Raju Shetti on Ladki Bahin Yojana : महायुती सरकारने (Mahayuti Government) विधानसभा निवडणुकीच्या (Maharashtra Vidhan Sabha Election 2024) तोंडावर मुख्यमंत्री लाडकी बहीण योजना (Ladki Bahin Yojana) जाहीर करीत पात्र महिलांना दरमहा दीड हजार रुपयाचे सहाय्य निधी देण्याची योजना आखली. विधानसभा निवडणुकीत ही योजना महायुतीसाठी लाभदायक ठरली होती. साधारण 2 कोटी 11 लाख 860 महिला या योजनेसाठी पात्र ठरल्या होत्या. मात्र फेब्रुवारीमध्ये राज्यातील विविध जिल्ह्यांत करण्यात आलेल्या छाननी प्रक्रियेत अपात्र महिलांच्या संख्येत भर पडली आहे. त्यातच लाडकी बहीण योजनेचा फटका इतर योजनांना बसत असल्याचे बोलले जात आहे. आता स्वाभिमानी पक्षाचे नेते राजू शेट्टी (Raju Shetti) यांनी लाडकी बहीण योजनेबाबत मोठ भाष्य करत सरकारवर निशाणा साधलाय.
लाडकी बहिण योजना ही सरकारच्या पैशातूनच मतदारांना दिलेली लाच असल्याचे त्यांनी म्हटले आहे. लाडकी बहीण योजनेत सरकारने कर दात्यांचा पैसा वापरून सरकारच्या तिजोरीतून 46 हजार कोटींचा खर्च करण्याचा घाट घातल्याचा आरोप त्यांनी अलिबाग मधील पीएनपी टेनिस क्रिकेट चषक उद्घाटन सोहळ्याच्या प्रसंगी बोलताना केला आहे.
किती योजनांना कात्री लावली? अजित पवारांनी सांगावे
लाडकी बहिण योजनेत वापरण्यात आलेल्या पैशांमुळे इतर योजनांना देखील कात्री लावण्याचे काम सरकारने केले आहे. अनेक योजनांच्या बजेटमध्येही या योजनेमुळे सरकारला कात्री लावावी लागली आहे. उपमुख्यमंत्री अजित पवार यांनी यंदाचा अर्थसंकल्प सादर करताना त्या आर्थिक सर्वेक्षणात त्यांनी किती योजनांना कात्री लावली? हे सुद्धा सांगावे म्हणजे किती सामाजिक आणि दलित योजनांना कात्री बसली आहे, हे सुद्धा कळेल, असा घणाघात त्यांनी यावेळी केलाय.
लाडकी बहीण योजनेतील महिलांची संख्या कमी होणार
दरम्यान, लाडकी बहीण योजनेतील तब्बल 9 लाख महिलांची संख्या कमी होणार आहे. याआधी 5 लाख महिला या योजनेतून कमी झालेल्या होत्या तर आता नव्याने 4 लाख महिलांची संख्या कमी होणार आहे. त्यामुळे राज्य सरकारच्या 945 कोटी रुपयांची बचत होणार आहे. नमो शेतकरी योजनेचा लाभ आणि लाडकी बहीण योजनेचा लाभ घेणाऱ्या 5 लाख महिला आहेत. या महिलांना लाडकी बहीण योजनेतील फक्त 500 रुपये मिळणार तर नमो शेतकरी योजनेतून 1000 रुपये मिळणार आहेत. तर दिव्यांग विभागातून लाभ मिळणाऱ्या आणि लाडकी बहिण योजनेचा लाभ घेणाऱ्या अनेक महिला आहेत. त्यांची माहिती घेऊन त्यांना देखील वगळण्यात येणार आहे. तर वाहन असलेल्या 2.5 लाख महिला आहेत त्यांना ही यातून वगळण्यात आलं आहे.
आणखी वाचा