'18 वर्ष पूर्ण मतदार यादीत नाव नोंदवा', फेसबुक रिमाइंडर देणार!

मुंबई: भारतीय लोकशाहीत मतदानाला अनन्य साधारण महत्व आहे. निवडणूक आयोगाकडून मतदानासाठी मोठ्या प्रमाणात जनजागृती केली जाते. जाहिराती, होर्डिंग, पोस्टर याच्या माध्यमातून आतापर्यंत मतदानाबाबत माहिती दिली जात होती. पण, आता काळाची गरज ओळखून निवडणूक आयोगानंही पुढचं पाऊल टाकलं आहे. सोशल मीडियाचा वापर करुन निवडणूक आयोगही आता मतदानाविषयी माहिती देणार आहे. मतदारांच्या नोंदणीसाठी निवडणूक आयोगानं फेसबुकच्या साथीनं एक विशेष अभियान सुरु केलं आहे. फेसबुकच्या मदतीनं 1 जुलैपासून 'व्होटर रजिस्ट्रेशन रिमाइंडर' सुरु करणार आहे. जारी केलेल्या अधिकृत पत्रकानुसार, 1 जुलैपासून फेसबुक 18 वर्ष पूर्ण होणाऱ्या यूजर्संना नोटिफिकेशन पाठवणार आहे. हे रिमांइडर मराठी, इंग्रजी, हिंदी, गुजराती, तमिळ, तेलगू, मल्याळम, कन्नड, बंगाली, उर्दू, असमी आणि उडिया या भाषांमध्ये असणार आहे. फेसबुक यूजर्सनं 'रजिस्टर नाऊ बटन'वर क्लिक केल्यानंतर राष्ट्रीय मतदार सेवा पोर्टलवर जाता येईल. जिथे त्यांना मतदार यादीत नाव नोंदवता येणार आहे. याबाबत मुख्य निवडणूक आयुक्त नसीम झैदी म्हणाले की, 'मला ही घोषणा करताना आनंद होत आहे. निवडणूक आयोग पहिल्यांदा मतदान करणाऱ्या मतदारांवर विशेष लक्ष देणार आहे. त्यासाठी विशेष अभियानही सुरु करणार आहे. एकही मतदार मतदानापासून वंचित राहू नये या दृष्टीनं उचलेलं हे एक पाऊल आहे.' 'मतदानासाठी पात्र असणाऱ्या सर्व नागरिकांना मी मतदान करण्याचं आवाहन करतो. मला विश्वास आहे की, यामुळे निवडणूक आयोगाचं मतदान अभियान आणखी सशक्त होईल.' असंही झैदी म्हणाले.