Pune Ganeshotsav 2022: पुण्यात 28 तासानंतरही विसर्जन मिरवणुका सुरुच; मिरवणूक यंदा विक्रम करणार ?

  पुण्यात यंदा मिरवणूक सुरु होऊन 28 तास उलटले आहेत. मात्र अजूनही मिरवणुका संपल्या नाही आहेत. त्यामुळे यंदा पुण्यातील गणपती विसर्जनाची मिरवणुक यंदा विक्रम करणार का ? असा प्रश्न उपस्थित होत आहे.

pune

Pune Ganeshotsav 2022:  पुण्यात यंदा मिरवणूक सुरु होऊन 28 तास उलटले आहेत. मात्र अजूनही मिरवणुका संपल्या नाही आहेत. त्यामुळे यंदा पुण्यातील गणपती विसर्जनाची मिरवणुक यंदा विक्रम करणार का ? असा प्रश्न उपस्थित होत आहे. काल अनंत चतुर्दशीच्या दिवशी सकाळी 10 वाजता मिरवणुकीचा नारळ फोडण्यात आला होता. मात्र आज 28 तास उटलून गेले तरीदेखील मिरवणुका सुरुच आहे. . लक्ष्मी रस्त्यासह केळकर रस्ता, शास्त्री रस्ता येथेही मंडळांच्या रांगा आहेत. सगळी परिस्थिती पाहता मिरवणूक संपायला किमान संध्याकाळी पाच वाजतील असा अंदाज पोलिसांनी वर्तवला आहे. 

कोरोनामुळे यंदा दोन वर्षांनी गणपती विसर्जनाची मिरवणुक मोठ्या जल्लोषात सुरु आहे. दोन वर्षांच्या खंडानंतर या मिरवणुका अनेक तास चालतील, असा अंदाज पोलिसांना होताच मात्र 28 तास उलटून गेल्यानंतर पोलिसांनी देखील संताप व्यक्त केला आहे. शिंदे-फडणवीस सरकारने यंदा विसर्जन मिरवणुकीवरील सर्व निर्बंध उठवल्यामुळे मोठ्या उत्साहात सुरु होती. मात्र काही मंडळांच्या बेजबाबदारपणामुळे मिरवणूक खोळंबली. 

आखिल मंडई गणपती तास भर एकाच जागी
आखिल मंडई गणपती मंडळ तासभर एकाच जागेवर थांंबली होती. त्यामुळे मंडळांचे पदाधिकाऱ्यांनी महापालिकेच्या अधिकाऱ्यांना चांगलाच दम दिला. अनेक मंडळांना लवकर पुढे सोडत आहात. एका  तासापासून गणपती जागेवर उभा आहे, असं म्हणत त्यांनी महापालिका स्वागत कक्षात येऊन प्रश्न उपस्थित केले आहेत. सकाळी सुमारे 10 वाजता मंडळ टिळक चौकात दाखल झाल्याची माहिती आहे.
 
या वर्षी गणेश मंडळांचा उत्साह पाहून मिरवणुका लवकरात लवकर संपवाव्या आणि मिरवणुकीला गालबोट लागू नये, यासाठी सुरक्षा बाळगावी असं आवाहन पोलीस आयुक्त अमिताभ गुप्ता यांनी केलं होतं. मात्र त्यांच्या या आवाहनाचं पालक न केल्याचं चित्र आहे. त्यामुळे पुण्यातील मिरवणुकांना शिस्त दिसत नाही आहे.

जलद गतीनं मिरवणुका पुढे नेण्याचे पोलिसांचे आदेश
मिरवणूक सुरु असताता पोलिसांनी कोणत्याच मंडळांच्या उत्साहात हस्तक्षेप केला नव्हता. सगळ्या मंडळांना उत्साह साजरा करण्याची अनुमती देण्यात आली होती. मात्र मिरवणुकांसाठी दुसरा दिवस उजाडल्यामुळे पोलिसांनीही जलद गतीनं मिरवणुका पुढे नेण्याचे आदेश दिले आहेत. कालपासून शहरातील महत्वाचे रस्ते मिवरणुकीसाठी बंद करण्यात आले होते. ते रस्ते 28 तासांनंतरही काही प्रमाणात बंद आहेत त्यामुळे कामावर जाणाऱ्यांचा खोळंबा होत असल्याचं चित्र आहे.  अजूनही शेकडोंच्या संख्येने नागरीक बाप्पाला निरोप देण्यासाठी रस्तावर आहेत.