Sanjay Mandlik on Shahu Maharaj, Kolhapur : “सतेज पाटील (Satej Patil) तुम्हाला आताच मी चुकीचा कसा वाटायला लागलो? 2026 पर्यंत संजय मंडलिक यांच्या नेतृत्वाखाली हा जिल्हा विकास करेल असं म्हटला होतात. तुम्हालाच निवडणुकीला उभा राहायला लागणार म्हटल्यानंतर तुम्ही राजकीय बळी शोधला आणि शाहू महाराज (Shahu Maharaj) यांना गळ घातली. कोल्हापूरच्या गादीवर ज्या पद्धतीने ते आले तसा राजहट्ट या लोकसभेच्या निवडणुकीत देखील आहे. पण सगळे राजहट्ट पुरवायला कोल्हापूरची जनता पूर्ण करणार नाही. कुस्तीच्या आखाड्यात ज्या पद्धतीने डाव टाकला जातो, टांग मारली पाहिजे, अंगावर माती टाकली पाहिजे त्यापद्धतीने सगळं होणार आहे”, शिंदेंच्या शिवसेनेचे उमेदवार संजय मंडलिक (Sanjay Mandlik)म्हणाले.
कोल्हापूरमध्ये आज गुढीपाडव्याच्या मुहूर्तावर महायुतीचे उमेदवार संजय मंडलिक यांच्या प्रचार कार्यालयाचे उद्घाटन करण्यात आले. यावेळी कोल्हापूरचे पालकमंत्री हसन मुश्रीफ, भाजप नेते चंद्रकांत पाटील, खासदार धनंजय महाडिक, शिंदे गटाचे नेते राजेश क्षीरसागर, भाजपचे नेते समरजितसिंह घाटगे हे उपस्थित होते. महायुतीच्या तिन्ही पक्षाचे कार्यकर्ते मोठ्या संख्येने उपस्थित होते. यावेळी अबकी बार चारसो पार हा निर्धार करण्यात आला.
सतेज पाटील यांना ही खासदारकी आपल्या घरात वापरायची आहे
संजय मंडलिक म्हणाले, सतेज पाटील काल म्हणाले की प्रत्येक तालुक्यात एक संपर्क कार्यालय काढणार आहे. मला वाटतं त्यांना अजिंक्यतारा या कार्यालयाच्या शाखा काढायच्या आहेत. सतेज पाटील यांना ही खासदारकी आपल्या घरात वापरायची आहे. खासदार-आमदार, गोकुळ चेअरमन आपल्या घरातील नोकर आहेत अशा पद्धतीने ही मंडळी वागत आहेत. मी कालपर्यंत पुरोगामी होतो आज अचानक त्यांना मी प्रतिगामी दिसू लागलो.
कोल्हापुरात जन्माला आलेला प्रत्येक माणूस हा शाहू विचारांचा आहे. इथल्या पाण्यामध्ये, इथल्या मातीमध्ये, इथल्या डीएनएमध्ये शाहू विचार आहेत.
ज्या पद्धतीच्या बोरी त्या पद्धतीच्या बाभळी
पुढे बोलताना मंडलिक म्हणाले, शाहू महाराजांनी सगळ्यात महत्त्वाचं काम केलं ते म्हणजे प्रत्येक घरात पुरोगामी विचार दिला. आता निवडणुकीला उभा राहिलेल्या वारसदाराने देखील सांगितलं पाहिजे त्यांनी काय काम केलं. थेट पाईपलाईनचे पाणी आणले म्हणतात संपूर्ण कोल्हापूरकर म्हणत आहेत एकट्यानेच अभ्यंग स्नान केले. आम्हाला देखील कुणावर टीका करण्यात रस नाही. मात्र, निवडणुकीच्या आखाड्यात आल्यानंतर समोरून वार झाले तर आम्ही देखील कोल्हापूरकर आहोत. हे त्यांनी लक्षात ठेवावं. ज्या पद्धतीच्या बोरी त्या पद्धतीच्या बाभळी इथे असणार आहेत, हे आमच्या मित्रांनी लक्षात ठेवावं, असंही संजय मंडलिक म्हणाले.
तुझ्या पोटात का दुखतं बाबा?
चंद्रकांत पाटील म्हणाले, कोल्हापूर जिल्ह्यातील राजकारणामध्ये विरोधाभास आहे. सतेज पाटील भेद निर्माण करण्यात फार हुशार आहेत. हसन मुश्रीफ आणि समरजित घाटगे मांडीला मांडी लावून कसे बसतात असं सतेज पाटील म्हणतात, तुझ्या पोटात का दुखतं बाबा? एका घरात भांडण झालं, मारामारी झाली की परत एकत्र यायचं नाही का? सतेज पाटील तुम्ही आतापर्यंत फूट पाडण्याचेच काम केलं आहे. त्यामुळे फूट पडलेली माणसं एकत्र आली की तुम्ही घाबरता. कारण फूट पडलेल्या माणसांमुळेच तुम्ही विजयी होता. राजकारण कायमस्वरूपी दुष्मनीच बनलं हे काही बरोबर नाही. एकत्र बसून मिटवून घेणं हे आमच्या जिल्ह्यात काही जणांना नको आहे. जितकी दुकानं जास्त तितका जास्त फायदा असं गणित असतं, असंही चंद्रकांत पाटील म्हणाले.
इतर महत्वाच्या बातम्या