15 ऑगस्टपासून भीम अॅपवर आणखी कॅशबॅक मिळणार?

नॅशनल पेमेंट कॉर्पोरेशन ऑफ इंडिया अर्थात एनपीसीआयच्या वतीने हे अॅप सुरु करण्यात आलं आहे. नोटाबंदीनंतर सरकारने डिजिटल पेमेंटला चालना देण्यासाठी हे अॅप आणलं होतं.

नवी दिल्ली : तुम्हीही डिजिटल पेमेंटसाठी भीम अॅपचा वापर करत असाल तर स्वातंत्र्य दिनाच्या निमित्ताने मोठी कॅशबॅक ऑफर मिळण्याची शक्यता आहे. कॅशबॅक वाढवण्याचा प्रस्ताव या स्वातंत्र्य दिनापासून लागू केला जाऊ शकतो, अशी माहिती आहे. नॅशनल पेमेंट कॉर्पोरेशन ऑफ इंडिया अर्थात एनपीसीआयच्या वतीने हे अॅप सुरु करण्यात आलं आहे. नोटाबंदीनंतर सरकारने डिजिटल पेमेंटला चालना देण्यासाठी हे अॅप आणलं होतं. भीम अॅपच्या ग्राहकांसाठी कॅशबॅकचा प्रस्ताव या स्वातंत्र्य दिनापासून लागू होऊ शकतो. अधिकाधिक ग्राहक आकर्षित करण्यासाठी कॅशबॅक वाढवण्याचा प्रस्ताव सरकारकडे पाठवण्यात आला आहे. या 15 ऑगस्टपर्यंत प्रस्ताव मंजूर होण्याची अपेक्षा एनपीसीआयचे व्यवस्थापकीय संचालक आणि मुख्य कार्यकारी अधिकारी एपी होटा यांनी ‘टाइम्स ऑफ इंडिया’शी बोलताना सांगितलं. भीम अॅपच्या तुलनेत इतर डिजिटल पेमेंट अपकडून त्यांच्या ग्राहकांना जास्त कॅशबॅक दिला जातो. सध्या तुम्ही कोणाला भीम अॅप रेफर केल्यास तुम्हाला 25 रुपये मिळतात. नोटाबंदीनंतर सुरु करण्यात आलेल्या या अॅपचे सध्या 1 कोटी 60 लाख ग्राहक आहेत. यापैकी 40 लाख ग्राहक सक्रिय आहेत.