BMW X 5 | शानदार बीएमडब्ल्यू एक्स 5 चं सचिनच्या हस्ते भारतात अनावरण

बीएमडब्ल्यूने सध्या डिझेलवर चालणारी तीन एक्स 5 मॉडेल्स भारतीय बाजारपेठेत सादर केली आहेत. एक्स 5 या मॉडेलच्या चौथ्या आवृत्तीचं सचिन तेंडुलकरच्या हस्ते अनावरण करण्यात आलं.

मुंबई : बीएमडब्ल्यू या कारनिर्मितीतील आघाडीच्या कंपनीने एक्स 5 या मॉडेलच्या चौथ्या आवृत्तीचं भारतात गुरुवारी अनावरण केलं. मुंबईत पार पडलेल्या एका दिमाखदार सोहळ्यात कंपनीचा सदिच्छादूत मास्टर ब्लास्टर सचिन तेंडुलकरच्या हस्ते या आलिशान आणि दणकट गाडीचं अनावरण करण्यात आलं. बीएमडब्ल्यूने सध्या डिझेलवर चालणारी तीन एक्स 5 मॉडेल्स भारतीय बाजारपेठेत सादर केली आहेत. पेट्रोलच्या चौथ्या मॉडेलची विक्री 2019 च्या अखेरीस सुरु होईल, असं कंपनीच्या वतीने स्पष्ट करण्यात आलं. सध्या विक्रीसाठी उपलब्ध असलेल्या मॉडेल्सच्या एक्स-शोरुम किमती या 73 ते 83 लाखांच्या घरात आहेत. बीएमडब्ल्यू एक्स 5 ड्राईव्ह 30 डी 'स्पोर्ट' - 72 लाख 90 हजार बीएमडब्ल्यू एक्स 5 ड्राईव्ह 30 डी 'एक्स लाईन' - 82 लाख 40 हजार बीएमडब्ल्यू एक्स 5 ड्राईव्ह 40 आय 'एम स्पोर्ट' - 82 लाख 40 हजार 195 किलोवॅटचं शक्तिशाली बीएस 6 श्रेणीतलं इंजिन 265 हॉर्सपॉवरची ताकद या गाडीला उपलब्ध करुन देतं. एसएव्ही (स्पोर्ट्स एक्टिव्हीटी व्हेईकल) श्रेणीतील ही कार आपल्या 8 स्पीड ऑटोमॅटिक ट्रान्समिशनमुळे ताशी 0 ते 100 किमी. चा वेग अवघ्या सहा सेकंदात गाठू शकते. बीएमडब्ल्यूची एक्स ड्राईव्ह टेक्नॉलॉजी ड्रायव्हिंग कंडिशननुसार गाडीत ऑटोमेटिक बदल करुन घेते. 1999 मध्ये पहिली एक्स 5 बाजारात आल्यापासून कंपनीचं हे आजवरचं सर्वात यशस्वी मॉडेल ठरलं आहे. बीएमडब्ल्यूने जगभरात दोन कोटींपेक्षा अधिक एक्स 5 ची विक्री केलेली आहे. अत्याधुनिक उपकरणांनी सुसज्ज असलेली ही कार बीएमडब्ल्यूच्या शिरपेचात आणखीन एक मानाचा तुरा रोवणार यात शंकाच नाही.