डेटा लीक प्रकरणी फेसबुकवर 34 हजार कोटींचा दंड, टेक कंपनीवरील आजवरची सर्वात मोठी दंडात्मक कारवाई

मार्च 2018 मध्ये फेसबुक डेटा लीक प्रकरणाचं सर्वात मोठं प्रकरण समोर आलं होतं. युजर्सची डेटा प्रायव्हसी आणि सुरक्षेत फेसबुककडून चूक झाल्याचं आढळून आल्याचं फेडरल ट्रेड कमिशनच्या तपासात आढळून आलं आहे.

(Photo by Chesnot/Getty Images)

मुंबई : केंब्रिज अॅनालिटिका डेटा लीक प्रकरणी अमेरिकेच्या फेडरल ट्रेड कमिशनने फेसबुकवर 5 अब्ज डॉलर्सचा (34 हजार कोटी) दंड ठोठावला आहे. एखाद्या टेक्नॉलॉजी कंपनीला ठोठावलेला आजवरचा हा सर्वाधिक दंड आहे. याआधी 2012 मध्ये गूगलला 22 मिलियन डॉलर्सचा दंड ठोठावला होता.

विविध वृत्तसंस्थांनी दिलेल्या माहितीनुसार, केंब्रिज अॅनालिटिका डेटा लीक प्रकरणात फेसबुकच्या युझर्सच्या खाजगी माहितीचा गैरवापर केल्याच्या आरोपवरुन हा दंड ठोठावला आहे. या संपूर्ण प्रकरणाच्या तपासाची जबाबदारी अमेरिकेची फेडरल ट्रेड कमिशनकडे होती.

मार्च 2018 मध्ये फेसबुक डेटा लीक प्रकरणाचं सर्वात मोठं प्रकरण समोर आलं होतं. युजर्सची डेटा प्रायव्हसी आणि सुरक्षेत फेसबुककडून चूक झाल्याचं आढळून आल्याचं फेडरल ट्रेड कमिशनच्या तपासात आढळून आलं. मात्र फेडरल ट्रेड कमिशन आणि फेसबुकने याविषयी कोणतीही प्रतिक्रिया अद्याप दिलेली नाही.

या कारवाईचा फेसबुकवर फारसा फरक पडेल असं वाटत नाही. कारण फेसबुकचे प्रमुख मार्क झुकेरबर्ग यांना या कारवाईची पूर्वकल्पना होती. त्यानुसार त्यांनी 3 अब्ज डॉलर एवढी रक्कम आधीच जमवली होती. याशिवाय यावर्षी पहिल्या तीन महिन्यात फेसबूकने 15 बिलियन डॉलरची कमाई केली आहे. त्यामुळे दंडाची रक्कम फेसबुकच्या  कमाईच्या तुलनेत कमी आहे.

काय आहे फेसबुक डेटा लीक प्रकरण?

2017 साली अमेरिकेच्या अध्यक्षपदाची निवडणूक झाली. या निवडणुकीत डोनाल्ड ट्रम्प यांना मदत करणाऱ्या 'केम्ब्रिज अॅनालिटिका' या कंपनीने जवळपास 8 कोटी फेसबुक यूजर्सची वैयक्तिक माहिती चोरली, असा आरोप करण्यात आला होता. या चोरलेल्या माहितीचा निवडणुकीत वापरही केला, असाही आरोप आहे.

ब्रिटनमधील केम्ब्रिज अॅनालिटिका कंपनीने डोनाल्ड ट्रम्प यांना राष्ट्राध्यक्षपदाच्या निवडणुकीत कशाप्रकारे मदत केली, यासंदर्भात अमेरिकन आणि युरोपियन खासदारांनी 'फेसबुक इंक'कडे उत्तर मागितले होती.