मविआत ठिणगी? सोलापूर जिल्ह्यातील विधानसभेच्या 11 पैकी 6 जागांवर काँग्रेसचा दावा, शरद पवारांच्या भूमिकेकडं लक्ष 

सोलापूर जिल्ह्यात जागावाटपावरुन महाविकास आघाडीत ठिणगी पडण्याची शक्यता आहे. कारण सोलापूर काँग्रेसकडून (Solapur Congress) सोलापूर जिल्ह्यातील विधानसभेच्या 11 पैकी 6 जागांवर दावा करण्यात आला आहे. 

Solapur Congress Vidhansabha Election News : विधानसभा निवडणुकीच्या (Vidhansabha Election) पार्श्वभूमीवर सर्वच राजकीय पक्षांच्या हालचालींना वेग आलाय. तसचे इच्छुकांनी देखील गाठी भेटी, संवाद, दौरे काढण्यास सुरुवात केलीय. मात्र, महाविकास आघाडी (Mahavikas Aghadi) असेल किंवा महायुती असेल दोन्हीकडे देखीलल अद्याप जागावाटपाचा पेच काय आहे. अशातच सोलापूर (Solapur) जिल्ह्यात जागावाटपाच्या मुद्यावरुन महाविकास आघाडीत ठिणगी पडण्याची शक्यता आहे. कारण  सोलापूर काँग्रेसकडून (Solapur Congress) सोलापूर जिल्ह्यातील विधानसभेच्या 11 पैकी 6 जागांवर दावा करण्यात आला आहे. 

प्रणिती शिंदे विजयी झालेल्या लोकसभा मतदारसंघातील सर्वच विधानसभेच्या जागेवर काँग्रेसचा दावा

सोलापूर काँग्रेस शहराध्यक्ष चेतन नरोटे यांनी प्रदेशाध्यक्ष नाना पटोले आणि प्रभारी रमेश चेन्नीथला यांच्याकडे बैठकीत  जिल्ह्यातील विधानसभेच्या 11 पैकी 6 जागांवर देण्याची मागणी केली आहे. शहराध्यक्ष चेतन नरोटे यांच्या या मागणीला काँग्रेसच्या खासदार प्रणिती शिंदे यांनी देखील दुजोरा दिला आहे. पुण्यातील बैठकीमध्ये प्रदेशाध्यक्ष आणि प्रभारींसमोर त्यांनी ही मागणी केली. प्रणिती शिंदे विजयी झालेल्या सोलापूर लोकसभा मतदारसंघातील सर्वच विधानसभेच्या जागेवर काँग्रेसनं दावा केला आहे. काँग्रेसच्या या दाव्यामुळं महाविकास आघाडीतील घटकपक्ष काय भूमिका घेतात? हे पाहावे लागणार आहे.

शरद पवार गट आणि माजी आमदार नरसाय्या आडम यांच्या भूमिकेकडं लक्ष

दरम्यान, महाविकास आघाडीनुसार शहर उत्तर विधानसभा ही राष्ट्रवादी काँग्रेसची पारंपरिक जागा आहे. तर लोकसभा निवडणुकीत काँग्रेसला माकपचे माजी आमदार नरसय्या आडम यांनी मदत केली होती. त्यामुळं आडम यांना शहर मध्यमधून लढण्यासाठी काँग्रेसने पाठिंबा दिल्याचा दावा केला होता. त्यामुळं आता शरद पवार गट आणि माजी आमदार नरसाय्या आडम या बाबतीत काय भूमिका घेतात पाहणं महत्वाचं ठरणार आहे.

जागावाटपाबाबत अद्याप कोणताही निर्णय नाही

दरम्यान, विधानसभेच्या निवडणुकीच्या पार्श्वभूमीवर जागावाटपासंदर्भात महाविकास आघाडीत चर्चा सुरु आहे. अद्याप कोणताही निर्णय झालेला नाही. जो पक्ष ज्या ठिकाणी निवडून येईल त्या ठिकाणी त्या पक्षाचा उमेदवार उभा करायचा अशा प्रकारची चर्चा सध्या महाविकास आघाडीत सुरु आहे. त्यामुळं येणाऱ्या विधानसभा निवडणुकीत कोणता पक्ष किती जागा लढवेल यापेक्षा कोणत्या जागेवर कोणत्या पक्षाचा उमेदवार निवडून येईल यावर अधिक भर दिला जाणार असल्याचं बोललं जात आहे. 

महत्वाच्या बातम्या: