संजय राठोड यांना मंत्रिपद, चित्रा वाघ यांची पहिली प्रतिक्रिया; म्हणाल्या, लाडक्या बहिणींनाही संधी

महायुती सरकारमध्ये मंत्री राहिलेल्या संजय राठोड यांच्यावर आमदार चित्रा वाघ यांनी गंभीर आरोप केले होते.

मुंबई : राज्य मंत्रिमंडळ विस्ताराची तारीख ठरली असून 15 डिसेंबर रविवारी दुपारी 3 वाजता नागपुरात यंदा मंत्र्यांचा शपथविधी होणार असल्याचे समजते. त्याच पार्श्वभूमीवर महायुतीमधील तिन्ही पक्षाच्या आमदारांची उत्कंठा वाढली असून मंत्रिपदाच्या यादीत कोणाचं नाव येईल, याकडे सर्वांचे लक्ष लागले आहे. तर, महायुती सरकारमध्ये मंत्री राहिलेल्या मंत्र्यांना पुन्हा संधी मिळणार असून आमदार संजय राठोड (Sanjay Rathod) यांनाही संधी दिली जाईल, अशी चर्चा आहे. विदर्भातील शिवसेनेचा कोठा आणि बंजारा समाजाला प्रतिनिधित्व देण्यासाठी राठोड यांना महायुती सरकारमध्ये मंत्रिपद दिले जाऊ शकते. त्याच, अनुषंगाने आमदार चित्रा वाघ (Chitra wagh) यांना प्रश्न विचारला असता त्यांनी प्रतिक्रिया दिली.  तसेच, लाडक्या बहिणींना देखील मंत्रिमंडळात स्थान असेल, असे वाघ यांनी म्हटले.

महायुती सरकारमध्ये मंत्री राहिलेल्या संजय राठोड यांच्यावर आमदार चित्रा वाघ यांनी गंभीर आरोप केले होते. पूजा चव्हाण आत्महत्या प्रकरणात वाघ यांनी पोलीस स्टेशनला जाऊन पीडित कुटुंबीयांच्या न्यायाची मागणी केली होती. तसेच, संजय राठोड यांचा मंत्रिपदाचा राजीनामा घेण्यासही महाविकास आघाडी सरकारला भाग पाडले होते. मात्र, शिवसेनेतील बंडानंतर संजय राठोड हे एकनाथ शिंदे यांच्यासमवेत पुन्हा भाजपसोबत सत्तेत सहभागी झाले. त्यानंतर, चित्रा वाघ यांची भूमिका मवाळ झाली. तसेच, राठोड यांच्याविरुद्ध त्यांनी घेतलेली भूमिकाही बदलल्याचा आरोप विरोधकांकडून करण्यात आला. आता महायुती सरकारच्या नव्या मंत्रिमंडळातही संजय राठोड यांना स्थान मिळेल, यासंदर्भात चित्रा वाघ यांना प्रश्न विचारण्यात आला होता. त्यावरही त्यांनी सावध प्रतिक्रिया दिल्याचं पाहायला मिळालं.

संजय राठोड यांना तत्कालीन मुख्यमंत्री उद्धव ठाकरे यांनी क्लीनचीट दिलेली असं एकनाथ शिंदे यांनी सांगितलं होतं. त्यामुळे,  त्यांना गत मंत्रिमंडळात मंत्रिपद देण्यात आलं. माझी लढाई अजून संपलेली नाही, यावेळेस काय होते हे पाहू, असे म्हणत संजय राठोड यांच्या मंत्रिपदावर आमदार चित्रा वाघ यांनी आपली भूमिका मांडली. 

उद्धव ठाकरेंच्या टीकेवर पलटवार

उद्धव ठाकरे यांनी आम्हाला हिंदुत्व शिकवू नये, काँग्रेसच्या मांडीला ते जाऊन बसले आहेत, ज्यांना दादरमधील ते मंदिर रामाचं आहे की हनुमानाचं हेही माहिती नाही, त्यांनी आम्हाला शिकवू नये, असे म्हणत चित्रा वाघ यांनी उद्धव ठाकरेंनी पंतप्रधान नरेंद्र मोदींवर केलेल्या टीकेवरुन पटलवार केला आहे. 

मंत्रिमंडळात लाडकी बहीण दिसेल

लाडकी बहीण योजनेचे निकष बदलणार हे मुख्यमंत्र्यांनी सांगितलं नाही. ही गरळ संजय राऊत यांनी ओकली आहे, त्यांना ही योजना नको आहे, असे म्हणत लाडकी बहीण योजनेवरही चित्रा वाघ यांनी स्पष्टीकरण दिलं. तर, मंत्रिमंडळात लाडक्या बहिणी पाहायला मिळतील, असा दावाही त्यांनी केला. तसेच, विरोधकांकडून ईव्हीएमवर संशय व्यक्त केला जात असल्याबाबत बोलताना ते म्हणाले की, त्यांचा पराभव झाला आहे. त्यामुळे, ते पराभवच खापर हे ईव्हीएमवरती फोडत आहेत, अशी प्रतिक्रिया वाघ यांनी दिली. 

सुनंदा पवार राजकीय व्यक्ती नाहीत - वाघ

दरम्यान, दोन्ही राष्ट्रवादीने एकत्र यायला पाहिजे, असं वक्तव्य आमदार रोहित पवार यांच्या मातोश्री सुनंदा पवार यांनी केलं होतं. त्यावरही चित्रा वाघ यांनी प्रतिक्रिया दिली. सुनंदा पवार या काही राजकीय व्यक्ती नाहीत, त्या सामाजिक काम करत असतात. त्या कोणत्या उद्देशाने बोलल्या हे माहिती नाही, असे वाघ यांनी म्हटलं. 

हेही वाचा