्पीडच्या तुलना करण्याचा पर्यायही उपलब्ध करुन देण्यात आला आहे. नेटफ्लिक्सच्या माहितीनुसार, स्पीड टेस्ट इंटरनेट कनेक्शनच्या आयएसपी स्पीड इंडेक्सपेक्षा वेगळं असतं. स्पीड इंडेक्समध्ये प्राईम टाईमदरम्यान नेटफ्लिक्सवर स्ट्रीम झालेल्या डेटाचा मासिक सरासरी स्पीड मोजलं जातं.