Prashant Paricharak on Vijaysinh Mohite–Patil : "मोहिते पाटील कुटुंबासोबत गेल्या 40 वर्षांपासून आम्ही कौटुंबिक संबंध ठेवून आहोत , माध्यमे म्हणत असली तरी अजून त्यांनी अधिकृतपणे तुतारी हातात घेतलेली नाही. भाजप आमदार रणजितसिंह मोहिते पाटील आणि मोहिते कुटुंबासोबत अजूनही पॅच अपचे प्रयत्न भाजपकडून सुरु आहेत. 2019 च्या लोकसभा निवडणुकीत जी टीम भाजप सोबत होती तीच टीम 2024 मध्येही निंबाळकर यांच्या सोबत आहे", असा गौप्यस्फोट भाजप नेते प्रशांत परिचारक (Prashant Paricharak) यांनी केला.
मोहिते पाटील कोणता निर्णय घेणार?
खासदार रणजित निंबाळकर यांच्या प्रचारासाठी आज (दि.7) पंढरपूर तालुक्यातील 57 गावात जिल्हा परिषद गटानुसार प्रशांत परिचारक यांनी बैठक बोलावल्या होत्या. यावेळी परिचारक बोलत होते. परिचारक यांच्याकडे माढा , सोलापूर आणि सांगली या तीन लोकसभा मतदारसंघाची जबाबदारी भाजपने दिलेली आहे. त्यामुळे परिचारक (Prashant Paricharak) यांच्या वक्तव्यानंतर पुन्हा एकदा मोहिते पाटील काय करणार हा प्रश्न उभा राहिला आहे.
राष्ट्रवादी आल्याने मतांच्या संख्येत मोठी वाढ होईल
माढा लोकसभा मतदारसंघात पंढरपूर तालुक्यातील 57 गावे असून जवळपास 150 बुथ आहेत. पंढरपूर तालुक्यातील दीड ते पावणेदोन लाख मतदान या तालुक्यात असल्याने आज खासदार रणजित निंबाळकर यांनी दिवसभर या गावातील प्रश्न आणि अडचणी ऐकून घेतल्या. यावेळी बोलताना निवडणुकीत भाजपसोबत शिवसेना होती. मात्र, आता राष्ट्रवादी आल्याने मतांच्या संख्येत मोठी वाढ होईल, असा दावाही रणजितसिंह निंबाळकर यांनी केला.
नवीन माणसे जवळ येताना एकही जुना नेता अथवा कार्यकर्ता दूर जाऊ नये
गेल्यावेळी निंबाळकर हे नवखे उमेदवार होते पण आता पाच वर्षात त्यांनी भरपूर काम करून नवनवीन कार्यकर्ते जोडले आहेत. त्यामुळे माढा लोकसभा भाजप मोठ्या मताधिक्याने जिंकेल,असे परिचारक यांनी सांगितले. नवीन माणसे जवळ येताना एकही जुना नेता अथवा कार्यकर्ता दूर जाऊ नये असे भाजपचे प्रयत्न असल्याचे परिचारक (Prashant Paricharak) यांनी सांगितले. पंढरपूर तालुक्यातील या गावांच्या अडीअडचणी जाणून घेतल्या असून या मतदारांचा विश्वास प्रशांत परिचारक यांच्यावर आहे. ते आमचे निवडणूक प्रमुख असल्याने या भागातून मोठे मताधिक्य मिळेल असा विश्वास खासदार रणजित निंबाळकर यांनी व्यक्त केला.
इतर महत्वाच्या बातम्या